المصري الجديد

فى الاول لازم اعتذر عن احباطى ويأسى اللى لازمنى الفترة اللى فاتت وكل عذرى انى بشرا بغلط وبتوب عن  اخطاء….وشكرا

ثانيا بالصدفة كنت موجودة فى نقابة الصحفيين يوم الاحد ولقيت مظاهرة على الضيق عشان الافراج عن الصحفيين المحتجزيين ولقيت اسم محمد الطاهر وانا مش عارف محمد الطاهر صاحب مدونة مصرى واخد على قفاه ولا واحد تانى وانا اسف فى التعبير بس هى فعلا كانت ع الضيق وجبت من شوية  صور وفيديوهات

واضح طبعا ان العدد كان قليل بس صوتهم كان عالى ومسموع

وده واحد شايل لوحة مرسومة عليها حبيب العادلى وبيقول الجزار او حاجة كده مش فاكر الحقيقة

واضح طبعا انهم كانوا قلة ووكان لكل واحد منهم عسكرى امن مركزى واقف  وزيادة كمان

عساكر الامن المركزى واقفين وكمان فى واحد فى وسط الصورة بتاع مرور ملقاش حاجة يعملها جه واقف من بتوع الامن المركزى لابس برتقانى فى اخر الصورة

رغم عجزه الا انه رفض النكوص والقاعدة فى البيت زى الولايا وجه يطالب بالافراج عن الصحفيين المحتجزين

راجل عجوز فى عمر ولدى وبرضه كان واقف وبيدعى على الظالم باعلى صوته ربنا يديله الصحة

ودول حبيبنا الحلوين كانوا قاعدين الناحية التانية من الشارع بيتفرجوا ع وطبعا مش عجبهم

المهم انا موبيلى كان هيفصل شحن وكمان الحقيقة خوفت جدا يبدوا الضرب وكده فخدتها من قصيرها ومسيت وانا ماشى فى طلعت حرب بالصدفة سمعت واحد بيقول التانى منه لله جوزيه هو اللى عمل فى الاهلى كده وحرق لينا دمنا  الحقيقة ملقتيش حاجة غير ان اقوله فعلا منه لله بس مش جوزيه انما ….حسبنا الله وهو نعم الوكيل

وده الفيديو لو حد حب يشوفه

http://www.youtube.com/watch?v=VajAXD5fl_Y

بفكر فعليا اقفل المدونة وده ناتج من احساسى التام بالفشل الذريع لا حال البلد هيتعدل ولا انا كلامى هيفرق مع حد

عشان كده المدونة مغلقة لحين اشعار اخر

وشكرا لكل اللى استحمل احباطى وياسى

ياريت اى حد يدخل

 عبرنى وردعليا و بلاش كتر اسية

بكلمة او بتنين وياريت لو يبقوا 100

مصر ماركت اكبر دولة ماركت فى الشرق الاوسط والعالم اجمع وده مش مشروع خيالى زى اللى بنسمع عنهم كل يوم والتانى دى حقيقة البلد اللى كل شئ فيها بيتبع بداء من الذمم والضمائر وحتى كرسى العرش وكله بثمنه

صحيح التعليم بتاعنا اسمه مجانى لكن اى حد بيتعلم بيكع دم قلبه فلوس عشان التعليم مجانى يعنى مثلا فى الثانوية الزفت العامة بيدفع الواحد تقريبا كل شهر 500 جنيه دروس وطبعا الحكومة مش مسئولة لان التعليم مجانى وهى مضربتش حد على ايده وقالتله خد درس ,وتيجى بعد كل ده متلقيش مكان فى جامعة محترمة الا بقرشك عشان التعليم مجانى ,لما تخش المدرج فى الجامعة تلاقى اكتر من 1000 طالب متتخضش عشان انت بتتعلم ببلاش

اما لو كنت ابن ناس ومعاك قرشين ومش وش مرمطة وبهدلة عليك وعلى الجامعات الخاصة وكل برغوث على قد دمه وكل ده عشان التعليم مجانى

وكذلك برضه العلاج مجانى فى المستشفيات الحكومية ,ايوة انت هتخش عيان بمرض واحد وهتخرج عيان ب300 مرض بس ده مش مهم,لان اهم حاجة المجانية وغير كده كمان ممكن المستشفى تديك مقص ولا فوطة هداية وعشان تضمن انك مش هتبيع الهداية الغالية دى تحطها فى بطنك وتخيط عليها ,يعنى وغالبا العنبر هيبقى فلا اكتر من 7 او 8 سراير عشان مفيش احسن من اللامة خصوصا انها مجانية

اما لو كنت ابن ناس ومش وش بهدلة ومرمطة عليك وعلى المستشيفات الخاصة وكل برغوث على قد دمه عشان فى مصر العلاج مجانى

دى الحاجات المجانية اما بقى الحاجت المدعومة فحدث ولا حرج

رغيف العيش ابو شلن الله اعلم لسه موجود ولا اختفى بس على العموم انا هتكلم على اخر مرة شوفته فيها ,كان اسمر زى اغلب المصريين وهزيل زيهم بحيث انك لو شوفته تحس انه فعلا مولود فى مصر وغنى بالمعادن زى الممسامير مثلا وغنى بمواد البناء من طوب وزلط لزوم بناء الجسم السليم بس احلى حاجة فى موضوع الرغيف غير انه مدعومة انه مش بيقتل زى القطارات والبواخر,ودى ميزة الحاجات النص مدعومة

وطبعا بعد الاكل لازم نذكر الشرب والمياه الجميل البيضة ام كلور اللى بتنزل من الحنفيات جميلة بشكل وطبعا الكلور ده عشان يقتل الميكروبات اللى جوه بطن المصريين اللى بتنتج عن الاكل والهواء الفاسدين وحاشا لله انى اقولى ان المياه فاسدة صحيح فيها نسبة كلور اكتر من اللازم وغالبا هتسبب بعض الامراض والاوجاع بس محدش يقدر يقول انها فاسدة,وكمان تسعيرتها غليت عشان الكلور الزيادة ده مين هيدفع ثمنه ؟ واللى مش عجبه يشترى مياه معدنية  ويخسر  فرق الكلور اللى الحكومة بتقدمه مجانا او مدعوم

الحقيقة الكهرباء مفيش منها مشاكل تذكر غير زيادة سعرها بشكل جنونى فى بعض الاحيانا ومش دايما

وانا قاعد مفروس من اللى بيحصل فى مصر  وكل حاجة بتحصل فى مصر تفرس اكتر من اخواتها

والفجر فى سكون الليل لقيت نفسى بسال مصر وبحرقة واقول لها ليه يا مصر لدرجة ان حسيت ان مصر هترد عليا بجد

وفعلا سمعت صوت بيرد عليا ويقولى نام يا اهبل

ليه يا مصر سار حالك مقلوب

عيشتك بقت ضنك وخيرك منهوب

والطيبين فيكى حقهم مسلوب

والحرامية حكمينك بالشوم والطوب

وان حد قال الحق يبات مضروب

او حتى قال لا فى المعتقل محجوب

بقيتى عنوان للظلم والجور فى كل مكان

بعد ما كان النور يملئ ربوعك زمان

والناس مبقاش ليها غير الرحمن

تدعى على الظالم فى كل اذان

مع ان حتى الظلم…..ليه اوان

ومصير الفجر يجى بالخير مليان

والشمس تنشر ضياءها فى كل الوديان

والعدل صوته يطلع ووياه الامان

والمصرى اخيرا يشبع وينام شبعان

يارب يا منان يا خالق الانسان

حلمى ده يتحقق فى يوم من الايام

بما ان حالة البلد والكون يوحى كده ان بكرة العن الف مرة من امبارح وبما ان سعد باشا زغلول قال من يجى 100 سنة مفيش فايدة ومعاه حق وانا ابصم بالعشرة على كده فانا بفكر واقترح لو كان يعنى ممكن اقترح ان احنا نعمل عملية انتحار جماعى مثلا كل الشباب المحبط اليائس اللى زى واللى عدده فى بلدنا الحبيبة بالملايين ينطوا فى النيل بس  فى وقت واحد مثلا وهو حتى الحكومة ساعتها تستريح منا ومن قرفنا ومش بعيد كمان الحكومة تعمل كشف باسماء الشباب وتبعت تطلبهم للانتحار زى التجنيد كده مثلا

بس ده كده هنطلع على جهنم علطول,نبقى عيشين طول حياتنا فى قرف وكمان لما نموت نطلع على جهنم,لا بلاش ننتحر احنا ممكن نعمل عرايس لعبة كل واحد يعمل عروسة ونروح على النيل برضه فى يوم واحد وكلنا نرمى العرايس دى تعبيرا عن اى حاجة وخلاص,والله انا دلوتى بس عرفت الحكمة من عبارات الموت والقطارات والذى منه عشان كده اليومين دول بدور على واسطة حد يدخل اسم فى اول كارثة ناوية تعملها الحكومة اصلها دلوتى وسايط لما لاقوا الطلب عليها متزايد بقيت وسايط ورشوى

خصوصا ان فى مفيش فرصة سفر مطلقا كل الدول رافعة فى مطارتها عبارة( لا مرحبا بالمصرى) وده طبعا بفضل الحكومة اللى ادركت انها لو معملتش كده هيصحوا فى يوم هيلاقوا البلد فاضية ومتجاب ضولفها عشان يحفظوا على الشعب الكئيب ده

حتى الكلام مفكوك وكانى بكتب بالسنغالى مثلا

بس فعلا لو حد ناوى ينتحر يلحق عشان الحكومة من اول 2008 هتعمل ضرايب على الانتحار وعلى الموت عشان محدش يعرف يزوغ