New Egyption (بال o لحد ما تصلحوا حال البلد)
مصر من تانى
مصر من تانى ده كتاب للكاتب الكبير محمود السعدنى لكن انا مش هتكلم على الكتاب انا بس هستعير عنوانه
من قريب حصلت احداث مؤسفة بقالها فترة عمالة تحصل المسلمين والمسحيين فى مصر بيتخنقوا مع بعض و الباقي كل الناس عارفه,مصر اللى من ايام الفراعنة كانت كل قرية ليها اله ومكانش بتحصل فيها فتنة طائفية ولا يحزنون وغالبا السبب ان مكانش فيه حد بيشعلل الفتنة دى بغض النظر عن الحد ده مين لكن محدش يقدر ينكر انه موجود
وبعدين لما الفتح الاسلامى جه مصر وبقيت اسلامية كان رسول الله صلى الله عليه وسلم موصى باقباط مصر وفى نفس الوقت كان لسه الورع الدينى موجود عند الناس وطبعا مكانش فى نفس الشخص اللى بيشعلل الفتنة واللى محدش يقدر ينكر انه موجود
وببرضه لما كانوا اليهود موجودين ودول يهود ملهموش لا عهد ولادين وكانوا المسيحين والمسلمين عايشين مكانتش بتحصل الفتنة عشان مكانش موجود نفس الشخص اللى بيشعلل الفتنة
اللى بيرمى الطوبة على الكنيسة واللى بيشتم امام الجامع واللى واللى واللى
ودلوقتى على المستوى الشخصى انا مش حاسس ان ف مصر حد مسلم وحد مسيحى ومش هقعد احكي عن الفرن اللى احنا بنجيب منوا الفينو واقوله انه مسيحى ولا هحكى عن صاحبى رومانى اللى برضه مسيحى ولا عن الشباب اللى عملوا حدثة بالعربية وكل الناس اللى كانوا واقفين ساعدهم من غير ما يعرفوا انهم مسحيين ومش هحكى عن الترزى المسيحى اللى ابويا مش بيقوم من عنده ومش هحكى عن المسيحى اللى مات وهو بينقذ اسرة جاره المسلم فى عمارة وقعت من كام سنة
هحكى حاجة بسيطة جدا عن واحد كان راكب جنبى الميكروباص وكان مسيحى وقعدنا طول الطريق نضحك ونهزر مع بعض من غير ما يعرف انى مسلم اواعرف انه مسيحى ونزلنا المحطة وجات ناس تتخنق معايا وفجاة ملقاتش حد واقف جنبى غيرى المسيحى ده اللى انا معرفش اسمه ايه لغاية دلوتى
هتفتكروا ممكن فى يوم من الايام ارفع ايدى واورفع سلاح على شخص وقف جنبى فى زنقة قبل كده,الحقيقة انه ممكن لما حد يشعللها بره عشان يشوفها ولعة
وفى الاخر هتفضل مصر هى مصر اللى مسلم والمسيحى فيها بيكلوا على طبلية واحدة رغم انف الحاقدين
نقلا من جريدة الاهالى
