المصري الجديد

انا لا ارغب فى الكتابة لذا لا اكتب سوى كلمة واحدة فقط
يا امة ضحكت من جهلها الامم
التليفزيون والردايو منذ امس لا يذيعوا سوا الاغانى الوطنية الخاصة بنصر اكتوبر او التى اتبطت فى الاذهان بهذه الذكرى لان مصر غدا سوف تلعب مبارة كرة قدم مع فريق عربى شقيق

محدش يفتكر ان مثلا هحل مشكلة الناس اللى عايزة فلوس او الناس اللى مش عايزة فلوس او حتى الناس اللى الفلوس مش بتشغل بالها ,انما انا هكتب البوست عشان اخد فلوس وبراءة اختراع على الافكار الذكية الخلابة اللى هقولها تحت وعشان كده كل واحد نفسه تسوله ان يقرا البوست ده و يمشى يفتكر اخوه الغلبان -اللى هو انا- باى مبلغ كده بس يكون محترم

المشكلة بتاعت الفلوس قايمة على 3 محاور وانا معرفتى بعلم الاقتصاد بالظبط زى معرفة تامر حسنى عن الفيزياء الحيوية يعنى من الاخر محدش يستقل بيها نرجع بقه للمحاور بتاعتنا المحور الاول هو انخفاض قيمة الجنيه
اسبابه ايه الحكاية العلماء اختلفوا فى اسباب انخفاض قيمة الجنيه فمجموعة قالت ان السبب ان الجنيه غلب الكارنيه وده ادى الى ان الناس بدات تستخدم الجنيه فى كل الامكان اللى بتستخدم فيها الكارنيه مما اضعف من صحة الجنيه وداب من كتر الاستخدام واتشحطط فى المواصلات و المصالح الحكومية فاتقلت قيمته
اما بقه الجورنلجية بتوع المعارضة عندوهما تفسير تانى خالص بيقول ان فى يوم من ذات الايام الجنيه دخل قسم شرطة غلط فاقبله ظابط لطيف جوه وخده عمل معاها الواجب لحد ما قل قيمته وبعتر كرامته وضيع رقمه
اما باقى الراى الراجح عند جميع اهل الاقتصاد ان الجنيه قميته اتقلت لما جت الحكومة تعوموا لانه اضطر يقلع هدومه قدم الناس فاتقلت قيمته

المحور الثانى هو الجنيهات الفضة التى يطلق عليها عامة الشعب اسم الدنانير تيمانا بايام الامير قشتمر الذى كان الدينار فى عصره يشترى ديناصور فبريكة مفيش اخوه وطبعا الفلس الفضة دى خانقة الناس فى مصر اه والله زى بقولكم كده ,وانا عرفت سر من مصدر غير موثق منه ان الحكومة عاملة كده مخصوص عشان تكره الناس فى الفلوس وسيرت الفلوس وشيل الفلوس لكن محدش يقلق انا طبعا عندى الحل

المحور الثالث هو انخفاض القيمة الشرائية للفلوس واللى عايز يعرف يعنى الكلام ده يرجع كتاب الاقتصاد بتاع الثانوية او كتاب النقود والبنوك بتاع تجارة او كتاب حياتى يا عين بتع حسن الاسمر وفى الاخر مش هيعرف وهيجلى عشان اشرحله انخفاض القيمة الشرائية للنقود يعنى الجنيه اللى كان زمان ينفع تعمل بيه حفلة عيد ميلاد وتعزم فيها 9 اشخاص دلوتى مبقاش يكفى تركب الميكروباص وانت رايح حفلة العيد ميلاد دى يعنى ما الاخر الفلوس اتقل بركتها والجنيه اللى كان زمان بتنين وتلات دولارات فى العصر الذهبى لمصر اللى هو دلوتى بقه مش بيسوى ربع دولار مخروم بس برضه يا جماعة مش تقلقوا انا عندى الحل اتصل على 0900009999 وانا مش هرد عليك
الحلول بقه عشان الناس بدات تزهق ,انا هحل التلات مشاكل اللى فوق دول بحل واحد بس عبقرية بقه عقبال عندكوا
الحل ببساطة يجماعة اننا هنغلف الجنيه الورق وده عشان نحافظ عليه من التلف والغرق والحرق وبكده الحكومة مش هيبقى ليها حجة فى الفلوس الفضة اللى قارفة الناس وبكده ابقى حليت اول مشكلة ,تانى مشكلة وهى انخفاض قيمة الجنيه اللى اصلا نفس المشكلة التالتة واللى انخفاض القيمة الشرائية للجنيه واللى انا معرفش انا كتبتها مرتين ليها اصلا بس اهو كله كلام ,لما نغلف الجنيه هيبقى اسمه جنيه بس هيكون بجنيه وربع عشان ثمن التغليف ده مين اللى هيحاسب عليه فى الاخر وبكده لما حد فينا يركب اليمكروباص ابو جنيه وربع هيديلوا جنيه مغلف وبس وهكذا وبكد ترجع للجنيه قيمته اللى افتقده من زمان وخد انا جايزة اللى استحقها جايزة الدولة التقديرية زى الدكتور سيد القمينى كده بالظبط

كنت قاعد مع اصحابى فى قعدة مزاج وكله بيحشش والدنيا حلوة وفى فراشات بترفرف فى الاوضة وجه عليا الدور ولقيت نفس باخد نفس طويل جدا من الكباية وسرحت معها لاخر الدنيا
افتكرت انى لسه قارئ رواية لخيرى شلبى كانت كلها على الحشيش وقدرت بجد قد ايه الراجل ده فنان اى حد يتكلم عن الحشيش يبقى فنان حقيقى
ورجعت سرحت تانى يا سلام لو الحكومة تخلى الحشيش ده ببلاش ومن غير مشاكل ولا سجن ولا يحزنون ,انا مش عارف هما عاملين مشاكل ليه مع ان البلد كلها النهاردة بتحشش ورهان ان 75%من الشباب النهاردة بتضرب مخدارات, اتارينى كنت بتكلم بصوت عالى وانا مش دارى بحاجة ولقيت واحد صحبى بيقولى اه يا سلام لو الحشيش ينزل عليه الدعم ويبقى مدعم ونشترى رخيص شوية بجد ده تبقى احلى حاجة عملتها الحكومة وواحد تانى لقيته بيقول لا ياعم ده كده معناه ان الحشيش هيبوظ زى حاجة التموين كلها حاجات غير صالحة للاستهلاك الادمى ,انا اصلا معرفش احنا كنا كم واحد
وبعدين تخيلت مظاهرة كبيرة ماشية فى ميدان التحرير بتطلب الحكومة بدعم المخدارات ولقيت نفسى قمت فجاة فى وسط الاوضة وكانى سعد زغلول فى فيلم رد قلبى وقعدت اقول الحشيش الحشيش قبل المياه وقبل العيش وفجاة لقيت واحد صاحبى بس معرفهوش او مش فاكر انا شوفته فين قبل كده بيقول خلى الخابور والع والع على وزن موسيقى خلى السلاح صاحى
وبعدين فجاة لقيت الميتين واحد اللى فى القعدة فى حالة ضحك هيستيرى انا لغاية دلوتى مش قادر افتكر هما كانوا كام بنى ادم خصوصا ان كان فى كائنات تانية موجودة
ورجعت تانى لقيت نفسى بقول يا سلام لو الواحد يروح الشغل الصبح يلاقى المدير عامله ميتنج عشان نصطبح مع بعض ويكون اسمه ميتنج الاصطباحة ده الشغل هيكون احلى كلام ,وبعدين فجاة طلعه كائن كده بينتمى لحزب كده برضه قالى تصدق فكرة احنا هندخل الانتخابات الجاية بالشعار ده الوحدة الوطنية هنشطب خانة الدين من البطاقة عشان كلنا مصريين وكل واحد يكتب فيها نوع المخدر اللى بيمزجه وطبعا كلنا صقفنا فرحا بهذه الفكرة العبقرية اللى طلعت من هذا الكائن المنزلق الغريب
وكان فى واحد لسه فايق شوية لقيته بيقول الله يخرب بيتكوا بوظتوا البلد بالزفت اللى انتوا بتشربوا ده ,اعداء الوطن هما اللى عايزينكوا توصلوا للحالة دى وتفقدوا الاحساس وتبقوا تقول الوقت فى عز مخدرين ,واحد جرئ فى القعدة شكله يدى على بنى ادم قاله مساء الخيررررررررر ودخل عليه بالجوزة والتانى لما صدق قم ساحب نفس جامد قام الاولانى ساله قاله انا بس عايز افهم من حضرتك حاجة هى الوطن دى جريدة مستقلة ولا ايجار جديد
واحد تالت قاله انت بتقول عز يبقى انت اللى سرقت ضنايا اه يا شقائى
فاصل من الضحك الهستيرى ,وبعدين رجعت انا بعتبارى زعيم الحركة التحشيشية وصاحب جروب هنحشش كل يوم الصبح وقبل النوم وقالت له ان الحشيش ده مفيد جدا بالاضافة ان بيحل حوالى 91%من مشاكل البلد وواضح انه كان لسه فايق فقالى ازاى بقه يا كبير
انا كنت نسيت انا قولت ايه فى الاول اصلا فسكت لكن واحد غيرى رد وقاله اول حاجة انا لما بحشش بنسى انى عاطل وبنسى انى محتاج شغل ومش لاقى وقمت انا داخل علطول مؤكد على كلامه ان الحشيش بيساعد فى تخفيف الزحام واحد كان نايم اصلا صحى هنا وقالى ازاى يا ذوق رديت عليه بكل دبلوماسية قالته انت تقدر تسوق عربية وانت خربان(خربان يعنى محشش لدرجة انه مش شايف قدامه) قالى لا طبعا قالته شوفت قالى اه صح واحد تانى مكانش شاف فطلب تفسير اكتر من كده فقولت له ان لو نص البلد حشيشت فى يوم واحد ده معناه ان نص العربيات اللى فى البلد مش هتتحرك من مكانها فقتنع اكتر بواجهة نظرى ان الحشيش بيساهم فى حل مشكلة الزحام
وفجاة دخل علينا ظابط استنوا مش تجروا ده ظابط صحابنا كان جاى يصطبح معانا ولكن هذه قصة اخرى
تعديلات من واحد فايق
انا خدت بالى انى كده انا بدعى الناس للمخدارت وده مش صحيح انما كان الغرض الاصلى من البوست انى اقول للمخدارت لا واقول للى عايز الشعب يفضل مخدر ومش فاهم حاجة برضه لا
معلومة تاريخية استخدمت الصين الاعدم والجلد مع مروجى المخدارت بعد انتشار المخدرات فيها وقبل حرب الفيون وكان مروج المخدارات بيتعدم قدام بيته اما اللى بيشرب بس فكان بيتجلد برضه قدام بيته يا فى ميدان عام

لم يصدق اشرف ودانه وهو يسمع انه فاز بعربية بى ام دبليو من شركة فودافون ولم يكن استغرابه من فوزه بالسيارة الفارهة جدا يرجع الى انه يظن كأغلب المصريين ان هذه المسابقات كدب ومفبركة ,انما كان سبب استغرابه انه لم يفز من قبل فى اى مسابقة على وجه الارض حتى مسابقات الشيبسى والآيس كريم التى فاز فيها كل واحد من الشعب المصرى مرتين على الاقل.
انفجر اشرف ضاحكا اكيد الواد عادل عمل المقلب ده فيا اكيد منسيش مقلب تحويل الرصيد اللى عملته فيه من اسبوعين, لكن سوف يذهب فى الميعاد فانه لا يطيق صبرا حتى مع علمه انها اشتغالة,اقصر واطول ليلة فى تاريخ حياته مرت عليه كأن الليل يطول فجأة كما لو كان بلا صباح ثم يجرى ملتاعا كما لو كان موظف متاخر على شغله وسبب التباين ده تباين افكاره نفسها بين انه كسب فعلا وبين انه مقلب عمله الواد عادل ابن ام عادل.

يا سلام اول مرة فى تاريخ حارة سالم بالسيدة تدخل عربية بى ام دبليو الحارة سوف يتركها فى الحارة يومين على الاقل حتى يعرف حى السيدة باكمله ان اشرف السيد عنده عربية بى ام دبليو لن يبيعها ابدا صحيح هو محتاج لكومة فلوس بس ولو.
ياترى هيطلع لونها احمر زى اللى فى الاعلان يضحك فى سره قائلا والله ما بتفرق معانا الالوان ينظر الى سقف الغرفة المحتاج ترميم فيعتذر له بابتسامة معلش ما انت من يوم ما انا اتولدت وانت كده اصبر شوية ,معلش اكيد طالما ربنا فرجها يبقى قدام شوية هكسب شهادة المليون واول حاجة هعملها انى هصلح البيت اللى داب من المجارى وهبيض الشقة اللى نفسى اعرف لون حيطانها ايه ؟
تذكر كام مرة حلم بدهان شقتهم باللون الابيض وضعا وردا ملون كبير على الحيطان بشكل مبهر
الله يرحمك يابا كنت تيجى تشوف ابنك بكره هو راكب بى ام دبليو اختفت الابتسامة تحولت الى غصة عندما تذكر والده الذى مات لانهم لم يكونوا يملكوا ثمن العلاج وولا حتى واسطة حتى يدخل الى المستشفى الحكومى عشان برضه يموت بعد ما ياخد العلاج .
بدأ يفكر ماذا سيقول لموظوفين فودافون فى الاعلان ما اكيد هيطلع فى العلان وهما بيسلموا مفتاح البى ام دبليو مصلحة عشان الدنيا كلها تعرف انه اصبح من اصحاب العربيات ومش اى عربيات, تذكر وهو يحكى لوفاء عن الجمعية التى سيقبضها فى اخر السنة ويشترى التو توك لعيطيها الى اخيها الاصغر يعمل عليه مقتسما الارباح بالنصف لكن لن يبيع البى ام دبليو مهما حصل .
فجأة دخلت امه واضأت نور الغرفة فتململ اخيه فى فراشه ولكنها تواجهت اليها بالكلام اشرف اصحى الساعة بقت سابعة عشان الشغل ولم يكن تذوق طعم النوم طول ليلته فتبسم ضاحكا عندما راى وجه امه, كان دائم التساؤل كيف هى طول الوقت مبتسمة والفقر والمرض يجثمان على صدرها كانت تقول دائما ربنا مبينسش حد.
توقفت خواطره كلها دفعة واحدة فجاة عندما تذكر امه فهى مريضة بشدة واحتاج الى عملية ولكن من اين توقف حائر أيبيع بى ام دبليو لاجل امه التى لم يبقى له غيرها فى الحياه هى واخواه
انفلتت منه ضحكة صاخبة ونظرت اليه امه مبتسما قائلة خير ربنا يبسطك كمان وكمان
وإنفلت لسانه معبرا عما بداخله ..لو طلع مقلب عمله فيا الواد عادل

نحن ليس انتم فتقبلونا
نحن قوم غيركم فتقبلونا
نحن بشر ايضا لو تعلمونا
نحن لم نحمل لكم –حتى الان- الضغينة
******************************
فى الصبح تقول ارهابى
ظهرا تغزو بلادى
دنس ارض الاجدادى
عصرا تكسر ابوابى
ليلا تسرق جلبابى ……..عفوا اعنى البترول
**********************************
لم اعرف من هو الزعيم
لم اسال لن اهتم
فانا اعرف يقينا
اننا لم يعد لدينا دم
************************************************
حرف بجوار حرف كتبت كلمة
كلمة بجوار كلمة كتبت جملة
ولما قرأت الجملة سكت العالم لحظة
لم يدرك حتى الان المـــــــــــــعنى
*********************************************************

محدش يسالنى انا اقصد ايه او اقصد مين او مين مع مين او ايه مع ايه او حتى ليه دى حاجة ملخبطة على بعدها والاحسن انها تفضل ملخبطة كده على طول
اللخبوط الاول
مجموعة ناس كتير متلزقين فى بعض والجو حر موووت ونسمة الهواء بتتعزز علينا الاتوبيس كل شوية يقف وكان اكبر مسافة ممكن يمشيها من غير توقف مترين والسواق حريص انه ميكسرش القواعد كل نص متر يقف وينزل زبون ويطلع زبون معرفش ايه شعوره وهو حران زينا ولا لا الاهتزازت خليتنا زى ما نكون فى بحر العرق كمان ساعد على الايحاء ده
صلى على رسول الله الولاعة اللى فى الاكشاك بتنين جنيه وفى المكتبات بتلات جنيه كل من قال بسم الله وطلع جنيه خده الولاعة
الشمس كمان بتطاردنى بصرار غيرتى مكانى مرتين ومفيش فايدة دايما بتفكر بيت شعر مش فاكر كلماته بس فاكر انه بيقول ان اللى عايز ينجح لازم يستحمل لسعة الشمس

اللخبوط التانى
ناس غير الناس وبشر غير البشر كانى سفرت من غير باسبور او كان الاتوبيس الة زمن نقلنى بتاع ميتين سنة الناس بتلمع زى ما تكون لسه خارجة من غسلة اوتوماتيك مبترحمش البقع بس رغم تحس انهم تماثيل محدش فيهم فيه الروح زى بتاعوا الاتوبيس (غالبا دى مش حقيقة بس بدارى الحقد الطبقى) سبحان الله عمال ابص يمين وشمال بدور على حد اعرفه وانا عارف انى مش حلاقيه بس يمكن حد هو اللى يعرفنى

اللخبوط الثالث
فى كل شبر عسكرى وكل حيطة عسكرى بس مفيش ظباط كانها لوحة شطرنج طول الوقت كنت بسال نفسى ليه الشطرنج مفهوش ظباط انا نفسى حاسس احساس العسكرى نفس حالة اللامبالاة نظرة التامل اللى هى اصلا مش تامل اه بلاهة زى الكلام اللى بكتبه دلوتى

اللخبوط الرابع
الجوا جميل جدا كان قاعد فى اكتر مكان فى العالم رومانسية انا عارف انى بحلم مستنى اصحى ومستنى الحاجات الغربية بتاعات الحلم نفسى افضل هنا علطول بس لازم اروح نفسى افضل هنا علطول بس بشروطى رغم الجو الشاعرى فى حاجة غبية بتلح عليا وبتصر تنغص حياتى وتقرفنى فى حلمى لسه مصحيتش بس اكتشفت انى مش نايم

اللخبوط الخامس
بيعملنى بكل احترام مبتسم وهو بيكلمنى سالنى هطلب ايه استنيت الابتسامة تروح والمعاملة تتغير انا صحيح طلبت بس انا عارف طلبى كفاية عليه اوى انه يجيبه ليا فضلت الابتسامة موجودة ويدات اشك اكتر يمكن يكون بيعملنى كويس فعلا يقصدنى انا فعلا بصيت يمين وشمال مفيش غيرى واقف فى المكان بس الحقيقة انه سمع غلط ولما عرف الحقيقة كنت انا مشيت

اللخبوط السادسة
معرفش ليه هما ستة مش خمسة مثلا ولا سبعة بيقول سبعة ده رقم بركة مع ان بركات بيلبس تمنية لما بكون مضايق وحد يقولى مالك بقوله عادى معه انه بيكون عارف انى مضايق وانا كمان بكون عارف بس عادى ولو قريت البوست ومفهمتيش عادى او قريته وفهمت برضه عادى

من هنا وهناك اقصد انى هتكلم عن حكايات وحاجات هنا وحكايات وحاجات هناك وهى حاجة كده شبه وحبة وحبة تحت وممكن ابدت من هناك الاول وممكن ابدا من هنا عادى جدا ومتهيالى دلوتى ان انتوا اتغلبطتوا بين هنا وهناك وهو ده اللى انا عايزه يمكن رنا يسهل وحد يقرا البوست للاخر و يا سلام بقه كمان لو حد ساب كومينت
احنا احنا اللى وقفنا ولا اتحتحنا جملة شهيرة اتقلت فى مسرحية انا مش فاكرها ودى كان شعارنا فى كاس العالم للقارات وانا عارف ان محدش له نفس يسمع كلام عن البطولة دى او حتى يقرا كلام عنها بس اننا حابب اكتب واتكلم

الحقيقة قبل ما تبدا البطولة كان كل احلامنا كامصريين الهزيمة من البرازيل والهمزيمة من ايطاليا والتعادل مع امريكا ورغم ان الحلم مش عيب لكن انك تحلم بالاداء المشرف فقط والهزيمة هو ده العيب حتى لو كنا بنلعب مع البرازيل او ايطاليا ابطال العالم واسطاين كرة القدم لكن برضه فى مثل بيقول ان عشقت اعشق قمر وان سرقت اسرق جمل وانا بكمله واقول وان حلمت احلم بالنهاية السعيدة والفوز مش مجرد الاداء المشرف بجد انا شخصيا كنت مبسوط من الهزيمة من البرازيل بس المفروض ثقافة الاداء المشرف دى تتغير من عندنا مش فى الكرة بس حياتنا كلها على مستوى الكرة فى فرق بتحقق بطولات جامدة جدا لانهم بيحلموا صح زى اليونان بطل اوربا فى البطولة قبل الاخيرة وكوريا لما وصلت لدور الاربعة لانهم كانوا بيحلموا صح
وعلى مستوى الدنيا النهاردة فى النمور الاسيوية وكمان الصين اللى بتفخر ان مفيش فى العالم متر مربع الا وفيه منتج صينى لازم نغير طريقة تفكيرنا ونحلم صح

نيجى بقه للماتش اللى كدرنا فى عيشتنا وكرهنا فى الدنيا والعيشة الله يخرب بيتك يا امريكا علطول معكننة علينا حتى فى الكورة يلا الحمدلله اننا خسرنا الماتش بس طالما المعونة بتيجى دى اهم حاجة وبعدين عشان خاطر الراجل الطيب اللى اسمه اوباما ده بس انشاء الله بعد قول عشرين اربعين سنة هنقابل امريكا مرة تانية وساعتها نكون بطلنا ناخد منهم معونة قولوا يارب فنقدر نكسب ونقدر نرفع عينا فيهم ,اصل الامكان طبقا علينا المثل المصرى بتاع اطعم الفم تستحى العين هى دى بقه نقطة الموضوع اللعيب بتاعتنا مكانتش قادرة ترفع عينها فى لعيبة امريكا طبعا دول عملوا خدمة وطنية لمصر لما اتغلبوا يعنى كاس القارات والمعونة الكورة ولا المم طبعا الاكل اهم اهم اهم

انا لسه هناك برضه لسه مجاتش هنا اتغلبنا وكله تمام وكسبنا احترام العالم والاهم من كده المعونة اللعيبة مكانتش قدر ترفع رجلها فى الملعب ولا عينيها فى الامريكان واحنا عرفنا السبب لازمتها ايه نقول جابو بنات الفندق ومش عارف ايه كلنا عارفين ان اللعيبة مكانتش قادرة تلعب عشان خاطر بذلوا مجهود خرافى فى ماتش ايطاليا وماتش البرازيل بالاضافة ان هى دى مصر وهما دول المصريين كلنا كده بنعمل الصعب ونيجى فى السهل ومنعرفش نعمل اى حاجة فى افريقيا 2006 خدنا البطولة من غير من نهزم المغرب اللى هى كانت فريق ضعيف وقتها ومع ذلك هزمنا كوت دى فوار وفى 2008 معرفناش نغلب زامبيا وغلبنا الكاميرون بالاربعة هو ده طبع المصريين
على فكرة ده اللى من هناك لان لسه مجيتش لحد دلوتى عشان كده للحديث بقية
* كل الصور من موقع يلا كورة

اوباما جاى يزور مصر طبعا زى اى ضيف ينور ويشرف ويا الفين مرحبا باوباما وصحبته الحلوة على الرغم انه مش هيقعد اكتر من كام ساعة الا انه ضيف من العيار التقيل جدا يعنى من الضيوف اللى تستاهل ندبح لها بس طبعا احنا مش هنعمل كده عان مش ناقصة اتهامات بالهمجية والعنف
وطبعا لان المدونة دى انا عاملها عشان الضحك والفرفشة وساعة الحظ اللى مش بتتعوض فمالنا دعوة بوجع الدماغ اللى اسمه السياسة لكن انا هبص لزيارة اوباما من ناحية تاني خالص

منذ ان اعلان اوباما عن زيارته التاريخية الى قاهرة المعز والدنيا اتقلبت فى القاهرة وبدان الناس تفكر هتعمل ايه مع الحاج اوباما اه محدش يستغرب الحاج اوباما اصل احنا كده اى حد يزورنا نقول عليه حاج وهو يعنى الحاج ابوما مش زى الحاج نابليون ولا زى الحاج هتلر على فكرة هما كانوا بيقولوا لينا فى كتب التاريخ كده ان هتلر ونابيلون سموا انفسهم بالحجاج عشان يتقربوا من الشعب المصرى

وطبعا الشعب المصرى الكريم مش هيسكت وهيقوم باعمال بطولية كتيرة انا اتخيل مثلا ان مجموعة كتير من الناس هتواطى على رجل اوباما تبوسها وميعملوش كده ليه والراجل جايب معاه 50 مليون دولار معاونة اذا كانت حتة وزيرة من اسبانيا جايبة معها 2ونص مليون والست الوطنية العظيمة باست ايدها اثبت ليها بالدليل القاطع اننا فى عرض كل دولار وتعاطفك لوحده مش كفاية ويعود لك فى عينك وعفيتك وكل مصطلحات الشحاتة اللى احنا كا شعب غلبان ابتكرها
بس للاسف لان الحكومة بتعمل فى اتجاه والشعب بيعمل فى اتجاه تانى خالص يعنى فى الوقت اللى الشعب فيه بيظهر على قيقته وبيفضل انه يقول الحقيقة تلاقى الحكومة بتحب تكدب وتتجمل وعمال تنضف القاهرة وترصف الشوراع وتزرع ورد وتدهن الحيطان قال يعنى احنا بلد نضيفة ولا بلد متحضرة وميعرفوش ان الحاج اوباما لما يشوف كده ممكن يقول اللى امال بتدعوا الفقر ليه يا اولاد 0000 ويمنع عننا المعاونة او حتى يقلللها واحنا كا شعب مش هنخسر حاجة لان احنا اصلا مش بنشوفها لكن انا من منطلق خوفى على الحكومة بنصحها وبقول لها تسيب الدنيا على حقيقتها

بس ارجع واقول لنفسى هو حد يكره النضافة اهى اى حاجة تيجى من الحكومة مصلحة شارع يترصف ورد يتزرع جامعة تنضف بس ارجع واقول طيب افرض هما بعد زيارة لموا الحاجة دى كلها تانى زى ما بيعملوا كل مرة يبقى ايه الحل ولا المصيبة الاكبر لو سابوها الناس هتتعمل مع النضافة والشيكة دى ازاى ولا شوف بتوع القلعة هيعملوا بتوع الزمالك ولا المعادى ازاى بعد ما الحاج ابوما يزورهم وشورعهم تنضف وتتسفلت ولا حد هيعرف يكلمهم طبعا ومش بعيد اى حد منهم يقوم فاتح قهوة ويسمها قهوة الحاج اوباما ويقعد يحكى لودله بعد 20 سنة ان اوباما ده كان صحبه الروح بالروح وانه مجاش مصر الا عشان يزور القلعة مخصوص وعشان يسلم عليه ويقعد معاه شوية على القهوة

وعلى العموم انا فى واحد صحبى قالى انه هياخد يوم الخميس اجازة عشان خاطر اوباما وانه نفسه يعزمه على كباية شاى تقديرا منه لدور اوباما فى منحه اجازة كان فعلا محتاجها وانا بضم صوتى لصوته وبعزم اوباما على الغدا عندنا فى البيت على امل ان الحكومة تنضف الشارع بتاعنا وتزرع شجر وورد مستورد زى ما عملت فى الجامعة ويارب اوباما يوافق

معرفش مشيت ليه ومعرفش رجعت تانى ليه ومعرفش هكتب ايه لكن المهم انى من جديد بكتب تانى
والله محتار مش عارف اكتب ليه او حتى اكتب ايه او اكتب لمين
ما الناس كلها بتتكلم والكلام زى الكتابة مش بيغير الواقع يعنى انا لما اكتب مش هغير اى حاجة بس هبقى بتكلم زى اى حد تانى ماشى فى الشارع ولا راكب الاتوبيس وبيتكلم ,متهيالى احنا محتاجين نعدى مرحلة الكلام وندخل على مرحلة الفعل بس ده طبعا

فى المشمش عشان احنا اصلا مبنعرفش غير الكلام ومتعلمناش غير الكلام
طيب هاه وبعدين طالما انا مش ناوى اعمل اى حاجة غير الكلام وانتوا كمان زى بالظبط نحاول على الاقل يكون الكلام مفيد شوية انا مش عارف مفيد ازاى بس الحقيقة انا كرهت الكلام حاسس انه بيستهلك منا طاقة كبيرة جدا الواحد بيصحى الصبح من النوم على ما يوصل الشغل بيكون اتكلم كتير وعلى ما يخلص الشغل ويرجع البيت بيكون اتكلم كتير جدا جدا وفى النص بين الكلام الكتير والكلام الكتير جدا بيكون بكل اسف اشتغل قليل جدا جدا جدا
احنا محتاجين نقسم الاسبوع من جديد نغير اسماء الايام كمان لو لزم الامر ,مثلا يوم الاتنين يكون يوم من غير كدب انا عارف ان ده مستحيل بس خدوا بالكوا انى بتكلم زى ممعروف ان الكلام مش عليه جمرك ولا حتى ضريبة ربنا يستر والحكومة متاخدش بالها من الموضوع وتعمل ضرايب على الكلام كمان وتجيب الراجل بتاع اعلان الضرايب الاخ الصوت بس مش محمد شومان يقول لينا مفيش داعى للقلق ده الميت كلمة بخمسة جنيه بس يارجل هو فى حد بيتكلم ميت كلمة فى اليوم
رجعنا تانى للكلام اللى ملهوش لازمة لكن اهو برضه كلام نرجع للاسبوع اللى معرفش بداته بيوم الاتنين ليه ونروح ليوم الثلاثاء وليكن يوم بلا خناق يوم التسامح المصرى بلاش تتخناق مع بتاع الميكروباص وبتاع الفول والراجل اللى داس على رجلك فى المترو الصبح يوم يعدى كده من غير تكدير لاى حد بلاش ترجع البيت وانت مش طايق عيشتك خليه يوم يعدى كده كانه حلم تسامح وبس, ميحدش يحاول يعمل كده فى الحقيقة اللى يدوس على رجللك فى المترو طلع عين اهله ده كلام وبس محدش ينسى

نروح ليوم الاربعاء الاسبوع قرب يخلص نحاول يوم الاربعاء ده يكون يوم الذمة كل حاجة تتعمل بذمة واللى بيعمل الحاجة بذمة يعملها بذمة اكتر نحاول نختم الاسبوع باكبر قدر ممكن من الانتاج فى الشغل ,يعنى يكون يوم حكاية الواحد يطلع فيه اقصى ما عنده من ابداع وانتاج فى الشغل ,طبعا ده كلام محدش ينسى ويتجنن ويحاول يعمل كده فى الحقيقة
الخميس مش عارف ليه حسيت انى بغنى الاغنية بتاعت كريم ابو زيد ما علينا الخميس ده يوم الفن عيش اليوم من اوله لاخره بروح الفن جوك اعمل شغلك بفن عامل الناس وكانك فنان مبدع بص للشوراع نظرة جديدة كانك عمر خيرت ولا بيكاسو بيجلك الالهام من منظر اتوبيس متكربس ناس او فرن عيش واقف فيه ميتين بنى ادم روح السينما اليوم ده وبلاش يكون الفيلم عربى ده نصيحة اخوية اتفرج على فيلم حلو اسمع الاغانى الجميلة اللى انت بتحبها حط نفسك فى مود الفنانين شوف الدنيا بعيون تانية
بجد على الرغم من انه كلام بس فعلا اليوم كده هيكون تحفة

الجمعة طول عمرى بحس انه يوم عائلى مينفعش الواحد يعمل اى حاجة الجمعة غير انه يقابل اهله اللى دنيا طحنتهم طول الاسبوع يتناس بيهم ويتنسوا بيه مش لازم يتكلموا ومش لازم يكون اكتيف اوى بس كفاية يقعدوا مع بعض على الغدا او حتى يشربوا سوا كباية شاى بعد العصر يحسوا بالراحة النفسية الموجودة بين الاهل والقرايب
السبت اجازة وفككوا منى كل واحد يعمل اللى على مزاجه ان شاء الله حتى يولع فى نفسه عشان انا اتخنقت منه
والاحد اول ايام السبوع لو بدانا اليوم ده بشوية رياضة نضيع بيهم كسل يومين الاجازة الاسبوع هيكون لذيذ انا شخصيا بكره اول يوم شغل بعد الاجازة بحس انهم خدونا من الدار للنار عشان كده بفكر ناخد يوم الاحد اجازة كمان وانشاء الله محد حوش

نحكم عقلنا
نحكم عقلنا هنشرب كلنا ونتعلم كلنا ونتعالج كلنا وحياتنا هتبقى فل الفل كمان دى الحملة الجديدة اللى اطلقتها معرفش مين فى الدولة الكريمة بتطالب بتحديد النسل وكأن المشكلة كلها ف الزيادة السكانية اللى عملين يصورها على انها غول هياكل كل موارد البلد او الللى فاضل منها قصدى اللى لسه متهربش على بنوك سويسرا مع ان زيادة النسل وبعيد عن الناحية الدينية مصلحة قومية للبلد وده عشان احنا تفوقنا على اسرائيل تفوق عددى وكمان بالطريقة الجميل دى التفوق العددى ده هيختفى وبين لحظة والتانية هتيجى اسرئيل تاخد الغاز بايدها
طبعا الاعلانات اللى متعلقة ف الشارع اعلانات سمجة زى كل حاجة بتعملها الحكومة ونحكم عقلنا مع ان احنا لو حكمنا عقلنا مرة واحدة هنسيب البلد ونهرب و عشنا كده احسن ليهم انهم ميفكروناش اننا عندنا عقل من اصله ويخلونا كده عايشنا زى ما احنا من غير تفكير ووجع دماغ

قانون المرور الجديد
الناس عمال تشتكى من قانون المرور الجديد واحنا هنستعير جملة من فوق وهى نحكم عقلنا وبكده كل اللى عنده عربية هيبعها وينفد بجلده من القانون المرعب الجديد وده طبعا احسن له من انه يبعها عشان يدفع المخالفات والغرامات الفورية اللى لن ينجوا منها احد باذن الله وبعدين ما الناس تركب عجل ده فى الصين مبيركبوش غيره وكمان كده توفر ثمن البنزين وما ادرك ما ثمن البنزين اما بالنسبة للمثلث الضوئى هما معهم حق فى الفكرة دى يعنى كده ارخص لما كل واحد يشترى مثلث ولا لما الحكومة تضطر تنور الشوراع كلها طبعا كده ارخص,وبعدين هما لو كانوا عايزين يعقدوا الناس كان قالو كل عربية يكون فيها شنطة طبية وشنطة اكل وشنطة هدوم عشان الناس اللى بتتاخر فى الاشارات بالساعات ممكن تجوع او حاجة لكن هما تخفيفا منهم على الشعب قالوا شنطة طبية بس

دار الافتاء تنتظر الافتاء
صدرت قتوة من دار الافتاء بتاكد انه مينفعش تولى امراة رئاسة الجمهورية بعدها بفترة قصيرة صدرت فتوة تانية من دار الافتاء بتقول انه ينفع وزى الفل دى زى ما قرات على مواقع النت
والحقيقة ان دار الافتاء المصرية دوختنى معها لدرجة ان احيانا بحس ان اسمها الافتاء جاية من الفتة وبعدين دى مش اول مرة ومش هتكون اخرة يقولوا فتوة ويرجعا فيها وده طبعا عشان زى ما نتوا عارفين الفتوة دى بتكون من القلب والقلب كل ساعة بحال وسبحان مقلب القلوب

حاجة تحير
اكتر حاجة بقه فى الدنيا بتحيرنى ان احنا مشاكلنا كل يوم بتزيد والمشاكل القديمة مش بتتحل وتطلع مشاكل جديدة وهكذا لدرجة انه بقه عادى ان يطلع وزير فى المصرى اليوم يقول انتظروا المجاعة وقال يعنى احنا مش بنعنى منها دلوتى الحقيقة احنا بقه عندنا بلاهة وجمود فى مواجهة المشاكل بقت عادى او بقيت عادة حتى انا وانا بكتب الكلام ده مش فارق معايا وكل اللى هيقراه برضه مش هيفرق معاها حاجة