المصري الجديد

الفاالنتين داى ده العيد القومى للمحبين ,الدنيا كلها اليوم ده بتكون لبسة احمر وعلى راى المثل ان كان حبيبك تور قابله فى الفالانتين ,والفالنتين ده على حسب ما اسمع قديس بس بتختلف الحكايات عنه فى حكاية بتقوله انه كان شخص عادى جدا فى روسيا فى القرن اللى مش فاكر رقمه وكان ساعتها روسيا مش بتهتم بحاجة غير الجيش فالاخ فالنتين ده خالف التعليمات وحب واحدة مزة فطبعا الجيش حكمه واعدمه ومن ساعتها الناس اعتبرته قديس وشهيد وكل سنة يحتفلوا به , دى حكاية من ضمن مليون حكاية عن فاانتين

وطبعا الناس فى مصر لما بتصدقى يجى مولد الفالانتين ده تلاقى مصر كلها بقت احمر من الاول هما المصريين كده طبلة تلمهم وعصاية تفرقهم ,واحنا فى مصر بنحب الزيطة زى عنينا من اول مولد سيدى العريان لحد مولد سيدى اللى لى ومدد يا فالانتين مدد
والمفروض الحكومة تدينا اليوم ده اجازة عشان الاحتفال يبقى بحق حقيقى ,بس برضه فى ميزة للمولد الفالانتين ده يعنى مثلا تخيلوا الراجل لما يرجع البيت يلاقى مرته مظبطة وشمع وغدا رومانسى وكل ده عشان مولد الفالانتين اكيد هتبقى حاجة حلوة طبعا ده قبل ما تكتشف انه نسى يجيب لها هداية الفالانتين فتولع فيه بالشمع الرومانسى ده ودى برضه هتبقى حاجة حلوة

نزلت امبارح قولت ويك اند واعمل شوبنج طبعا مش هشترى بس قصدى اتفرج مش عشان حاجة بس عشان الازمة الاقتصادية العالمية اللى وصلت لحد جيوبى ولاقى الدنيا كلها زحمة بشكل فظيع الناس كلها بتشترى عادى جدا ما شاء الله وكان الازمة الاقتصادية موصلتش الا لجيوبى انا بس وطبعا لما شوفت كده قعدت ادعى للحكومة نفر نفر

وكل فالانتين وانتوا طيبين