المصري الجديد

صحيت من النوم بدرى جدا تقريبا الساعة 8 الصبح وكده بدرى جداجدا خصوصا وانا نايم بعد الفجر لكن منه لله الزبال
ابن المزعج اللى بيخبط على باب الشقة وكان يوم القيامة جه
محاولات النوم كلها بائت بالفشل النهاردة يوم مش عادى ربنا يعديه على خير,عملت الشاى وشربته مع سندوتش جبنة لكن المعدة لسه بتطالب بحقها نزلت جبت فول لكن مكلتش منه حاجة يظهر المعدة كانت فاكرة كله جبنة
قعدت بضيع وقتى وتوترى فى الفرجة على التليفزيون مفيش حاجة جديدة كلها اخبار قديمة اتفرجت على الماتش بتاع امبارح الغريبة انه خلص نفس النتيجة وبرضه ليفربول كسب
دخلت الاوضة اقعدت اقلب فى التيشرتات بنقى واحد مش محتاج مكوه عشان البسه وانا خارج مفيش فايدة لازم اكوى كلهم مكرمشين
انا عارف ان اليوم مش ولابد والصداع لسه موجود
انا فى الشارع والجو حر برد مش عارف انا غرقان فى احساسيسى ومش دارى باى حاجة حواليا ركبت الميكروباص وقعدت فى الكنبة اللى وراء جنب الشباك والدنيا زحمة والجو حر والشباك مكسور وايدى عمل تتخبط فيه
اخيرا وصلت محطة المترو وطلعت جنيه قديم شوية وكانه فعلا من ايام الفراعنة اللى مرسومين عليه,مردش بتاع التذاكر ياخده قعدت ازعق مع ويزعق معايا واقول له الحكومة يقولى مليش دعوة بيهم
انا عارف النهاردة يوم مش عادى وربنا يسترها قصرت الشر وطلعت جنيه غيره ودفعته ومشيت من سكات بس لعنات الراجل كانت فى قفايا
سرحت فى اى حاجة ومر شريط حياتى قدامى فى لحظات ووقف المترو وفتح الباب كانه بيقولى انزل من غير تفكير وبحركة الية نزلت ووقفت على السلم وكانى ندمان انى نزلت ,خطوات وئيدة كانى بقيت فى السبعين ,واخيرا وصلت وقفت اخد نفسى واجمع شتات نفسى ونطقت باسم الله ودخلت اشوف النتيجة والحمدلله لقيت نفسى ناجح
انا كنت عارف من الاول ان النهاردة يوم مش عادى

اه انا فعلا مليان احزان ومحدش يسالنى ليه عشان مش هقوله
بس يسال نفسه هو مبسوط وبعد ما يرد على نفسه علطول ويقول الحمدالله ويعد الحاجات الجميلة اللى فى دنياته واللى هى موجودة عندى انا كمان طبعا زى انه بياكل كويس وبيشرب كويس والحاجات دى
بعدها هيلاقى جبال هموم كده لوحدها على جنب هى دى الاحزان اللى انا بقصدها
عادى يمكن فى بلدنا دى الواحد من يوم مايتولد وجبال الاحزان دى جوه بتكبر وياه وعشان كده انا متاكد ان كل واحد جوه الاحزان اللى تكفيه وتزيد لكن انا خلاص مش قادر اتحمل
بس على راى صلاح جاهين مسيرها تروح زى مارحت احزان قبلها والزمن مبيرحمش بيمسح الحلو والمر من حياتنا
ومن هنا لغاية ما تروح انا حزين
وعشان محدش يتهمنى ويبدا يفترى عليا انا هقول سبب من وسط مليار سبب لحزنى
طبعا ده بعد استثناء اسباب الحزن العام زى فلسطين والعراق والعيش وخلافه
الحقيقة انا عمرى ما حلمت حلم فى حياتى وحققته بالعكس دانا بكون قريب من الحاجة وبمجرد ما ابدا احلم بيها تستحيل
تتحول لشئ مستحيل وعشان كده انا بطلت احلام
منير بيقول لو بطلنا نحلم نموت وانا عايش بحلم واحلامى كل يوم بتموت قدامى
عشان كده انا حزين والحزن ملئ قلبى

عندى امتحان والدنيا مش تمام

والعيشة كانت فل دلوتى بقيت سخام

ودى اخر سنة ليا ,ليا جوه الكلية

اهالى بيزنوا عليا عايزين تقدير كمان

المذكرة مش بسيطة ومش حاجة يا ناس عبيطة

من امس لحد اليوم من غير ولا لحظة نوم

ولا اكل ولا حموم ولا شاى ولا حتى ليمون

نفسى فى خروجة حلوة او حتى اخش سينما

طيب بس اروح النادى او ارغى فى التليفون

صفحة وراءها صفحة وكتاب ورا كتاب

بحلم بأكلة كباب    بحلم بشوية نوم