المصري الجديد

تصورو الاهلى اتغلب فى استاد القاهرة والكاس ضاعت مننا  والواحد اعصابه اتحرقت وقعد يسب ويلعن ولغاية دلوتى مجلس ادارة الاهلى بيجمع الادلة عشان يثبت ان الحكم كان متواطئ ,الاهلى الحاجة الوحيدة اللى بتفرح الناس فى مصر اتغلب بس لو فاكر ان الكلام اللى جاااى فى الكورة تبقى غلطان

وقفت كتير جدا قدم جملة  الاهلى هو  الحاجة الوحيدة اللى تفرح فى مصر وان كان يبان لاول وهلة ان الكلام ده صح بس دى مش الحقيقة ولو دى الحقيقة تبقى مصيبة, يعنى اذا كان الاهلى اللى بيفرح ده لا بيحل مشكلة بطالة ولا بياكل ولا بيشرب حد ومع ذلك هو اللى بيفرح الناس ده هيوصل بينا لنتيجة مرعبة معناه ان مفيش مصر اصلا  انا اهلوى على فكرة بس الحق حبيب الله

محدش يقدر ينكر ان الوضع فى مصر بيزداد سوء بس مش لدرجة انه تعتبر نكسة زى نكسة 67 هزيمة الاهلى فى النهائى مش لدرجة ان 50 مليون من السبعين على الاقل شايفنا ان خسارة النهائى اصعب بكتير من حادثة العبارة اللى مات فيها 1000 انسان وحزن فيها اكتر من 1000 اسرة بس طبعا الاهلى اهم

وبعدين فعلا يعنى الكاس الافريقى المسماة بالعروسة الافريفية ولا مثلا لا قدر الله واحد مصرى ياخد جايزة نوبل طبعا بدون شك الكاس لان الكاس دى هياخدها فريق 11 واحد غير الاحتياطى لكن نوبل هياخدها واحد بس و الكترة تغلب الشجاعة

من كام سنة مش كتير يعنى بعد ما د.احمد زويل خد الجايزة كان جاااى مصر زيارة وفى نفس اليوم كان محمد عطية راجع من ستار اكاديمى باللقب الغالى اللى شرف به كل المصريين وطلع الاول  وعشان كده ادارة المطار فتحت قاعة كبار الزور لمحمد عطية والدكتور زويل وقف فى الجوازات مستنى دوره واكتر من 1000 مصرى هايف راحوا يستقبلوا محمد عطية والدكتور زويل كان واقف يدور على تاكسى

وعندى واحد صاحبى عصبى حبة اهون عنده انك تغلط فى اية قرانية ولا تغلط فى سى تامر حسنى الحبسجى قدوة شباب مصر والوطن العربى اللى بيمثل لا مواخدة بالبوكسر

يعنى نقدر نقول ان الاهلى ومحمد عطية وتامر حسنى هما دول الحاجات الوحيدة اللى تفرح فى مصر 

معرفش ايه السبب فى حالة انحدار الوعى والثقافة عند النس معرفش ليه بقى انك تشوف كليب لدانا احسن بكتير من انك تقراء كتاب ومعرفش مين اللى يهمه ان الناس تبقى بالمنظر ده او اعرف بس مش هقول عشان كلنا عارفين

يلله هقول خلاص انا مفيش حاجة اقولها لا معلش فى حاجة تتقال يا امة ضحكت من جهلها الامم

طول ععمرى نفسى ابعت رسالة للريس بس طبعا خايف كلكم عارفين ان الرسالة دى هتبقى هى اللى قتلت صاحبها دانتوا حتى مش هتعرفوا اذا كنت ميت ولا عايش

بس مش مهم انا قررت اكتبها هنا وانا واثق ان الريس مش هيقراها ولا حتى انتوا , يمكن انا مختلف مع الريس فى كل حاجة بس الاختلاف ده عشان خاطر البلد دى وبعدين هو مسئول عنى قدام ربنا  ومسئول قدامى بصفتى مواطن يعنى ممكن اقول اللى انا عايزه براحتى خالص والريس المفروض ميزعلش من النقد طالما نقد بنا

هقوله ياريس من غير مجاملات ونفاق الحاجة كل يوم بتغلى فى البلد الزيت والسكر والسمن والعيش الناس مش لاقينه ياريس عمر بن الخطاب رضى الله عنه قال لو ان دابة فى العراق تعثرت لسؤل عنها عمر والناس فى مصر مش لاقيين اللضة ومحدش بيسال فيهما

ياريس  الشباب كله محبط مفيش شغل ومفيش جواز ومفيش ومفيش ومفيش كله بيحاول يهرب على ايطاليا وياريتهما بينجحوا الا المصيبة بيغرقوا فى البحر , بيسافروا الدول العربية بيتهنوا وبيطلع عينهما  وبيضربوا على قفهم والسفارة والخارجية بينكروا انهم موجودين

ياريس يمكن ناس كتير عمالين يقول ديمقراطية وحرية وانا بنادى وبقول ملوخية  وفر لينا الاكل والشرب والرعاية الصحية والله فى ناس بتعيش على وجبة واحدة فى اليوم وهى لا تسمن ولا تغنى من جوع حتى الفول غلى

ياريس انا نفسى الشعب يحس بمصريته  مش كل واحد بيتمنى يشوفها ولعة بكرة الصبح كانها مش بلدنا كاننا مش ولادها,مش كل واحد لو جت له فرصة هيبعها ويخلع

ونفسى ونفسى ونفسى بس مفيش حاجة هتتحقق صح يا ريس

انا شوفت الدعاء الجميل ده على النت فنقلته هنا وحطت عليه شوية ابداع من عندى عشان يبوظ المهم فى الاخر كله يقول امين

ربنا يبعد عنك الاشرار….. ويجعلك فى كل خطوة دولار

ويبعد عنك ولاد الايه ……..ولا يخيبك خيبة الجنيه

ويجعل اعمالك كلها حسنات….. ويكفيك شر المخالفات

ويحوش عنك كل الشرور …..ويكفيك شر كمين المرور

ويكون لك دايما فى العون….. ويكفيك شر فاتورة التليفون

ويسعدك فى كل حين….. ويكفيك شر المستثمرين

ويجعلك كل الناس حبيايب …..ويبعد عنك بتوع الضرايب

ولا يجعل عيالك محرومة …..ولا يخيبك خيبة الحكومة

وتعيش عيشة هنية …..وتبعد عن المديرية

ويجعل اصحابك كلهم اخلاص …..ويكفيك شر سواقين الميكروباص

يحميك يابنى من ابليس….. ويكفيك شر سواقين الجيش والبوليس

وينور طريقك بالبركات …..ويبعدك عن العبارات و القطارات

ويحميك من كل رزية ……ويكفيك شر المطبات المستخبية

بدعيلك وبدعى لاولادى…… يكفيكم شر الركود الاقتصادى

ويكتر فى جيوبكم النقدية …….ويكفيكم شر الدروس الخصوصية

ولا يحرمكم من اكل الفول …….ولا يخرب بيتكم بفواتير المحمول

ويرزقك فى كل زمان……. ويبعدك عن كل الاقسام

بدعلك وبقول يارب لا تخش جيش ……ولا تقف فى طابور العيش

وتعيش عيشة السعداء….. اللى فى الكويت او ضرماء

اللهم امين