المصري الجديد

انا عيان والكمبيوتر بتاعى عيان وامى عندها برد واخوايا كمان  مش عارف ادعى على مين

هدعى على الظالم والمفترى وابن الحرام

بعتذر للجماعة بتوع بنحب مصر ومش هنسافر و ومش هنموت وكده,عشان انا قررت فى اقرب فرصة هسافر او هموت وهسيب البلد لاهلها اللى انا وانتوا مش منهم وفارضين نفسنا عليهم هسيبها ليهم يشبعوا بيها انشاء الله حتى يقلبوها سوبر ماركت ده لو كانت لسه متقلبتش اصلا

ومش هرجع تانى لمصر وهعيش فى بلد جديد بكرامتى موفورة وقفايا متصان  بعيد عن ايد اللهم احفظنا رجال الشرطة الابرار,وهشتغل يعنى هلاقيه شغل واشتغل وشوية شوية هكبر فى الشغل ومين عارف يمكن ربنا يكرمنى واتجوز طبعا

انا عارف ان مفيش شاب فى مصر بيحلم انه يتجوز لان حتى الاحلام ليها حدود وفى مصر الواحد يحلم انه يتغد لحمة اول الشهر مثلا او يتعشى بره كده مثلا,ومحتمل يبقى عندى شقة تمليك مش ايجار جديد يا سلام هى دى العيشة

بس اسافر الاول

حتى مفيش نفس للكتابة الله يخرب بيت اللى كان السبب ويجحمه فى جهنم

معرفش المشكلة فى مصرنا الحبيبة ايه بالظبط ,مشكلة اقتصادية ولا سياسية واجتماعية بس اى حد هيبص يتامل هيلاقى ان المشكلة فى مصر سياسية اجتماعية اقتصادية كنغولية هندية صومالية وده طبعا عشان مصر ام الدنيا المشكلة فى مصر ان مفيش مشكلة اصلا بس الشعب الفاضى وجرايد المعارضة وكام واحد صايع زى هما اللى عاملين المشكلة وبيقلوا ان فى مشكلة

يعنى مثلا المدونات كلها اتقلبات عشان عمليات التعذيب اللى بتحصل فى الاقسام المصرية (ولا للتعذيب وحاجات كده) وخصوصا الوعى المصرى ,الناس دى متعرفش ان  فى دولة اوربية اربع عساكر اغتصبوا واحدة وصحيح الاربعة دول اتفصلوا من الخدمة واتحاكموا وصحيح وزير الدخلية بتاعهم استقال ,صحيح احنا الوزير بتاعنا مستقلش ولا عمره هيعملها وصحيح الظابط متحاكميش غير بطلوع الروح وغالبا فى راى الشخصى هياخد براة عشان وانا  كمان شاهد انه برئ براة زليخة من اغواء يوسف عليه السلام

ايه يعنى لما كل كام شهر يتقلب قطر ولا تغرق باخرة ويروح فيها كام واحد غلبان عندهم عيال ومش لاقين ياكلوا ده فى امريكا اللى هى امريكا وكلنا طبعا عارفين امريكا يعنى سوبرمان وتوم وجيرى ورامبوا ,بتحصل عندها كوراث طبيعية بالهبل كل شوية حريق غابات وعواصف بطير البيوت ,واليابان يعنى البلاستشن والذى منه كل كام دقيقة زلزل وبيفطروا على بركان ,وبعدين انا عرفت من مصدر غير موثق منه ان حكومة مصر بتعمل كده مخصوص عشان خاطر العين اللى هى فلقت الحجر ,يعنى الامريكان ولا اليابانين لما يشوفوا مصر كده من غير قطارات عمال تتقلب وبواخر بتغرق شوف هيشتاغلوا قر وحقد والناس دول نفسيتهم وحشة,عشان كده بتعمل الحكومات المتتالية فى مصر على وجود حوادث من الانواع دى على طول وباستمرار

ايه يعنى لما الرئيس بقالوا اكتر من ربع قرن رئيس وغصب عننا وهيفضل رئيس  برضه غصب عننا,دانا اسمع ان زمان الرئيس ايام الفراعنة اللى هو فرعون يعنى كان بيفضل يحكم يجى 500 سنة ولا ايه كمان كان بيخلوه اله وانتوا زعلانين على ربع قرن وكام سنة ومن غير تاليه يا عالم اتقوا الله

ايه يعنى لما كام مليون شاب متخرجين من جامعات وقاعدين مش لاقين شغل ,ده فى المريخ وفى بولتوا ودول كواكب جيرننا فى المجموعة الشمسية كل سكانهم عطلين عن العمل وبيروحوا الخليخ بتاع المريخ ويسافروا على اوربا بتاعت بولتوا وبرضه مفيش شغل ,ده كمان اللى اكتر من كده ان مفيش سكان لا فى المريخ ولا بولتوا

ولا ايه المشكلة لما الفساد يبقى مغلف البلد كلها ده حتى ينفع فى الدعاية للسياحة مثلا ممكن نقول زورا مصر بلد بطعم الفساد,وبعدين مش مشكلة يعنى لما تروح تطلع رخصة لما تفتح مخك وتدفعلك 500 جنيه ولا لما تروح تخلص ورقك من اى مصلحة حكومية وتفتح مخك وتوسع ذمتك وتطلع محفظتك وتدفع اللى فيه النصيب  , ايه المشكلة فى كده انت بذمتك لما بتروح السوبر ماركت او حتى عند عم حسين البقال مش بتدفع فلوس قبل ما تاخد الشيبسى ولا الحاجة ساقعة ولا حلو للشيبسى والحاجة ساقعة ومش حلو للمصلحة المهمة

كلمة اخيرة هقولها للناس اللى بتقول ان مصر فيها مشاكل ياعالم اتقوا الله

 مفيش زى مصر هما ما سمهوش ام الدنيا من فراغ

وانا قاعد فاضى والفراغ واخد كل وقت قلت اهرب منه شوية واسرح واتخيل الدنيا هتبقى عاملة ازاى سنة 3000

فى مصر 

اصل انا فى الحقيقة مبعملش حاجة غير انى بتخيل وبسرح واشياء من هذا القبيل

اول حاجة عملتها فتحت التليفزيون وتليفزيون سنة 3000 مختلف عن تليفزيونا ت دلوتى كتيرررر جدا  اول حاجة مفهوش ولا قناة  يعنى مفيش ريموت انت تفتح التليفزيون وهو يقلب حسب الحالة المزاجية بتاعتك

ولقيت ماتش كورة شغال كاس العالم يارجالة  والاغرب والاعجب مصر بتلعب  طبعا عملت زى ابوتريكة وسجدت شكرا لله , وبعدين لقيت المعلق بيقول ان رغم هزيمة مصر للماتشات اللى لعبتها الا انها يكفيها شرفا انها وصلت لكاس العالم وطبعا هى وصلت لكاس العالم بصفتها الدولة المستضيفة!!!!!ه

لغاية هنا ومستحملتش قولت لما انزل الشارع اشوف الدنيا فيها دى سنة 3000 والجو تحفة ,اول حاجة خدت بالى منها ان الشوراع نضيفة وهادية ومفيش غير كام واحد بس اللى فى الشارع قولت بس ده اكيد مصر نظمت الاسرة وتعدادها السكانى بقه تمام , وبعدين لقيت واحد ماشى كده وشكله محترم قولت لما اساله  هى البلد فاضية كده ليه ؟؟

بصى ليا باستغراب جامد قولتله معلش اصلى مش من هنا ,رد وقالى اه ماهو باين على هدومك انت من الصومال ؟؟ قولت لا من بلد جنبها المهم فين الناس  قالى اصل ممنوع حد يمشى فى الشارع من بعد العصر واستغربت جدا وقولتله ليه كده قالى يوووه ده تطبيق لقانون الارهاب بتاع سنة 2007 وبقاله كده اكتر من 20 سنة

الحقيقة مررتى اتفقعت ومستحملتش وسيبت الراجل من غير ولا كلمة ورحت على محل جرايد قولت اجيب جرنال اتسلى فيه لغاية ما ارجع من تخيلى الاغبر ده

ولقيت جرنال كده شكله نضيف وبيلمع اسمه اشطة يا مان, قولت ده شكله جرنال عسل واول ما فتحته لقيت عادل الصغير ابن سعد الصغير بيغنى للبقر  بس اغنية تحفة الحقيقة

حتة من الاغنية(يا حلو يا بقرة يا مدلعة يا حلوتك بفتيك او على المسقعة)واكتفيت بهذا القدر من الاغنية خصوصا انى جالى حموضة وقلبت على صفحة اللى بعدها

اخيرا لقيت خبر يفرح بالبنط العريض اخيرا عملوها الابطال وحرروا القدس من الاوغاد وهنا مقدرتش امسك نفسى ورقصت من الفرح ورجعت بسرعة للجرنال عشان اكتشف انا كنت برقص ليه

اتارى القدس دى طلعت ديكسوا ونايت كلوب فى شارع الهرم وكان فى كام واد عملين بلطجة ومش راضين يخروجوا ولا يدفعوا الحساب

واتارى المصريين نسيوا القدس عاصمة فلسطين من يجى خمسين سنة

ورجعت على البيت تانى خوفا من السجن خصوصا  ان فى حظر تجول وفتحت التليفزيون وقفلت التليفزيون

وقمت دخلت على النت ماهو برضه فى نت بس كان برضه بطئ يظهر الناس اللى معايا على الشبكة برضه

 فى سنة 3000 بيعملو دونلود,مش مهم فتحت موقع اخبارى لقيت الرئيس هيثم جمال مبارك يهنئ الشعب المصرى بعيد الكوسة الجديد, وده عيد مصرى خالص موجود من ايام الفراعنة

ولغاية هنا ولقيت النت فصل فكان لازم ارجع من التخيل بتاع للفراغ من جديد