معلش ولا مواخذة
معلش ولا مواخذة ومكانش قصدى من اكتر الكلمات العربية استخداما فى مصر فى الوقت الحالى واحيانا بنستخدم كلمة واحدة فقط واحيانا التلاتة مجتمعين
تبقى ماشى فى الشارع وتلاقى مياه واسخة بتنزل على راسك مش من السما لكن من البلكونة اللى فوق وتلاقى واحدة بتقولك معلش واحيانا مكانش قصدى, وتكون ماشى فى شارع تانى وتلاقى احد خبطك كتف لكنه مش قانونى بالمرة وعلطول تلاقى لا مواخذة وممكن سورى حسب الشارع اللى انت ماشى فيه والغريب انك متقدرش تعترض ماهو قالك معلش يعنى يقطع نفسه
وتكون واقف فى طابور بقالك سنة مستنى تخلص مصلحة ولا تقطع تذكرة وتلاقى واحد بكل بجاحة داخل على الشباك وبيقول معلش يا جماعة اصلى مستعجل ,ولا اللى خارج من الطابور بيدوس فى اللى وراه وده مش هيقولك معلش الا لو بصيتله نظرة نارية ساعتها بس هيقولك معلش او لامواخذة وبرضه مش هتقدر تتكلم
وامثال كتير جدا احيانا بيتقالك وكتير بنقول معلش ولا مواخدة ومكانش قصدى مع انى اللى اخترع الكلمات دى منه لله مكانش يقصد انها تكون كلمات دارجة بتقل فى اليوم الواحد الف مرة اكتر من السلاموا عليكوا مكانش يقصد انها تكون كلمات مجوفة الواحد بيقولها فى الدقيقة 60 مرة من غير ما تفرق معاه
يعنى معلش كان يقصد بها الاسف والندم على الفعلة اللى انسان عملها من غير قصد او بقصد لكن مين دلوتى وهو بيقول معلش بيحس بالاسف اه نسيت فى ناس بتحس بالاسف بس ان الظروف اجبرتها انها تقول معلش زى الموظف اللى بيتاخر على المدير بتاعه ويضطر يقول معلش
ولا مواخدة زى معلش بس لامواخذة دى تنفع نكت تلاقى واحد هيشتم واحد قريبك صاحبك جارك مثلا وبيستئذانك الاول بكلمة لا مواخذة و طبعا مينفعش تكلمه ما الراجل عده العيب وقالك لامواخذة, يعنى يجى يشتم الشارع بتاعك ويقولك لا مواخذة ده شارع زبالة انا مش فاهم هو هنا خارجك بره الشتيمة ولا انت برضه لامواخذة زبالة
مكانش قصدى الكلمة الالعن والاضل تلاقى واحد عامل حاجة تغيظ ويبص لك بكل براءة ويقولك مكانش قصدى يخبط كباية الشاى السخن ويبهدلك ويقولك مكانش قصدى وحاجات زى كده تجنن بس معلش مكانش قصدى اصلى ليس على انسان حرج
عندى دكتورة فى الجامعة بتقول ولو شيلنا كلمة معلش من قاموسنا اللغوى75% من مشكلنا هتتحل وانا بضيف كلمة مكانش قصدى ونكتة لا مواخذة وبقول ان 30% من مشكلنا هتتحل
وبعدين معلش ومكانش قصدى والله لا مواخذة بئه
لا مواخذة يعنى لما نشيل كلمة معلش من قاموسنا ازاى حنقدر نبرر عدم تحضرنا الحالى
تحياتى
Comment by أحمد الحداد — @
كلمات تطالب بمحيها من قاموس حياتنا ولما نلغيها كي ترضى أصحاب العقول الصماء التى لا تسمع ولا ترى غير نففسها ورأيها معلش هاتقولها لى أصله كان غصب عنى مش قدرت أجى مش كدة
Comment by anoga — @
لو مواخذة انت لسة ما سافرتش انا اخر مرة دخلت علي مدونتك كنت بتدعي علي لو مواخذة الظالم وبتقول لو موخذة انك عاوز تسافر وتسيب البلد
انا لو موخذة في اخر شهر 10 من كل عام بابقي عاوز اطفش لاني باعاني اشد معاناة
اصل لو مواخذة ساكن في مدينة بالقرب من الغيطان وفي الميعاد دة من كل عام بيحرقو قش الارز وطول الليل الدخان مالي الشقة وبابقي لو مؤخذة هموت لدرجة اني باضطر انام وانا جالس وطبعا بنام ساعات قليلة وباحمد ربنا ان الصبح طلع علشان اكمل نومي بعد الدخان ما يكون انتهي لكن لو مواخذا في فرن عيش قريب مني يبدا العمل الساعة السادسة طباحا
ولو مواخذا بيطلع عادم حرق الجاز ويوصل الي الشقة ولو مواخذا ما بعرفش انام برضة
ولو مواخذا انزل الشغل وارجع الساعة 5 واتغدي واقول اروح انام ما انا لو مواخذا ما نمتش من بالليل
لكن يبدا الجامع القريب مني في اذاعة وعظة الشيخ من الساعة السابعة حتي بعد التاسعة وطبعا مش ممكن لو مواخا انام بسبب مكبر الصوت المستخدم لان الصوت بيكون عالي وعندما ينتهي الجامع من التلاوات والوعظة
لو مواخدا اقول اذهب للنوم ولكن يبدا حريق القش
لو مواخذا انا عاوز انامممممممممم في بيئة لو مواخذا نظيفة
Comment by ابن بسطا — @
ابن بسطا يبقى انت لا مواخذة اكيد فى مصر
وبعدين فى دراسة بتقول ان الانسان ممكن ينام تلت ساعة فى اليوم بس وانا والله العظيم بقالى اكتر من 24 ساعة منمتش من غير قش ولا فرن ولا جامع
Comment by ahmed — @
ياعم مدونة زى الفل وتوبكاتك زى العسل بس رسالة اهلا مرحب دى *******خلتنى امل واخرج شيل الخرة دة ابوس ايدك
Comment by ب***** ممششة — @
انا شلتلك اهلا مع السلام يا عم المشمشى بس بلاش شتيمة لو سمحت
Comment by ahmed — @