يوم من عمرى!!!!ا
صحيت من النوم بدرى جدا تقريبا الساعة 8 الصبح وكده بدرى جداجدا خصوصا وانا نايم بعد الفجر لكن منه لله الزبال
ابن المزعج اللى بيخبط على باب الشقة وكان يوم القيامة جه
محاولات النوم كلها بائت بالفشل النهاردة يوم مش عادى ربنا يعديه على خير,عملت الشاى وشربته مع سندوتش جبنة لكن المعدة لسه بتطالب بحقها نزلت جبت فول لكن مكلتش منه حاجة يظهر المعدة كانت فاكرة كله جبنة
قعدت بضيع وقتى وتوترى فى الفرجة على التليفزيون مفيش حاجة جديدة كلها اخبار قديمة اتفرجت على الماتش بتاع امبارح الغريبة انه خلص نفس النتيجة وبرضه ليفربول كسب
دخلت الاوضة اقعدت اقلب فى التيشرتات بنقى واحد مش محتاج مكوه عشان البسه وانا خارج مفيش فايدة لازم اكوى كلهم مكرمشين
انا عارف ان اليوم مش ولابد والصداع لسه موجود
انا فى الشارع والجو حر برد مش عارف انا غرقان فى احساسيسى ومش دارى باى حاجة حواليا ركبت الميكروباص وقعدت فى الكنبة اللى وراء جنب الشباك والدنيا زحمة والجو حر والشباك مكسور وايدى عمل تتخبط فيه
اخيرا وصلت محطة المترو وطلعت جنيه قديم شوية وكانه فعلا من ايام الفراعنة اللى مرسومين عليه,مردش بتاع التذاكر ياخده قعدت ازعق مع ويزعق معايا واقول له الحكومة يقولى مليش دعوة بيهم
انا عارف النهاردة يوم مش عادى وربنا يسترها قصرت الشر وطلعت جنيه غيره ودفعته ومشيت من سكات بس لعنات الراجل كانت فى قفايا
سرحت فى اى حاجة ومر شريط حياتى قدامى فى لحظات ووقف المترو وفتح الباب كانه بيقولى انزل من غير تفكير وبحركة الية نزلت ووقفت على السلم وكانى ندمان انى نزلت ,خطوات وئيدة كانى بقيت فى السبعين ,واخيرا وصلت وقفت اخد نفسى واجمع شتات نفسى ونطقت باسم الله ودخلت اشوف النتيجة والحمدلله لقيت نفسى ناجح
انا كنت عارف من الاول ان النهاردة يوم مش عادى
حلوة واسلوبها بسيط بس غامضة من ساعة ما نزلت من المترو وانا تهت منك ! بس عموما كويسة
Comment by واحد وخلاص — @
ياااا حمد الله ع السلامة ياعم..الف مبرررروك وعقبال التيرم التاني
Comment by Nody — @
مبروك النجاح خلصت من المشوار الرخم بتاع الكليه بس مخلصتش من الزبال اللى كل يوم هيرن عليك الساعه 7 صباحاً
Comment by اسماء — @