نصائح مفيدة للعيد
دول شوية نصائح عصارة افكارى وخبرة 21 سنة فى مصر بقدمها ليكم على الجاهز لعل وعسى حد يستفيد منها
اول حاجة نبدا من يوم الوقفة بعد ما تفطروا كده وتقضوا يومكوا وتنزلوا عشان تخربوها فى الواقفة كل انواع المخدارت والخمور متاحة واطمنوا مفيش توجد امنى البوليس عارف ان بكرة عيد وهيسيبوا الناس تتبسط
بعد ما تخرب وماتبقش دارى بحاجة لو حبيت تروح سينما بلاش سينما وسط البلد عشان هتبقى زحمة جدا واستنضف وخش سينما من الغالية , وطبعا لازم تحجز من الحفلة اللى قبلها عشان برضه هتكون زحمة وبعد ماتخرج من الفيلم اللى غالبا هيكون هابط زى كل الافلام فى مصر وخصوصا فى العيد ممكن تتعشا او تفطر حسب الحفلة اللى انت كنت حاجزها وبرضه اطمنك ان كل مطاعم التيك اواى هتكون فاتحة ومستنياك
وانت رايح تصلى العيد -ده لو هتروح- خد معاك مصلية عشان مش هتلاقى مكان فوق السجاد تصلى عليه وكمان تخلى بالك من شبشك وتخلى عينك عليه ,وتحاول تنقى مكان جنب الباب عشان اول ما الصلاة تخلص تكون اول واحد فى الشارع قبل الزحمة ما تخنقك ومتعرفش تخرج من الباب
لو هتخرج بالنهار (هذا الجزء مخصص للعائلات)وطبعا مفيش شباب بتخرج فى النهار اسهل وسيلة موصلات هى المترو والدنيا هتكون زحمة بغباء وابعد عن الجناين عشان هتكون مزروعة فسيخ وانا مش بحبه وكمان متحاولش تقرب من النيل ولو روحت الملاهى هتكون زحمة جدا ومش هتعرف تركب نص اللعب ولا روحت الهرم مش هيرضوا يدخلكوا عشان انت مصرى وطبعا السينما برضه هتكون زحمة وفظيعة ومش هتعرف تقطع تذاكر اصلا والدخول والخروج هيكون ببهدلة فاحسنلك تصلى العيد وتروح تتفرج على التليفزيون
لو هتخرج بعد العصر ابعد عن مناطق التحرشات وهى المنطة الشمالية والمنطقة الجنوبية والمنطقة الوسطة خصوصا مناطق التواجد الامنى الكثيف,وابعد عن الشر وغنى له ومتحاولش تسال اى فرد فى البوليس عن اى حاجة عشان بيكون صعبان عليهم انك بتعيد وهما لا عن تجربة شخصية وهيعملك بشكل زبالة فوق المعتاد ولو هتخرج العصر احلى حاجة تعملها انك تتغدا بره وتروح علطول
هام جدا للسادة محبى الفسيخ والرنجة وباقى الانواع المملحة متفتروش فى اكل الحاجات دى عشان غالبا نص اللى فى السوق فاسد ومنتهى الصلاحية زى كل عيد واللى هتعرفوا بعد العيد ما يخلص ان الحكومة اعدمت كل الفسيخ الفاسد ماعدا اللى انتوا كلتوه بس وياريت تكتروا البصل والليمون فى محاولة يائسة للحد من الخطورة
اما الناس اللى قضوها فى الواقفة ولسه صاحيين من النوم دلوتى فبعد مايفطروا ويتغدوا ويتجهوا للشارع هيقضوها زى الوقفة بالظبط
ونصيحة اخيرة محدش يحاول يخرج او ياكل او يشرب فى العيد ومحدش يسالنى ليه
وفى النهاية كل سنة وانتوا طيبين وعيد سعيد انشاء الله
شكرااااا ع النصااايح الجمدة دى يا مان
وشكلك مجرب وعارف
سلام
Comment by واحد وخلاص — @
على فكرة أفضل وسيلة لتمضية العيد بجد هى النوووووم فى العسل قصدى السرير وكل عيد وأنتم بخير يا عسل
Comment by anoga — @
الاسلووب سلس ومريح وانا بصراحة عاوز استفسر منك على حكاية النصيحة ان محدش ياكل او يشرب فى العيد . اصل كلام فى سرك بقالى 7 سنين كل يعنى سبع اعياد من اول يوم لحد ما العيد يخلص بيجيلى اسهال ؟
تفتكر اخد انتيبال ولا فلاجيل
Comment by مشمئز — @
الاخ مشمئز اقترح تكمل صيام فى العيد وتعمل زى عشان الوقاية خيرا من العلاج
Comment by ahmed — @
طبعا بالنصايخ دي الواحد ياخدها من قصيرها وميخرجش من البيت اصلا ولا ياكل غير أكل بيتي بعيدا عن الاسماك طبعا..دا أيه العيد الجامد دا.
بس الصراحة تتقال عندك حق في كل الكلام دا واهو في العيد بالذات يتطبق المثل بتاع من خرج من داره اتقل مقداره.
عيد سعيد بئا
Comment by Nody — @
و دا إن شاء الله أنهي عيد الخنقة .. و لاّ علي رأيك هو أصلا الواحد مبيعرفش يعيد من زمان أصلاً
Comment by الدائخ — @
يا سلام علي الكلام الجميل …..لكن ده كان قبل الجواز يا هندزة
دلوقتي الوقفة بقت قعدة عند حماتك او والدتك مليانة كلام مالوش معنى عن الاسعار و الخضار والفنانة كذا عملت كذا و لو ربنا كرمك ولقيت ابوك او حماك صاحي هتبقي القعدة كلها قدام الجزيرة
سيبك انت احلى من الشرف مفيش
Comment by مختوم علي قفاه — @
بعد الجواز مفيش اعياد على ما اسمع عشان كده البوست ده لغير المتزوجين
والله انا نفسى اتجوز ولو مش هعيد حتى
Comment by ahmed — @