سجن المشاهير
كنت قاعد بتفرج على التليفزيون برنامج 90 دقيقة ولقيتهم جايبين مرتضى منصور وطبعا كالعادة الحوار كان سخن بمناسبة خروج المستشار مرتضى من السجن
وكان فى سؤال عن مين اصحابه فى السجن او قابل مين فى السجن الغريب فى الاجابة كمية الناس المشاهير الموجودين فى سجن المزرعة لدرجة انى حسيت انه مش سجن ده فندق 7 نجوم او هوليود الشرق
بالاضافة لمرتضى كان هناك حسام ابو الفتوح والمستشار ماهر الجندى وايمن نور وابن فؤاد المهندس وخيرات الشاطر وغيرهم كتيررررررررررر طبعا غريبة شوية ان كل الناس دى تبقى مسجونة وده ليه دلالتين واحدة حلوة والتانية يعنى مش حلوة
هنبدا بالدلالة الحلوة لان كل دول فى السجن معنى كده ان فى مصر مفيش حدا فوق القانون بدليل ان الاسماء الكبير ده كلها جوه السجن وبتتعاقب
الدلالات الخطيرة فى الموضوع اول حاجة وجود واحد زى ايمن نور وخيرات الشاطر جوه السجن ده معناه ان الدولة محكومة بالحديد والنار واى صوت معارضة بيظهر سجن المزرعة موجودة ده لو كان مشهور طبعا
تانى حاجة لما رجال اعمال بوزن حسام ابوالفتوح وكان حوت السكر وغيرهم يدخلوا السجن بسب قضايا شيكات ده معناه ان فلوسنا موجودة فى بنوك اوربا واغلب المسجنون هناك اللى اخدوا القروض من البنوك بضمانات وهمية وبتعملوا كانهم فى بيوتهم بالظبط ويمكن احسن كمان طبعا دول كبار مش اى كلام ياخدوا فلوسنا ويتعملوا احسن معاملة جوه السجن اذا كان عجبنا
كمان تجميع المشاهير دول فى السجن ده بالذات بيوحى بانه سجن مخصوص المعاملة جوه مخصوصة والاكل والشرب والنوم وغيرهم ده سجن فندقى مش اى كلام
يعنى لو فى يوم حبوا يحبسونى انا بفضل اتحبس فى سجن المزرعة فى سويت 201 على الجنينة علطول
كل سنة و أنت طيب و بألف خير و سلام
—
و برافو عليك أنك لاحظت
و علي فكرة بنت مرتضي منصور وقعت بلسانها في لقاء أذاعته قناة المحور و برنامج 90 دقيقة
و قالت أننا ( هي و أمها ) كنا بنزور مرتضي منصور في السجن كل يوم
طبعاً أي سجن في العالم كله تمتد فيه أيام الزيارة لتشمل جميع أيام الأسبوع ؟؟؟؟؟؟
لكن مرتضي لحقها بسرعة و قال هي قصدها أنهم كانوا بيروحوا يقفوا قدام باب السجن بس
نوع من المشاركة الوجدانية يعني
طبعاً هو مرتضي فاكر أن المشاهدين داقين عصافير باين
—
أنا كنت ها أكتب ذلة اللسان دي في تدوينة لكن أنت سبقتني بقي و فتحت الموضوع بتاع السجن السوبر لوكس
ياللا بقي … حلال عليك
: ))
—-
Comment by علي باب الله — @
انا بصراحة مش عارفة ايه الغيظ والحقد والغل اللى ماليكو ده هو انتو عاوزين منهم ايه بالظبط لو سابوهم تقولوا هما مش بيسجنوهم ليه ولو سجنوهم تبصولهم حتى فى حتة السجن بتاعهم ايه ده؟ انضفوا باه من جواكو عشان ربنا يكرمكوا زيهم
Comment by raghda — @
كل عام وانتم بخير
ويارب العام القادم يكون احسن من السابق
فى انتظاركم
فضفضة اخر العام
Comment by حسن توفيق — @
الصديق على باب الله
ممكن امسح التدوينة وانا متاكد انك هتعملها بشكل اكتر من رائع كالمعتاد وصدقينى انا الكسبان
________________________________________________
رغدة
هو فعلا حقد مش اكتر ولا اقل
______________________________________________
حسن توفيق
يارب تكون السنة الجديدة احسن على كل الناس
Comment by ahmed — @
يا خبر أسود ؟؟ لا طبعاً
أنا بهزر معاك أوعي تكون أخدت الكلام بجد
و بالعكس أنا سعيد جداً أن في حد بيفكر و بيلاحظ بشكل قريب من الطريقة اللي بفكر بيها
و كل سنة و أنت طيب
Comment by علي باب الله — @