فى مصر والله ما حد فاهم حاجة
بمناسبة موسم الامتحانات شوية اسئلة وياريت اللى يعرف حلها او حل جزء منها يقولى لاحسن انا خلاص هتجنن من الحيرة وله الشكر والاجر والثواب
اولا الاسئلة الجغرافية
ليه جامعة القاهرة اسمها جامعة القاهرة مع انها فى محافظة الجيزة؟؟
وليه مستشفى الاطفال الجماعى ابوالريش اسمها مستشفى المنيرة وهى فى حى السيدة الزينب؟؟
وليه مكان رئيس حى المعادى موجود فى حى البساتين؟؟
وايه فايدة التقسيم الادارى الجديد؟؟
وليه الحكومة اللى المفروض تسكن فى العاصمة ساكنة فى محافظة 6 اكتوبر؟؟
ثانيا الاسئلة السياسية
ليه مدة الدورة فى مجلس الشعب 5 سنين مش اقل؟؟
ليه مجلس الشورى والمحليات فيهم اعضاء بالتعيين؟؟
ليه الحكومة ساكنة فى القرية الذكية ومع ذلك قراراتها فى منتهى الغباء؟؟
ليه مصر بتصدر الغاز الطبيعى وهى محتاجة جدا؟؟
ليه قانون الطوارئ يفضل شغال اكتر من 20 سنة؟؟
الاسئلة الاقتصادية
بما تفسر ياعلاوة ما اتقبضت خدها الغلاء وطار؟؟
ليه البنزين والزيت والرز والسجائر والكهرباء والمياه والعيشة اسعارها بقت مولعة ناررررر؟؟
ليه الشقق غالية والقاهرة نصفها مقابر والصحراء كلها صحرا ؟؟
ليه الجنيه المصرى بقه ايدك منه والارض؟؟
ليه كل حاجة عمالة تغلى الا الانسان فى مصر عمال يرخص؟؟
اسئلة لولبية
ليه وزارة احمد نظيف مش بتستقل او تتعزل رغم كل المصايب اللى عمال تحصل دى؟؟
ليه رئيس الوزارة اسمه نظيف مع ان البلد كلها تلوث فى تلوث؟؟
ليه التليفزيون بتاعنا بجيب الخبر بعد ما يحصل باربع سنين ده لو افتكر وجابه؟؟
ليه بيقول ان التعليم مجانى مع ان اى بيت بيدفع مش اقل من 500 جنيه شهريا دروس خصوصية؟؟
ليه محدش يعرف دكتور مصطفى مشرفة والناس كلها تعرف سعد الصغير؟؟
اللى ميعرفش الدكنور مصطفى يدوس هنا
ليه معندناش لجنة ادارة ازمات مع اننا اكتر حاجة عندنا هى الازمات؟؟
كل حاجة عندنا بطابور ومع ذلك احنا معندناش نقطة نظام؟؟
عندنا اكتر من 100 الف خريج جامعى سنويا ومعندناش ولا 100 عالم ؟؟
ليه كتاب عشان متضربيش على قفاك اتصادر وليه اصلا الناس كلها بتدور عليه؟؟
وليه الناس كلها اللى بتددخل المدونة دى مش بتسيب تعليق؟؟
واخيرا ليه منيو الخمسة لسه بخمسة مغليش زى كل حاجة فى البلد؟؟
تصور يا باشا انا اعرف الاجابة ع كل هذه الاسئلة؟ عارف هى ايه؟؟؟ الضحك عشان الشاعر المتنبى على ما اعتقد قال بيت شعر مشهور اوى وكم ذا بمصر من المضحكات ولكنه ضحك كالبكاء
Comment by hima — @
انا مش عارفة أرد علي اي جزء فيهم بس استفزني الجزء بتاع المحافظات الجديدة أصله فكرني بحاجة كدا من فترة بردو كانوا عايزين يعملوا عاصمة جديدة لمصر..الحكومة فاضية اوي وخلصت المشاكل كلها وحلت ازمة المواطنين وفاضيين بئا يعملوا محافظات جديدة وعاصمة جديدة..حسبنا الله ونعم الوكيل.واللي يستفز اكتر اني كل ما اقرا مقال لنظيف دا يقول ان معرفش 19 في المية تحت خط الفقر ومعرفش اقتصاد مصر في العالي وحاجات كدا تحس انهم مش بيتكلموا عن مصر اساسا..والله هم يضحك وهم يبكي
Comment by Nody — @
مشكور يا اخي أحمد بأضافتي عندك و مشكور بسؤالك …
ام بالنسبه للأسئله … الله أعلم انا من المنيا … بس بالنسبه لباقي الأسئله … مصر دايما بتصدر حاجات محتجاها مثل الغاز الطبيعي - البترول - القطن و اتذكر ان كان علينا في المنهج الدراسي أن مشروع شرق العوينات خصص محصوله كله او معظمه علي الأقل للتصدير ( و مذكور في الكتاب الخارجي أن سبب تصديره هو ان تلك المحاصيل معظمها اورجانبك يعني مش مشتخدمين هورمونات ) اما بالننسبه لسؤال نظيف و اسمه فاجابتي هي 
و لسؤال الدروس الخصوصيه اسألني أنا و خبرني عنه و غير كده التعليم مش مجاني الا اذا كان دخلوا فصول محو اميه 
الشيء الوحيد الذي تقدمه الدوله بالمجان هو العلاج … و مشكورين علي ذلك و سؤال سعد الصغير اجابتعه ان مشكلة الناس أنها بتنجذب لحاجات (فاضيه) و ليس لها الا ذلك اما بالنسبه لسؤال تلفزبونا العامر فأنا توقفت عن مشاهدته تكفيني المدونات و قناة العربيه و الجزيره اما بالنسبه لسؤال الحاجيات اليوميه مثل الرز و السكر و الكهرباء … الخ غليت نارررر بسبب أن الحكومه عايزه تلم نقود العلاوه … اتظن ان الحكومه سوف تعطي بلا اخذ … و الشقق غليت بسسب سيئين اولهم طمع التجار و ثانيهم غلاء مواد البناء مثل الحديد و الأسمنت … الي اخره
هذا ما يمكنني الأجابه عليه ….. مشكور مجددا للأستضافه
Comment by SmArT_GuY — @
حلو اوى يااحمد بجد تحفة
بس انت كدة زودت استفزازى لاني مرفوع ظغطي فعلا
وكل ما اشوف فى التلفزيون أحمد نظيف .اللى ….. احم احم مدلع الشعب ومخلاهوش شاف فقر ولا جوع ولا ذل
بيرتفع ظغطى بجدددد
فى كلام كتير بقعد اقوله بس طبعا مش هاينفع هنا يااحمد انا عندى امتحانات هاخلص واقوله واللى يحصل يحصل بقى ماهو محدش واخد منها حاجة بس ابقى افتكرني بعيش وحلاوة
سؤال اخير بقى ليه الحكومة دورت فى جيوبنا على تمن العلاوة اللى خدها الغلا وراح ومدورتش على تذاكر الدرجة الاولى اللى بتتحجز عالطيارات كل يوم ؟؟؟ وليه مدوروش عالاراضي اللى اشتروا المتر فيها ب 20 ج فى الغردقة وشرم الشيخ وتمنوا دلوقتى المليارات … مدوروش ليه عالاعلانات اللى الوزرا بيجاملوا بيها بعض فى الجرايد ؟؟ ومشافوش ليه العربيات والحرس وليه وليه ..
عشان يعنى احنا مواطنين وكفايا علينا دلع وتدليل من الريس !!!!
فعلا الريس دلعنا كفاية اوى بال30 % وبلاش كمان الحكومة تدلعنا عشان الشعب ماينحرفش !!!
واه ياوطن
Comment by yomna — @
والله يا هيما انت والمتنبى معاكوا حق ماهو برضه اللى قال يا امة ضحكت من جهلها الامم
______________________________________________________________________________
نودى لا الحكومة لما بتكلم كده والاقتصاد فى العالى تبقى بتقصد اقتصاد مصر الجديدة والميرغنى وميدان الحجاز وبعدين احنا هموما كلها للاسف تضحك لكن على راى هيما ضحك زى البكاء
______________________________________________________________________________
سمارت
واضح طبعا انى لازم ارجع لكتاب خارجى عشان اعرف الجابات وده بيخلنى اكمل سلسلة الاسئلة واسال ليه الاسئلة مبتجيش من كتب الوزارة واصل ايه فايدة كتب الوزارة والوزارة ______________________________________________________________________________
يمنى ابوس ايدك عندنا امتحانات عايزين نعديها على خير وبعدين هنفكر كلنا بعد الامتحانات نقول
Comment by AHMED — @
أعتقد يا صاحبي إن في أسئله … كلمه لي فيها تعني الإنتحار
يا ترى ليه ؟
ده من الأسئله إللي جوابها يعني الإنتحار برضه
Comment by KING SABRI — @
على فكرة جامد جدا الموضوع ده
ويا ريت البلد يتعدل فيها اي حاجة
بس برده العيب مش على الحكومة لوحدها
العيب برده بيرجع للشعب المصري
مش الحكومة هيا الاساس في كل فساد
سوري معظم الشباب دلوقتي بتعمل ايه
بدور على الكيف فين
محدش بيدور على كورس ياخده او كتاب يقرأه يستفيد منه
يعني الشباب اللي هما اساسا البلد في الضياع
عايز البلد تكون عاملة ازاي
وطبعا الحكومة ليها دور كبير للي الشباب فيه
وربنا يكرمنا جميعا
Comment by morning-light — @