نفسى يا ريس
طول ععمرى نفسى ابعت رسالة للريس بس طبعا خايف كلكم عارفين ان الرسالة دى هتبقى هى اللى قتلت صاحبها دانتوا حتى مش هتعرفوا اذا كنت ميت ولا عايش
بس مش مهم انا قررت اكتبها هنا وانا واثق ان الريس مش هيقراها ولا حتى انتوا , يمكن انا مختلف مع الريس فى كل حاجة بس الاختلاف ده عشان خاطر البلد دى وبعدين هو مسئول عنى قدام ربنا ومسئول قدامى بصفتى مواطن يعنى ممكن اقول اللى انا عايزه براحتى خالص والريس المفروض ميزعلش من النقد طالما نقد بنا
هقوله ياريس من غير مجاملات ونفاق الحاجة كل يوم بتغلى فى البلد الزيت والسكر والسمن والعيش الناس مش لاقينه ياريس عمر بن الخطاب رضى الله عنه قال لو ان دابة فى العراق تعثرت لسؤل عنها عمر والناس فى مصر مش لاقيين اللضة ومحدش بيسال فيهما
ياريس الشباب كله محبط مفيش شغل ومفيش جواز ومفيش ومفيش ومفيش كله بيحاول يهرب على ايطاليا وياريتهما بينجحوا الا المصيبة بيغرقوا فى البحر , بيسافروا الدول العربية بيتهنوا وبيطلع عينهما وبيضربوا على قفهم والسفارة والخارجية بينكروا انهم موجودين
ياريس يمكن ناس كتير عمالين يقول ديمقراطية وحرية وانا بنادى وبقول ملوخية وفر لينا الاكل والشرب والرعاية الصحية والله فى ناس بتعيش على وجبة واحدة فى اليوم وهى لا تسمن ولا تغنى من جوع حتى الفول غلى
ياريس انا نفسى الشعب يحس بمصريته مش كل واحد بيتمنى يشوفها ولعة بكرة الصبح كانها مش بلدنا كاننا مش ولادها,مش كل واحد لو جت له فرصة هيبعها ويخلع
ونفسى ونفسى ونفسى بس مفيش حاجة هتتحقق صح يا ريس
انا استجبت لدعوتك للمدونين بزيارة مدونتك
عجبني الموضوع الأول والتاني ولقيت نفسي بقرأ معظم ما دونت حضرتك
اسلوبك سلس وجميل وعندك موهبة وافكار حلوة
واكتر ما يميزك انك بتتكلم ببساطة مش تعقد الأمور او تسفها
دمت بخير واعتبرني صديقة دائمة للمدونة
أم المييس
www.omelmees.blogspot.com
Comment by Om El MEeeEs — @
كنت اساله هيقول لربنا ايه
صدقني رسالتك هي رسالتنا كلنا
رسالة شعب مصر من اوله لاخره شعب شايف ظلال واشباح الضياع والخوف والموت مظللة عليه من كل الجوانب واصبح في صراع رهيب داخل نفسه اعيش ولا احب بلدي
Comment by بنت الاسلام — @
أحترمت فيك بشدة .. أسلوبك المهذب في الحوار
واضح أن حضرتك إنسان محترم فعلاً
أنت في رسالتك قلت اللي كلنا عايزين نقوله بطريقة بسيطة و جميلة
خالص تحياتي
Comment by علي باب الله — @
اكيد دى رسالتنا كلنا
بس للاسف رساله مالهاش مقرا
تحياتى
Comment by ايمان — @
اخى الفاضل
كل الشكر لك على تواصلك وادعوك لزيارة مدونة الاتحاد وابداء رايك ومشاركتنا الحلم فى تاسيس اتحاد للمدونين المصريين
فى انتظارك
Comment by اتحاد المدونين المصريين — @
الحقيقة انى معجب بمصرية المصريين و بحب كل شاب مصرى بيتكلم بجد و بيفكر بجد علشان بلدنا هى ناسنا و احنا البلد المجموع القاعدة مش الاستثناء و لينا لقاء اخر
Comment by واحد من الناس — @
مش عايز اقول اللى بينفخ فى قربه مقطوعه
لكن اديك بتنفس عن اللى جواك و اللى فى نفسك
تحياتى اليك
اول زياره لمدونتك الجميله
ابو مفراح
Comment by ابو مفراح — @
صح يا حبيبى……مفيش حاجة هتتحقق بس احنا مش هنسكت بردو…أدينا بنتكلم وبنعمل ال علينا وخلاص….أهو بنمارس حقنا ف ال ابداء الرأى طبقا للنظام الديمقراطى المتفشى ف البلد….كفاية كده…….سلام
Comment by واحد وخلاص — @
ياراجل حرام عليك ايه الجمال ده انا انبهرت بمستوى مقالاتك الرائعة وموضوعاتك الجميلة فلك شكر كبير على دعوتك واتمنى تشريفى بزيارة مدونتى طرقعات فجائية
مع خالص تحيات اخوكم
طارق الجيزاوى
Comment by TAREK ELGIZAWY — @
باضم صوتي لصوتك .. بس المهم مين اللي يسمع .. القعدة ع الكرسي 24 سنة بتطرش و تعمي و تموت القلب .. كنت اتمني أكتب كلام متفائل شوية .. لكن مع الأسف .. الدنيا ضلمة و في حد ابن لذينا قاطع الكهربا
Comment by الدائخ — @