المصري الجديد

ايه هو اسم بلدنا ؟؟ طبعا كل الناس هتقولى فى نفس الوقت مصر انت عبيط يا عم الحاج ولا ايه وبعدين هرجع انا ابص ليهم بظرة معناها انتوا اغبياء ولا ايه ما انا عارف انا قصدى الاسم الرسمى اللى بيتكب فى البطاقة يعنى جمهورية مصر العربية

والحقيقة انا النهاردة بما انى مواطن مصر كامل الاهلية فى بلد ديمقراطى اخر حاجة قررت مع نفسى اغير اسم بلدنا مصر ومش اعتراضا منى على الاسم او حاجة بس انا حر خصوصا فى ممارسة حريتى فى اطار من الديموقراطية انا سمعت واحد بيقول كده فى التليفزيون فامحدش يسالنى يعنى ايه
طيب الاول لازم افصص الاسم كلمة كلمة عشان اقدر اجيب اسم بداله يعنى ايه جمهورية طبعا كله سكت دلوتى محدش عارف طيب هسهلها ليكوا شوية جمهورية يعنى بتتبع النظام الجمهورى فى الحكم حد فهم حاجة كده طبعا برضه لا يعنى هو انا شخصيا مش فاهم بس هنبسطها شوية كمان جمهورية يعنى مش ملكية يعنى مفيش ملك وولى عهد وامراء والافلام الابيض واسود دى
جمهورية يعنى عندنا رئيس بالانتخاب وبيتغير كل فترة معينة وحاجات من دى كتير ومحدش يسالنى عشان مش عايز وجع دماغ
كل ده عشان نفهم يعنى ايه جمهورية ياعم سيبها كده احسن طبعا لا انا لازم امارس حقوقى فى بلدى
طيب نيجى بقه لمصر يعنى ايه مصر ,مصر يعنى بلد بلاش نظرة الغباء ده ومحدش يقولى ما احنا عرفين ان مصر هى بلدنا عشان انا قصدى مصر يعنى بلد عموما مش قصدى مصر بلدنا يعنى السعودىة مصر وليبيا مصر والهند مصر من الامصار

طيب كده تمام نبتدا نفكر فى اسم بقه
اول حاجة مصر هتفضل جمهورية ولا نغير النظام نخليها جمهورية ومين عارف يمكن زى ما اباما دخل البيت الابيض انا كمان ادخل البيت الابيض برضه لان حتى الاحلام ليها حدود وعليها رقابة
طيب وانا شايف نغير اسمها من مصر لان مصر دى يعنى اى بلد زى ما انا قولت قبل كده ونخليها مثلا نيلة نسبة الى النيل وبكده هنكون احنا بلد اخر نيلة واسم على مسمى بس الحقيقة الاسم مش لذيذ طيب ما نسميها زلابية على اعتبار ان اللى بنا مصر كان فى الاصل حلوانى وبتاع زلابية وده هينفعنا فى السياحة بس من ناحية تانية هنكون بلد ملزلقة بسبب العسل مش نافع الاسم ده برضه
طيب ممكن عشان مصر مصر ام الدنيا ودى حقيقة علمية مفيش فيها جدال ممكن نسمى مصر الخالة نوسة مثلا لا طبعا انا مقبلش
على بلدى انا كده شكلى بهزر

طيب نسميها ايه ايه ايه بس ممكن نسميها مثلا البحرين بما ان احنا عندنا البحر الابيض والبحر الاحمر بس كده الدول والناس هتتلغبط بينا وبين البحرين الاصلية وهنكون كمان بنقلد طيب ما ايه رايكوا ناخد اسم من التراث مثلا منف وده كان عاصمة حد من الفراعنة بس انا مش فاكر مين مع ان الاسم كئيب وكمان له دلالة مش حلو خصوصا لما بيتكتب فى مدونة

خلاص عشان انا زهقت طالما مصر دى بتاعتنا كلنا نسميها جمهورية المصريين زى قهوة المصريين كده بالظبط نسبة لشعب الغلبان ده وكمان عشان احنا جوه مصر كل واحد رئيس جمهورية نفسه عشان كده انا شايف ان الاسم ده مناسب جدا
مش عايز بقه فى الكومنيتات حد يستظرف ويقعد يقترح اسم لمصر بلاش خفة دم يعنى انا بس اللى بستظرف هنا وعشان كده طبعا انا بهزر وبجد مستنى اعرف لو مصر مكانش اسمها مصر كنت تفتكر اسمها هيكون ايه؟؟؟