انما الامم الاخلاق
فى بيت مشهور جدا لامير الشعراء احمد شوقى بيقول انما الامم الاخلاق ما بقيت فان هما ذهبت اخلاقهم ذهبوا
انا كنت راكب المترو فى يوم وبعدين واحد جاله تليفون وكنا فى محطة السيدة زينب والاقيه بيقول انه فى محطة الزهراء يعنى بعدها بكذا محطة كذب يعنى,يوم تانى انا متاخر على اصحابى واتصلوا بيا قولت لهم قدامى ربع ساعة وانا عارف انى مش هخلص قبل نص ساعة برضه كذبت
ومواقف غيرها كتير كل يوم الواحد فين بيكذب كتيررر جدا لدرجة انى بتهيالى ان كل كلامنا اصبح كدب والكلام الصدق اللى فيه يتعد على الصوابع ,انا مش بتكلم من الناحية الدينية ان الكدب حرام انا غير مؤهل ان اتكلم دينيا لكن باتكلم من الناحية الاخلاقية
تخيل لما انت تكون اب مثلا وحد يتصل بيك فى التليفون وتقول لابنك يقول انك مش هنا انت كده بتزرع جوه اول بذرة عشان يكون كذاب بس انت لو معملتيش كده ابنك هيكبر ويدعى عليك عشان معملتوش الكدب ومش هيعرف يتعامل مع الناس فى مصر
وعلى الدولة بيتهيالى ان الحكومة هى اللى علمت الناس الكدب بعدم الصراحة اللى بيتعملوا بيها معانا مبيقلوش حاجة ابدا وتطلع صح بيخبى عنا كل حاجة وطول الوقت بيقول ان البلد زى الفل ولا غلاء فى الاسعار ومفيش تحرشات ومفيش تعذيب ومفيش اى كلمة صدق بيقولها
انا فى راى كل واحد لازم يبدا بنفسه ولو يوم فى الاسبوع يخليه يوم الصدق ميقولش فيه حاجة كدب ابدا لو على رقبته بس انا طبعا مش هينفع ابدا لان بكل اسى مقدرش اعد يوم كامل من غير ما اكدب خالص الا لو حبست نفسى فى اوضتى اليوم ده وطبعا ده مستحيل عشان كده فككوا من احمد شوقى واشعاره ومنى ومن كلامى الفاضى
وايه اللى هايخليك مش تعرف تطبق يوم الصدق عارف ايه الخوف والجبن قبل ما تبحث عن يوم للصدق أبحث عن يوم للقوة وعدم الخوف
Comment by anoga — @
ههههههههههههههه انت جبت المفيد فى الأخر..فكك منى ومن أحمد شوقى ومن يوم الصدق بتاعك…..هما دول المصريين …. كـــــلام كل إل عندهم كلام وبس…انما التنفيذ والتطبيق على رقبتهم وال يغيظك ان الكلام ده ف الحاجات الحلوة والمفيدة بس انما لو فى حاجة تهييس ولا… اى حاجة تانية تلاقى كله ينفض…وطبعاا انا مش هكلم على كذب الحكومة…لأن ربنـــا بس هو ال بيحاسب الكذابين يعم..انا مـــــالى!!ههههههه يلا سلام
Comment by واحد وخلاص — @
مدونه جميله وشكراً لإضافتي لقائمة أصدقائك وكذلك قمت انا باضافتك لقائمة أصدقائي.
يسرني ان تستخدم الكاريكاتور المنشور في مدونتي في مدونتك ومع تحياتي لك وبالتوفيق.
أخوك فيصل الراشد صاحب مدونة كاريكاتور العرب:
http://arabcaricature.blogspot.com
Comment by AlRashid — @
بص بئا الواحد لو حط مبدأ في حياته أنه ميكدبش مش حيكدب ودا مش كلام وبس والله جربه وأنت تصدق بس المهم الناس تفهم يعني ايه مبدأ وكمان الواحد قبل ما يكدب يحط اودامه ان في ربنا وأنه أكيد حيتكدب عليه زي ما هو بيكدب..الحكومة بئا ياعم تكدب براحتنا مش هما اللي بيأكلونا وبيذلونا كمان هما حرين بئا سيبهم يكدبوا براحتهم
Comment by Nody — @