الاهلى اتغلب
تصورو الاهلى اتغلب فى استاد القاهرة والكاس ضاعت مننا والواحد اعصابه اتحرقت وقعد يسب ويلعن ولغاية دلوتى مجلس ادارة الاهلى بيجمع الادلة عشان يثبت ان الحكم كان متواطئ ,الاهلى الحاجة الوحيدة اللى بتفرح الناس فى مصر اتغلب بس لو فاكر ان الكلام اللى جاااى فى الكورة تبقى غلطان
وقفت كتير جدا قدم جملة الاهلى هو الحاجة الوحيدة اللى تفرح فى مصر وان كان يبان لاول وهلة ان الكلام ده صح بس دى مش الحقيقة ولو دى الحقيقة تبقى مصيبة, يعنى اذا كان الاهلى اللى بيفرح ده لا بيحل مشكلة بطالة ولا بياكل ولا بيشرب حد ومع ذلك هو اللى بيفرح الناس ده هيوصل بينا لنتيجة مرعبة معناه ان مفيش مصر اصلا انا اهلوى على فكرة بس الحق حبيب الله
محدش يقدر ينكر ان الوضع فى مصر بيزداد سوء بس مش لدرجة انه تعتبر نكسة زى نكسة 67 هزيمة الاهلى فى النهائى مش لدرجة ان 50 مليون من السبعين على الاقل شايفنا ان خسارة النهائى اصعب بكتير من حادثة العبارة اللى مات فيها 1000 انسان وحزن فيها اكتر من 1000 اسرة بس طبعا الاهلى اهم
وبعدين فعلا يعنى الكاس الافريقى المسماة بالعروسة الافريفية ولا مثلا لا قدر الله واحد مصرى ياخد جايزة نوبل طبعا بدون شك الكاس لان الكاس دى هياخدها فريق 11 واحد غير الاحتياطى لكن نوبل هياخدها واحد بس و الكترة تغلب الشجاعة
من كام سنة مش كتير يعنى بعد ما د.احمد زويل خد الجايزة كان جاااى مصر زيارة وفى نفس اليوم كان محمد عطية راجع من ستار اكاديمى باللقب الغالى اللى شرف به كل المصريين وطلع الاول وعشان كده ادارة المطار فتحت قاعة كبار الزور لمحمد عطية والدكتور زويل وقف فى الجوازات مستنى دوره واكتر من 1000 مصرى هايف راحوا يستقبلوا محمد عطية والدكتور زويل كان واقف يدور على تاكسى
وعندى واحد صاحبى عصبى حبة اهون عنده انك تغلط فى اية قرانية ولا تغلط فى سى تامر حسنى الحبسجى قدوة شباب مصر والوطن العربى اللى بيمثل لا مواخدة بالبوكسر
يعنى نقدر نقول ان الاهلى ومحمد عطية وتامر حسنى هما دول الحاجات الوحيدة اللى تفرح فى مصر
معرفش ايه السبب فى حالة انحدار الوعى والثقافة عند النس معرفش ليه بقى انك تشوف كليب لدانا احسن بكتير من انك تقراء كتاب ومعرفش مين اللى يهمه ان الناس تبقى بالمنظر ده او اعرف بس مش هقول عشان كلنا عارفين
يلله هقول خلاص انا مفيش حاجة اقولها لا معلش فى حاجة تتقال يا امة ضحكت من جهلها الامم
والله انا صعبان عليا حال كتير مننا
واللى ممكن نكون انا وانت منهم
متهيالى فى معانى كتييييير اوى انصهرت
ودابت
ياريت نرجع نميز بين الصح والغلط ونفوق من اللا مبالاه اللى احنا فيها دى
تحياتى بوست جيد
Comment by ايمان — @
من كام سنة مش كتير يعنى بعد ما د.احمد زويل خد الجايزة كان جاااى مصر زيارة وفى نفس اليوم كان محمد عطية راجع من ستار اكاديمى باللقب الغالى اللى شرف به كل المصريين وطلع الاول وعشان كده ادارة المطار فتحت قاعة كبار الزور لمحمد عطية والدكتور زويل وقف فى الجوازات مستنى دوره واكتر من 1000 مصرى هايف راحوا يستقبلوا محمد عطية والدكتور زويل كان واقف يدور على تاكسى
عجبنى اوى البراجراف ده
اصلا كلنا للاسف بندور ع التفاهه يسلم ايدك و قلمك و الله
Comment by محمد مارو — @
كلام في الصميم
العلم عندنا لما بقي بالمحسوبية و بالوراثة ( يعني أبن الدكتور الفلاني يمسك معيد .. و لو كان طالع بمادتين ) خلا الناس تفقد إهتماها بالعلم
و خلا العلماء المصريين أغلبهم ناس بطيخة .. واخدين مراكز لا يستحقونها
—
و حتي الفن كمان بقي بالوراثة .. أغلب الممثلين أولادهم بيمثلوا أو بيخرجوا
—
الشعب المصري بقي متفرج علي الأحداث
معاهوش فلوس يشترك في الحدث
و معاهوش علم يغير بيه الحال
—
ده غير البطالة و الأمية و الفقر .. و شياطين أخري
—
علشان كده الشعب بيقبل علي التفاهات بشكل جنوني
لأن ده الإحتجاج الوحيد اللي يقدر يعمله
الإحتجاج السلبي
–
Comment by علي باب الله — @
الناس بتدور علي حاجة تنسيها القرف اللي هي عايشة فيه، و مع الأسف كل ما القرف بيزيد التوهان بيزيد .. زي بالظبط اللي بيشرب علشان ينسي
Comment by الدائخ — @
اخى الفاضل
فى انتظار تواصلك لبدء حملة الدعاية للاتحاد
من اجل الانتهاء من مرحلة التاسيس وبدء مرحلة العمل
..كما اود ان ارى شعار الاتحاد فى مدونتك
كل الشكر لك وفى الانتظار
Comment by اتحاد المدونيين المصريين — @