New Egyption (بال o لحد ما تصلحوا حال البلد)
انا مليان احزان
اه انا فعلا مليان احزان ومحدش يسالنى ليه عشان مش هقوله
بس يسال نفسه هو مبسوط وبعد ما يرد على نفسه علطول ويقول الحمدالله ويعد الحاجات الجميلة اللى فى دنياته واللى هى موجودة عندى انا كمان طبعا زى انه بياكل كويس وبيشرب كويس والحاجات دى
بعدها هيلاقى جبال هموم كده لوحدها على جنب هى دى الاحزان اللى انا بقصدها
عادى يمكن فى بلدنا دى الواحد من يوم مايتولد وجبال الاحزان دى جوه بتكبر وياه وعشان كده انا متاكد ان كل واحد جوه الاحزان اللى تكفيه وتزيد لكن انا خلاص مش قادر اتحمل
بس على راى صلاح جاهين مسيرها تروح زى مارحت احزان قبلها والزمن مبيرحمش بيمسح الحلو والمر من حياتنا
ومن هنا لغاية ما تروح انا حزين
وعشان محدش يتهمنى ويبدا يفترى عليا انا هقول سبب من وسط مليار سبب لحزنى
طبعا ده بعد استثناء اسباب الحزن العام زى فلسطين والعراق والعيش وخلافه
الحقيقة انا عمرى ما حلمت حلم فى حياتى وحققته بالعكس دانا بكون قريب من الحاجة وبمجرد ما ابدا احلم بيها تستحيل
تتحول لشئ مستحيل وعشان كده انا بطلت احلام
منير بيقول لو بطلنا نحلم نموت وانا عايش بحلم واحلامى كل يوم بتموت قدامى
عشان كده انا حزين والحزن ملئ قلبى
ياااه .. أنت جيت علي الجرح و دوست بكل قوتك
لو تعرف أني مرات كتير بلاقيني بكتب علي ورقة كلمة كنت قريتها في رواية ( أعتقد خان الخليلي ) لنجيب محفوظ
و علقت في دماغي لأنها آلمتني جداً
و هي :
لماذا أُصرع دائماً إذ لا يفصل بيني و بين ما أريد سوي ذراع ؟
—
Comment by علي باب الله — @
عارف
الواحد مهما ملت قلبه أحزان لازم يحط ف دماغه إن ربنا كبير و قادر يفك ضيقته مهما كانت
أنا ياما اتخنقت من حياتي و م الكلية و من كل حاجة، لكن لما باقعد أفكر مع نفسي أقول إيه اللي أنا بعمله ده
أكتر من كده و ربك بيزيح، و إن كان ع الأحلام ما تبطلش تحلم .. لكن و أنت بتحلم فكر تحلم إزاي تحقق حلمك
Comment by الدائخ — @
يعم قول يا رب..احنا ملناش غيره وبص لنص او حتى ربع الكوباية المليان….وهتروق وتحلو ان شاء الله…كلامى ده مش منطلق انى متفائل - لا سمح الله -ولا حاجة انما تشجيعة كده زى ال بيبقى فى السجن مع واحد ويفضل يهون عليه وهو اصلا فيه ال مكفيه بس هنعمل ايه؟!!! هى دنيا وبالطول والعرض هنعيشها يبقى نطلع منها بأقل الخسااااير…نحاول نبص للحاجات الحلوة ال فى حياتنا ومتقوليش مفيش…لا فى بس احنا بننفض لها ولو حتى انى ابص لضحكة طفل برئ ميفهمش حاجة فى الدنيا بنسى كل همومى الله وضحكته دى بتغسل حزنى
سلام
Comment by واحد مصرى — @
احنا كلنا أكيد مليانين أحزان بس عايزين حزننا ده نحوله لقوة دافعة نحاول نصمد على مبادئنا و نحاول نغير واقعنا يمكن نقدر واذا ما قدرناش نبقى أكيد حاولنا و مااستسلمناش
Comment by m.fouad — @
هو أنا مش عارفة أقولك أيه بس بردو هي مش ضلمة أوي كدا والله فيها حاجات حلوة بس أحنا بطبعنا اتعودنا علي النكد بنسيب الحلو وبندور علي النكد..هو الواحد عنده حاجات كتير تفرح بس ملوش نفس من اللي بيحصل…ربنا يعينا
Comment by Nody — @
بخصوص الاحلام ديه انا شايف اننا لازم مننفخش البلونة اوى واقعد احلم بانى اكون وهكون والكلام ده بتاع الشعارات من الاخر احنا فى وطن بيغتال الاحلام واللى بيفعل زى اللى ممابيعملش فى حالة انه يكون فقير او معندهوش ظهر يعنى الخلاصة كما قراءت فى كتاب هوامش على دفتر الزمن نحن جيل فقد كل شىء ولم يعد له امل فى اى شىء
Comment by hima — @
ياراجل تدوناتك ماشاء الله والله رائعه
وعلى فكره الصوره إللي إنته حاتطها هيه سبب تعرفي على المدونه
كنت بدور على صوره حزينه فتشرفت بمدونتك
Comment by KING SABRI — @
ان الزمان بمره دوما يهون يغفر له ماجمع بين المحبين عيون
ففيه قد ارسي الحبيب رحاله وقد احتوي كلامات اشرف المرسلين
Comment by hany lawyer — @