المصري الجديد

محدش فينا يعرف ايه فايدة التوقيت الصيفى والتوقيت الشتوى ولا ايه اصل الحكاية اصلا

البداية سنة 1907 لما واحد انجليزى اسمه وليم كان خارج بدرى يتمشى فى المزارع والجو كان حلو ومشمس وهما الانجليز لما يصدقوا يلقوا شمس وخلص تمشية على الصبح كده ورجع والناس لسه نايمين فكبرت فى دماغه واستحرم تروح الشمس دى كلها عليهم وهما نيام

اما عامل كتاب _واضح انها كانت حاجة سهلة عندهم_ وقال فيه رايه بانهم يستفيدوا من ضوء الشمس بدل الفحم والبترول والغاز وهو توفير  المهم رايه ده عمل جدل فى البرلمان الانجليزى حبة يقولوا اه وحبة يقولوا لا

لغاية ما الملك الانجليزى عجبته الفكرة وقام مطابقها  بكده بدات فكرة التوقيت الصيفى ولما جات الحرب العالمية عشان الدول توفر الطاقة لخدمة الحرب اتعممت فكرة التوقيت الصيفى وبعد الحرب رجعوا للتوقيت الموحد ولما جات الحرب العالمية التانية رجعوا تانى للتوقيت الصيفى  وبعد الحرب نفضوا له

ومصر بلا فخر اول دولة عربية تطبق نظام التوقيت الصيفى عارفين ليه ؟؟

لان النظام ده ملوش اى لازمة فى مصر عشان اولا احنا جو معتدل طول السنة محناش محتاجين ننزل بدرى عشان نلحق الشمس ولا محتاجين ننزلى متاخر عشان الشمس تكون بددت البرد

وطبعا التوقيت الصيفى ده مش بيوفر فى الطاقة بالنسبة لينا ليه بقه

عشان احنا بلد ماشية بالملوخية وبالكوسة الارخص غالبا ,يعنى مصر تمشى فى اى شارع الساعة 2 الضهر وتلاقى اعمدة الانارة(معرفتيش اكتبها بالعامية) منورة عادى خالص ,ده فى الشارع اما فى المدارس والمكاتب والشركات العامة طبعا فالنور منور 25 ساعة يوميا هو حد بيدفع حاجة ماهو مال سايب,

بس للحق فى ناس بتقول انه نظام مفيد فى مصر  وانا مش منهم,اما شركة الكهرباء والطاقة فمرة تقول مفيد ومرة تقول ملوش لازمة

ولغاية دلوقتى محدش عارف هو مفيد ولا لا

اصل احنا كده بلد محدش فيها فاهم حاجة

بجد زهقت منكم ناس مقرفة وبلد مقرفة وعيشتكم قرف فى قرف وبعد كده تزعلوا لما اقول هى القيامة مش هتقوم بئه

وتزعلوا منى لما اقول انا فاشل وانتوا السبب فى فشلى بس الحقيقة مش انا لوحدى اللى فاشل كلكم فشلة بس محدش فيكم عنده الشجاعة عشان يعترف بكده زى واللى مش مصدق يبص لنفسه وهو هيعرف قد ايه هو فاشل

وكل ده معرفش؟؟ المشكلة انى معرفش عيشة تقرف والجو كمان وكانى كنت مستحمل, بقه حر يخنق ومش كفاية القرف اللى واحد بيشوفه فى يومه لا كمان جو حر  وناس سالبين ومقرفين  مبيعملوش حاجة فى حياتهم  عيشين حياة اقرب للموت  مش عارف ادعى عليكوا ولا ادعيلكوا  بس ادعيلكوا بتاع ايه هو انتوا عايز كل حاجة كده وانتوا قاعدين

طبعا كل واحد هيقولى وانتى عايزنى اعمل ايه ؟؟ يعنى كمان فى الاخر انا اللى هقول لكل واحد يعمل ايه

ومع ذلك انا هقول بس انت اعمل

متكدبيش صعبة دى ؟ طبعا صعبة جدا متكدبيش ازاى وانت عايش عمرك كله بتكدب ومفيش يوم بيعدى من غير كدبة

طيب بلاش دى شكلها صعبة علينا بعد ما اتعودنا الكدب

طيب متغشش فى الامتحانات ولا فى اى حاجة بتعملها؟؟ لا انا اكيد بهزر بعد ما وصلنا كل ده بالغش هتيجى دلوتى وتقولى متغشيش لا اكيد بهزر, لا بئه مش بهزر متغشيش, بس طبعا يهزر دى كمان صعبة علينا بعد ما عشنا عمرنا كله بنغش

طيب هفكر ليكوا فى حاجة سهلة  بردوا انا اللى هفكر وكانكم بهايم من غير عقل ماشى طالما انا اللى بقول يبقى لازم انا اللى افكر  ماشى كلامكوا

متدفعش رشوة او متخدهاش يعنى متفتحش مخك وامشى بما يردى الله

اه انا كده اتجننت رسمى ,يعنى لما عسكرى المرور يوقفنى عشان مش رابط الحزام ولا بتكلم فى التليفون يعملى غرامة بالشى الفلانى عشان مرديتش افتح مخى هتتبسط انت كده

ولا لما افضل رايح جاى على السجل المدنى عشان اطلع شهادة ميلاد كمبيوتر واسيب شغلى واللى ورائى قال يعنى انا ورائى حاجة عشان سعادتك تتبسط لما انا مفتحش مخى

 لا معك حق, اقولك الحق احنا هنعيش كده ونموت كده(كده دى شتيمة بس محدش هيفهمها) وانا غلطان

وانا اسف كمان بس يظهر الحر وقلة النوم تعبونى شوية واكيد فى الاخر انا كنت بهزر بس مش واخد بالى

ههههههههههههه ههههههههه ههههههههههههه

لو خرجت من بيتكوا يبقى انت داخل على مغامرة فى شوارع قاهرة المعز, وانت بتغامر باغلى ما تملك حياتك!!!!؟

لو خرجت من بيتك لازم تبقى عينك فى نص راسك  عشان متقعش فى بلاعة مفتوحة وهتشوف فى سكتك كتيررر منها واذا نجاك ربنا من شر البلاعات اللى مبتشبعش ,متفرحش….؟

لو ماشى فى وسط الشارع ممكن تخبطك عربية تخبطك ايه تدهسك عربية مجنونة سايقها واد اهبل  غالبا ضارب مخدرات ومش شايف قدامه ,اما لو كان حظك حلو ولقيت فى الشارع  رصيف ودا والله العظيم حقيقة فى شوارع فيها رصيف  وملقتيش ناس قاعدة على الرصيف بتبيع حاجات ولا حتى قاعدين بيتهؤ  واستطعت بفضل من الله انك تصعد الرصيف سالما متفرحش….؟

عشان دلوتى الميكرباصات بتمشى فوق الرصيف اكتر ما بتمشى فى وسط الشارع وكل ده لو انتى موقعتش فى حفرة ومتشنكلتيش فى حجر

اما لو  سولت لك نفسك وركبت ميكروباص هتشوف اثارة ملهاش حل  ولا حتى فى مدينة الملاهى(دريم بارك مثلا) العربية هتمشى على عجلاتين واحيانا على عجلة واحدة  وتطلع رصيف وتنط من فوق كوبرى(غالبا كوبرى السيدة عائشة) شوية بنى ادمين يقعوا من الميكروباص و هو السواق بيعمل غرز كده ولا كده 

اما لو انت من اصحاب الاعصاب الفولاذية ولديك القدرة على القيادة فى مصر و عندك عربية طبعا وماشى رابط حزام الامان ومبتكلميش فى الموبيل ومش مشغول بحاجة غير طريقك ربنا يستر طريقنا جميعا  برضه متفرحش….؟

ممكن تلاقى ونش حكومة لزق فى عربيتك ولا وقعت العربية كلها فى حفرة فى وسط الشارع

اما لو خفت على حياتك وراحت على المترو اسهل وازحم وسيلة موصلات فى مصر  برضه متفرحش….؟

(تحس انى جاى انكد عليكوا)

عشان فى شروط لركوب المترو 

اولا:لازم تكون صاحب قوة تحمل خرافية  عشان ممكن تضطر تعيش لمدة محطة او اكتر من غير هواء

ثانيا:يختلف الجو كليا جوه عربيات المترو عن الجو الطبيعى بره عشان كده لازم تقراء النشرة الجوية اللى جو المحطات عشان متخدش برد

وكمان غالبا  هيغمى عليك مرتين  تلاتة لحد ماتنزل بالسلامة  وعشان كده

غير مسموح بتاتا لمرضى القلب والحوامل ضيق التنفس الخروج من منازلهم

لكن محدش فينا يعرف المصريين الجدد

المصريين الجدد دول احفاد المصريين القدماء اللى بنوا الاهرام وابوالهول والمعابد العظيمة اللى فى الاقصر واسوان

والمصريين القدماء اللى احنا منقربش ليهم من بعيد ولا من قريب  واللى مش مصدق يقارن بينه وبين جده الفرعون اللى اخترع الكتابة او جده اللى بنا الهرم

كل الرغى اللى فوق ده ليه؟؟

دى محاولة عشان اجمع المصريين الجدد من جديد ونحاول نبنى الهرم الجديد

واللى شايف انه يقدر يكون من المصريين الجدد يشترك معايا هنا ونشوف هنقدر نبنى الهرم الجديد ولا ولا

من سنتين كنت بدرس القانون الدستورى وهو مادة رخمة شوية وبعدين وفى وسط المذكرة لقيت الدكتور بيتكلم عن التعديلات الدستورية اللى حصلت فى عهد السادات واللى اديت السيد رئيس الجمهورية سلطات واسعة وبعدين اكتشفت ان مجلس الشعب فى وقتها وافق باغلبية حاجة و90% على التعديلات دى بالرغم من انها بتزيد من سلطة رئيس الجمهورية وبتحد من باقى السلطات او السلاطات لانها مبقاتش تفرق كتير

طبعا روحت لابوى اساله هو كان فين لما التعديلات دى حصلت والناس كانوا فين لما الاستفتاء نزل ووافقوا  وبتوع المظاهرات وشباب الجامعة وغيرهم

قالى كلهم كانوا موجودين بس من امتى دول بيمنعوا حاجة الحكومة عايزها,وطبعا كمل كلامه باننا ملناش دعوة بالكلام ده ونمشى جنب الحيطة احسن واحنا مش قدى الناس دول ورديت عليه قولت انتى شايفنى كل يوم فى مظاهرة وبعدين انا اجبن من انى امشى فى مظاهرة  ومبعرفش امشى غير جنب الحيط متقلقاش

وبعدها بسنتين جات التعديلات الدستورية بتاعت اليومين دول وافتكرت كل الكلام ده وقولت هعمل ايه

بصيت لقيت المعارضة بتقول انها هتقاطع الاستفتاء  وطبعا قلت بركة يا جامع كده اضمن اقعد فى بيتنا بدل البهدلة وقلة القيمة فى المظاهرات واهو منها اقاطع الاستفتاء وده طبعا لانى اجبن من انى امشى فى مظاهرة

واكيد فى يوم من الايام ابنى هيسالنى انا كنت فين يومها بس مش عارف ساعاتها ارد عليه اقوله ايه؟

اى حاجة الا انى اقوله امشى جنب الحيط