المصري الجديد

فى البداية احب اوضح ان اليوميات دى من وحى الخيال واى تشابه بينها وبين اشخاص فى الواقع هو تشابه مقصود

اليوم الاول 

كالعادة صحيت من النوم المغرب  وشربت جردل نسكافيه عشان افوق واتغديت عشان مينفعش افطر المغرب ولبست ونزلت على مكانى المفضل الشارع,بعد الوقفة فى الشارع ومعكست اللى رايحة واللى جاية وشوية تهييس زهقنا _انا واصحابى_ وطبعا عشان مفيش فلوس نخرج راحنا على القهوة اهو كباية الشاى بنص جنيه مش مشكلة وعشرتين دومينة  ورجع الملعون اللى اسمه الزهق دى يجى خصوصا وان الساعة لسه 12 بليل طبعا رجعنا للشارع من تانى بس مفيش حتى حد يعدى نهييس عليه بس ربنا ما بينسش حد, عدى علينا واحد صاحبنا بس اخر مزاج وطلعنا عنده البيت وكان معه حتة حشيش عسل ولغاية هنا قلت الحمد الله اهو كده ضمنت ان النهاردة اتقضه

وعلى ما خلصنا قاعدتنا كان الفجر قرب يدن بس طبعا نزلت مش شايف قدامى وروحت على السرير وش

ويدوبك على ما بدات انام لقيتهم _اصحابى _بيرنوا للمرة الخمسين اصل هما مناموش لسه وافتكرت ان فى لعب كورة

قمت وانا بسب والعن ومش شايف قدامى ومشربتش حتى النسكافيه ولبست الشرط ومسكت الكوتش فى ايدى ونزلت وعلى اقرب عربية فول وقفت وباخر فلوس موجودة فطرت ورحت بعد كده على النادى وطبعا معرفتش العب بسب الحشيش بتاع امبارح والفيلم الثقافى بتاع اول امبارح

واخيرا رجعت لسرير وهنام

اليوم التانى

كان فى ماتش فى التليفزين ومفيش فلوس فامخرجتش

اليوم التالت

بدات بخناقة معهما فى البيت عشان مش عاجبهم حالى والنبى فى احسن من كده حال وخلصت على خير لانى جرت معهم ناعم عشان بكرة يوم مهم جدا جدا

مكانش فى حاجة فى التليفزيون ولسه مفيش فلوس فبرضه مخرجتيش بس اتقضيت نت

اليوم الرابع

مصر اليوم فى عيد وخصوصا انا النهاردة اول الشهر بتاعى يعنى هخد المصروف للاسف انا شحط طويل عريض بس طبعا لسه باخد مصروف بس عادى ولا بتفرق اصل مبقاش فى دم

طبعا صحيت العصر  اليوم ده عشان ده يوم تاريخى فى حياتى الشخصية,وطبعا بعد ما خدت المصروف وشيلت منه فلوس النت والكيف ومعجون السنان وشحن الموبيل يدوبك اتفضل تمن خروج وكام يوم على القهوة

ونزلت كلمت بنت اتعرفت عليها جديد على النت واتفقت على خروجة,انا بتمنى وادعى متطلعش زى اللى قبلها شبه شريك(شريك ده وحش فى فيلم كارتون) والله شريك امور عنها يالله الله يحرقها مطرح ما راحت

واستحمت لزوم الخروجة,بس انا بستحما بشكل دورى عشان محدش يفهم غلط بس المرة دى كنت بستحما بنية الخروج, ولبست ونزلت وعلى الكافيه روحت وفضلت مستنى واخيرا جت  يعنى احسن من الفاتت شوية بس عايز تخس  كام كيلو ودفعت كل اللى معايا وقمت

ورجعتى لحبيبى الوحيد الشارع

لغاية الفجر وبما انى كنتى فايق قررت اصلى الفجر النهاردة عشان ربنا يسترها معانا

ورجعت تانى للسرير

اليوم الخامس

صحيت المغرب وبدات يوم بالرياضة اقصد النسكافيه وكان عندى صداع رهيب معرفش مين ايه ده العيب الوحيد للسهر طول الليل انك بتصحى مدروخ ومش شايف قدامك

بس نزلت الشارع برضه احنا شباب لاتعرف المستحيل اصلا يعنى لا صداع ولا غيره يفرق معانا ودفعت نصيبى فى الحشيش وراح الدليير يجيب لنا وجه بالسلامة وبركة دعوتنا ان ربنا يستر طريق ويبعدعنه ولاد الحرام يووه قصدى البوليس وطلعنا خربنا كالمعتاد بس الغريب ان احنا باقنا خربانين خلقة من غير حتى ما نشرب حاجة

ونزلت الفجر ومكانش ينفع اصلى وبعدين انا صليت امبارح واخيرا رجعت للسرير

بكل موضوعية وبعيد عن الهتيفة اللى انت جميعهم حواليك انا مبحبكش ياريس ومش انا لوحدى دول ملايين برضه مبتحبكش ياريس,بس انا هتكلم عن نفسى بس ونفسى برضه مبتحبكش ياريس وانشاء الله اموت قتيل او اخش المعتقل وايهههههههههههههههههههههههههههههههه

مبحبكش ياريس عشان كل الغلابة اللى فى مصر اللى مش لاقين لقمة العيش وعشان كل المرضى اللى بيموت عشان العلاج مش موجود او فاسد مبتفرقش كتيررر

مبحبكش يا ريس عشان  كام مليون عاطل قاعدين ايديهم على خدهم زى الولايا ,مبحبكش عشان كل شباب مصر دلوتى بقوا مدمنين بيشربوا عشان ينسوا

مبحبكش ياريس عشان سجونك ومعتقلاتك اللى مليانة ناس كل ذنبهم انهم بيبحبوا مصر,وعشان كلابك اللى سيبهم يجيبوا من الرجلين

مبحبكش ياريس عشان نظام تعليم فاشل ابتدئى واعدادى وثانوى وجامعة وحتى اللى بيعملوا الدكتورة من اوله الاخره,بتخلى الطلاب تتنحر وهما لسه شباب فى زهرة عمرهم

مبحبكش ياريس عشان العبارات اللى بتغرق وعشان القطارات اللى بتخرج من القضيب وعشان البيوت اللى بتولع على راس اصحابها وهما نايمين

مبحبكش ياريس عشان المصرى اللى كرامته اتهانت فى الغربة, عشان المصرى اللى اضرب فى السودان وعشان غيره وغيره وغيره وغيره ناس ياما

مبحبكش ياريس عشان الشباب اللى بيغرق وهو بيحلم يهجى بره البلد ,وعشان كل البلد اللى عايزة تسيبلك البلد

مبحبكش ياريس عشان الدعم اللى مبيوصلش,وعشان المعونة اللى مابتبانش وعشان اقتصادنا اللى ما بيتنعش

مبحكبش ياريس وانا عارف ان معتقلاتك مفتوحة

مبحكبش ياريس وانا عارف ان اسباب الموت كتيرررة

بس مبحبكش انشاء الله اموت اقتيل اواخش المعتقل

وايهههههههههههههههههههههههههههههههههههههههههههه

وانا نايم وبحلم وركزوا اووووى فى كلمة بحلم دى

شوفت ظابط ماسك واحد ونازل فيه تلطيش وشلاليت واقلام وضرب لسه مخترعوش ليه اسم ,قولت بس الواد ده حرامى والظابط مسكه بس شكله كان محترم  مش شبه الحرامية قولت بس ده تاجر مخدرات بس برضه شكل مكانش شبهم وبعدين قولت جاسوس وعجبتنى الفكرة قوووى ما هو مش معقول ظابط مصرى هيضرب واحد مصرى زيه يعنى كل الضرب ده الا لو كان جاسوس

فاروحت لظابط بقوله فى ايه يا باشا قالى ملكش دعوة ياروح امك قولت ده الواد جاسوس جاسوس يعنى, والظابط قام واخد الجاسوس على البوكس  ومشى

قولت لما اروح وراه اشوف كده هيعملوا ايه ما الحلم بتاعى وانا حر فيه بقه

وروحت على القسم ودخلت على المامور وقولتله عايز اشوف الجاسوس قالى جاسوس ايه ياض انت شارب حاجة ولا ايه؟ قولت فى سر بيعمل ناصح شغل بوليس بقه, المهم حكيتله الحكاية ام ضحك وقالى يالا ياض يا ابن ال….. من هنا بدل ما احطك فى الحجز

ولغاية هنا مستحملش قمت مزعق معاه قولت لا ده الحلم بتاعى عليا الطلاق اصحى من النوم واقفل ليكوا القسم ده

خاف منى وقالى بس متزعليش طيب وضحك ضحكة مطمنش وقالى انا هوديك ليه؟ واما منادى على واحد اسمه عطية ولغاية قبل ما اشوفه كنت فاكر اسم عطية ده بتاع البنى ادمين و بس واكتشفت ان العفاريت كمان بتسميه اصل اللى جه مكانش بنى ادم بحال من الاحوال

وشاور عليا المامور وقال الحجز ومن غير ما يكمل لقيت نفسى متعلق من قفيا ويا عطية يهديك يرضيك انا مش مجرم انا صاحب الحلم قالى البيه مجاليش يا عم صلى على النبى اى حاجة مفيش فايدة ولقيت نفسى بدحرج لغاية مبقيت جوه الحجز انا عرفت انه الحجز بالويم مكانش فى يافطة يعنى بس شكله كان شبه السجن فى الافلام القديمة بس مكانش نضيف وفاضى زى الافلام

واقعدت ادور على الجاسوس للغاية ما لقيته وقمت شتمه قولته الله يخرب بيتك مدوخنى وراك ,انت لازم يعدموك يا جاسوس يا ابن ال…… وهاتك يا قلة ادب

لقيته شكله غلبان كده وقعد يعيط فصعب عليا قولت لما اساله ايه الحكاية؟؟ قالى وياريته ماقال اتريه كان رايح ينتخب فى انتخابات الشورى  بس عضو غير الوطنى  وقعدت اعيط جنبه

وصدق صلاح جاهين لما قال

انا كل   يوم   أسمع …….. فلان  عذبوه
أسرح     في    بغداد و الجزاير   واتوه
ما أعجبش م اللي يطيق بجسمه العذاب