New Egyption (بال o لحد ما تصلحوا حال البلد)
مقتطفات من دنيا الحياة
نحكم عقلنا
نحكم عقلنا هنشرب كلنا ونتعلم كلنا ونتعالج كلنا وحياتنا هتبقى فل الفل كمان دى الحملة الجديدة اللى اطلقتها معرفش مين فى الدولة الكريمة بتطالب بتحديد النسل وكأن المشكلة كلها ف الزيادة السكانية اللى عملين يصورها على انها غول هياكل كل موارد البلد او الللى فاضل منها قصدى اللى لسه متهربش على بنوك سويسرا مع ان زيادة النسل وبعيد عن الناحية الدينية مصلحة قومية للبلد وده عشان احنا تفوقنا على اسرائيل تفوق عددى وكمان بالطريقة الجميل دى التفوق العددى ده هيختفى وبين لحظة والتانية هتيجى اسرئيل تاخد الغاز بايدها
طبعا الاعلانات اللى متعلقة ف الشارع اعلانات سمجة زى كل حاجة بتعملها الحكومة ونحكم عقلنا مع ان احنا لو حكمنا عقلنا مرة واحدة هنسيب البلد ونهرب و عشنا كده احسن ليهم انهم ميفكروناش اننا عندنا عقل من اصله ويخلونا كده عايشنا زى ما احنا من غير تفكير ووجع دماغ
قانون المرور الجديد
الناس عمال تشتكى من قانون المرور الجديد واحنا هنستعير جملة من فوق وهى نحكم عقلنا وبكده كل اللى عنده عربية هيبعها وينفد بجلده من القانون المرعب الجديد وده طبعا احسن له من انه يبعها عشان يدفع المخالفات والغرامات الفورية اللى لن ينجوا منها احد باذن الله وبعدين ما الناس تركب عجل ده فى الصين مبيركبوش غيره وكمان كده توفر ثمن البنزين وما ادرك ما ثمن البنزين اما بالنسبة للمثلث الضوئى هما معهم حق فى الفكرة دى يعنى كده ارخص لما كل واحد يشترى مثلث ولا لما الحكومة تضطر تنور الشوراع كلها طبعا كده ارخص,وبعدين هما لو كانوا عايزين يعقدوا الناس كان قالو كل عربية يكون فيها شنطة طبية وشنطة اكل وشنطة هدوم عشان الناس اللى بتتاخر فى الاشارات بالساعات ممكن تجوع او حاجة لكن هما تخفيفا منهم على الشعب قالوا شنطة طبية بس
دار الافتاء تنتظر الافتاء
صدرت قتوة من دار الافتاء بتاكد انه مينفعش تولى امراة رئاسة الجمهورية بعدها بفترة قصيرة صدرت فتوة تانية من دار الافتاء بتقول انه ينفع وزى الفل دى زى ما قرات على مواقع النت
والحقيقة ان دار الافتاء المصرية دوختنى معها لدرجة ان احيانا بحس ان اسمها الافتاء جاية من الفتة وبعدين دى مش اول مرة ومش هتكون اخرة يقولوا فتوة ويرجعا فيها وده طبعا عشان زى ما نتوا عارفين الفتوة دى بتكون من القلب والقلب كل ساعة بحال وسبحان مقلب القلوب
حاجة تحير
اكتر حاجة بقه فى الدنيا بتحيرنى ان احنا مشاكلنا كل يوم بتزيد والمشاكل القديمة مش بتتحل وتطلع مشاكل جديدة وهكذا لدرجة انه بقه عادى ان يطلع وزير فى المصرى اليوم يقول انتظروا المجاعة وقال يعنى احنا مش بنعنى منها دلوتى الحقيقة احنا بقه عندنا بلاهة وجمود فى مواجهة المشاكل بقت عادى او بقيت عادة حتى انا وانا بكتب الكلام ده مش فارق معايا وكل اللى هيقراه برضه مش هيفرق معاها حاجة
خليهم يتعدلوا في سواقة السيارات بدل الحوادث اللي علي المحور دي
Comment by ғαқε_ρяïи¢ε — @
ياعم ولا هيتعدلوا ولا حاجة كل الحكاية ان امين الشرطة لما كان بيوقفك وتطبق ايدك وتديله 20 جنيه بعد القانون الاغبر ده هتطبق ايدك وتديله 50 او 100 حسب بقه الغرامة اللى كنت المفروض تدفعها
Comment by AHMED — @
شكرا يا صاحبي على الكلام الحساس ده
ولسه كنت قاعد في الميكروباص و كان فيه واحد جنبي إتكلمنا على موضوع القانون الجديد
لكن أنا ليا رأي يا صديقي
لو كل قانون ينزل هانقول إنهم منزلينه علشان ياكلوا من وراه عيش يبقى هاتعيش زي الغنم و عمرنا ما هنتظم و كمان همه هيفضلوا ياكلوا على قفانا عيش
معلش .. إحسبها كده … الأمين إللي في الشارع كان بياخد قتاوات من الميكروباصات و مخافات كاذبه من الناس و تروح القسم يطلع عليك 7000 جنيه مقالفات تدفع منهم 100 تسديد مقالفات و 700 للظابط و تروح كل المخالفات دي و الحكومه تسامحك فيهم
كذه أعتقد الدنيا هتبقى أوضح و هيبقى فيه قانون نعرف إحنا بنتخالف على إيه وليه و هيكون في تشديد جامد على المرور كمان موضوع طفاية الحريق دي أنا شايفها ممتازه جدا جدا و حوار حزام الأمان و السرعه و المشي العكسي للسير
بدال إحنا مش راضيين عن القانون مش هنتبعه و في الأخر همه إللي كسبانين شوف الإمارات القوانين فيها إزاي
والله لو راح مدرب سواقه إمتحن في مرور دبي هيسقط حاجه مش ممكن
طبعا علشان تعرف أني لا أنتمي لأي حزب في الدنيا والله لكن كمان أنا سمعت عن حاجه متخلفه جدا حوار شنطة الإسعاف
شويه شاش و كركم و قطن و هبل
يعني الحادثة إللي هتحصل في العريه هيتفعلها شويه شاش يلحقوا بيهم المصاب ؟ ماكانش حد غلب ياريت الحوادث بتاعتنا تنفع فيها شاش
أرجو إن كلامي ما يكون مضايق و مازلت بحييك على كلامك و إحساسك و صورك .. كإنك خريخ إعلام ده إذا ما كنتش كده فعلا
شكرا يا قمر و خلينا نشوفك
Comment by KING SABRI — @