المصري الجديد

اسف على الازعاج ده الفيلم بتاع احمد حلمى الجديد هو حلو بس الحقيقة معجبنيش اوووى بس اكتر مشهدين فيه عجبونى بتوع محمد شرف بجد يستاهل عليهم اوسكار

الحقيقة انا مش جاي اتكلم عن الفيلم انا جاي اتكلم عن حاجة تانية اكتشفتها من الفيلم اكتشفت ان احنا كلنا قصدى الشعب المصرى الغلبان عاملين زى احمد حلمى بالظبط فى الفيلم هو كان بيتخيل ان ابوه موجود وعايش معاه واحنا كلنا بنتخيل ان فى حكومة موجودة وعايشة معانا والمفروض انها بترعى مصالحنا
لكن الحقيقة والواقع زى الفيلم تماما ابو احمد حلمى ميت وشبع موت وكذلك الحكومة المصرية ماتت وشبعت موت واقرب دليل على كده قانون المرور الجديد الناس كلها عمالة تشتكى وتصرخ لكن لا حياة لمن تنادى ومش بقصد بالناس عامة الشعب ولا الناس الغلابة اللى متفهمش حاجة من وجهة نظر الحكومة انما اقصد الناس المتخصصة واللى بتقول لغاية ما صوتها اتنبح ان القانون الجديد ده معوق لكن مصيرنا هيجى علينا يوم ونعرف ان الحكومة ماتت وشبعت موت
بلاش قانون المرور الجديد بص لاى مشكلة مثلا ممدوح اسماعيل والحقيقة انا مجرد اسمه بيجبلى ارتكاريا فى الوقت اللى الشعب كلها مستنى يتحكم عليه ويتسجن صحيح هو كان هيروح سجن 5 نجوم لكن اهو على الاقل اسمه اتسجن يطلع براءة والمفروض انه لا معقب لحكم القضاة بس متهيالى انه لم يكون مش مظبوط لازم الناس كلها تعلق وتقول رايها
بلاش ممدوح اسماعيل بص للغاز اللى عمال يتصدر لاسرائيل واحنا فى المواسم الانبوبة بيوصل سعرها لعشرين جنيه ولو لقيتها من غير انبوبة ولا حاجة فى الوقت اللى الشعب كله بيرفض فكرة التعامل مع اسرائيل تلاقى الحكومة بتصدر الغاز ليها وكان احنا مش موجودين

وبكده بقينا عاميلن زى فيلم lake house
كل طرف فينا مقضيها بدماغه وده بيفكرنى بجملة شهيرة مش عارف مين اللى قالها”خراب يا مصر عمار يا دماغى” الحقيقة طول الوقت بسال نفسى سؤال محيرنى جدا ليه كل يوم مشاكلنا بتزيد ومفيش ولا مشكلة بتتحل يعنى برجع واسال هى فين الحكومة اللى مسئولة عننا وبعدين اكتشفت المبدا اللى الحكومة المصرية شغالة به هو انتوا فاكرين الحكومة هتعمل ليكوا كل حاجة جتكوا البلاوى مليتوا البلد وعشان كده الحكومة مش بتعمل اى حاجة وبعدين كفاية علينا اووى نحلم ان بكرة احلى ومصر بكرة هتكون وهتكون وهتكون والحمدلله انهم لسه معملوش ضرايب على الاحلام كمان بس مش بعيد فى القريب العاجل ده يحصل بعد ما عملوا الضرائب على العقارات وبقينا كلنا مستاجرين بيوتنا جوه البلد كلها كام سنة كمان ويحتاجوا فلوس تانى وساعاتها هيعملوا ضرايب على الكلام وعلى الضحك وعلى الاحلام مش بعيد يعملوا زى الرومان وياخدوا ضريبة على كل مولود جديد امال يعنى ممدوح اسماعيل اللى زيه يعيشوا منين

وبعدين انا خلاص زهقت وفاض بيا مش عارف اعمل ايه فى ايه تحس كده ان محدش فاهم حاجة كل واحد فى 75 مليون عايش بدماغه لوحده يعنى زى ما قال محمد شرف برضه بس فى فيلم ظرف طارق انا رئيس جمهورية نفسى الحقيقة انا تهت ونسيت كانت عايز اتكلم فى ايه بس عادى ما انا كمان رئيس جمهورية نفسى ومحدش ليه حاجة عندى

انا خدت الاجازة وانشاء الله النتيجة تطلع وانجح واتخرج من الجامعة وانطلق فى الحياة العملية بس اكتشفت حاجات مهمة جدا
الجيش والشغل
ان النتيجة يتطلع حلوة وانجح يتطلع لا قدر الله واحشة واسقط لو سقطت مش مشكلة بس لو نجحت يا اما هدخل جيش ياما مش هدخل لو مدخلتيش مش مشكلة انما لو
دخلت يااما هدخل سنة واحدة يا اما هدخل تلات سنين لو سنة مش مشكلة اهى هتعدى بسرعة لكن لو دخلت تلات سنين يا هخرج سليم يا اما
مش هخرج اصلا لو مخرجتش مش مشكلة لكن لو خرجت ياما ادور على شغل يا اما اقعد عاطل لو قعدت عاطل مش مشكلة بس لو دورت على شغل يا اما الاقى يا اما ملاقيش لو لقيت مش مشكلة بس لو ملاقتيش يا اما هدور تانى يا اما هكتئب وانتحر لو انتحرت مش مشكلة بس لو دورت تانى يلاقى شغل فى شركة يلاقى فى مكتب محامى لو لقيت فى شركة مش مشكلة انما لو لقيت فى مكتب محامى لانه هيكون تدريب يا اما يدينى فلوس يا اما ميدنيش فلوس لو مخدتش فلوس مش مشكلة بس لو خدت ياما هتكفينى يا اما مش هتكفينى لو كفيتنى مش مشكلة بس لو مكفتنيش ياما هرجع ادور على شغل تانى يا اما هنتحر لو انتحرت مش مشكلة لو لقيت شغل تانى يا اما هيكون حلو يا اما هيكون وحش لو كان حلو مش مشكلة اما لو كان وحش يا اما هسيبه يا اما هكمل فيه لو سيبته مش مشكلة لكن لو كملت فيه ياما مع الوقت اتعود عليه يا اما اتخنق منه واتخنق من نفسى وانتحر لو انتحرت طبعا مش مشكلة بس لو كملت فيه يعنى كده خلص موضوع الشغل وهدخل على مرحلة تكوين نفسى

عايز اتجوز
وبكده يا اما الفلوس هتكفى احوش
منها يا اما الفلوس مش هتكفى لو مكفيتش مش مشكلة لكن لو كفت ياما هلم تمن المهر والشبكة فى عشر سنين ياما هلمهم فى اكتر من كده لو لمتهم فى عشر سنين مش مشكلة بس لو لمتهم فى اكتر من كده هكتئب وطبعا هنتحر ولو انتحرت طبعا مش مشكلة لكن لو منتحرتش هروح اتقدم لعروسة وياما اهلها يوافقوا يا اما ميوفقوش لو موفقوش مش مشكلة لكن لو وفقوا يا الفلوس اللى انا عمال احوش فيها من اول البوست تكافى يا اما متكفيش لو كفيت مش مشكلة لكن لو مكفتيش هكتئب عشان هسيب العروسة اللى كنت بدات
احبها وطبعا هنتحر لو انتحرت مفيش مشكلة اما لو كفيت يا هتجوز يا مش هتجوز لو متجوزتش مفيش مشكلة اما لو اتجوزت
فالمصاريف بتاعتى يا هتزيد يا اما مش هتزيد لو مزدتيش مفيش مشكلة انما لو زادت ياما ادور على شغل تانى يا اما اكل مرة واحدة فى اليوم لو اشتغلت شغل تانى مفيش مشكلة اما لو اكلت مرة واحدة فى اليوم يا هيجلى انيميا يا هموت من الجوع لو مت مش مشكلة انما لو جالى انيميا يا هيتعالج يا اما برضه هموت

ابو العيال
بعد ما اتجوز يا اخلف يااما مخلفش لو مخلفتيش مفيش مشكلة انما لو خلفت يا اما اجيب واد يا اما اجيب بنت لو خلفت بنت مفيش مشكلة اما لو خلفت ولد يا اما يكون معايا فلوس اعلمه واربيه يا ام ميكونش معايا فلوس للحاجات دى
لو كان معايا فلوس مفيش مشكلة انما لو مكانش معايا فلوس يا اما الواد هيطلع محترم يا اما الولد هيطلع بايظ لو طلع محترم مفيش مشكلة اما لو طلع بايظ يا هيشرب مخدرات يا اما هيسرق لو سرق مفيش مشكلة انما لو شرب مخدرات يا اما هيكون معاه فلوس يشرب بيها يا اما مش هيكون معاه فلوس
يشرب بيها لو كان معاه فلوس مفيش مشكلة انما لو ماكنش معاه فلوس ياما يسرقنى يا اما يقتلنى عشان يورثنى لو سرقنى مفيش مشكلة انما لو قتلنى ……ا
نتائج التفكير
بعد ما شوفت شريط حياتى قدامى بيجرى كده اقعدت اصرخ واقول هى دى عيشة هى دى عيشة وبعدين اكتشفت انى فى خلال 30 سنة بنتحر وبموت
وبتقتل يجى 20 مرة فقولت اخدها من قصيرها وانتحردلوتى اوفر المصاريف وهوب رحت ع البلكونة ونطيت لكن الحمد لله جت سليم وصحيت لقيت نفسى مرمى من على السرير ع الارض

الحقيقة حسيت انى بقالى كتير مكتبتش حاجة فى المدونة فقعدت افكر اكتب عن ايه؟ بقالى كتير منزلتيش الشارع ومشوفتيش التليفزيون ومقراتيش جرايد ومدخلتيش على موقع الاخبار ف معرفش الدنيا بره فيه ايه؟؟
وبعدين رجعت قولت هو هيكون ايه حصل جديد , وعشان كده انا اكتب عن اى حاجة قديمة وانتوا طبعا مش هتاخدوا بالكوا او هتاخدوا بالكوا بس مش هتفرق معاكوا

فقررت اكتب عن رغيف العيش ازاى فى معاناة فى الحصول عليه وازى الناس بتموت وهى بتحاول تجيب رغيف العيش وبعدين افتكرت حاجة كنت كتبتها من حوالى سنتين عن طابور العيش وان له فوائد عظيمة فى مصر منها ان مزار سياحى وخصوصا انهم لقوا مومياء فروعونية وقفة فى طابور عيش فى بولاق ,وبعدين رجعت قولت ما الناس كلها اتكلمت عن العيش وفرن العيش وطابور العيش والدقيق اللى بيتعمل من العيش لغاية ما شبعت من الكلام

وبعدين فكرت ان اكتب عن العلاوة والبنزين اللى سعره ولع, والزيت والسكر وكده وبعدين اكتشفت برضه ان الدنيا كلها اتكلمت عن الموضوع ده وكله اقترح حلول وحصلت اضربات وناس اتعورت وناس مات ,وقعدت افكر فى فايدة او ميزة واحدة للعلاوة اللى خربت البيوت دى(اول مرة اسمع واشوف علاوة بتخرب البيوت)واكتشفت ان العلاوة دى ليها ميزتين اول واحد انها قررت ان العلاوات ممكن تكون من غير حد اقصى وتانى ميزة ان الناس فرحت بسببها بتاع نص ساعة ولا حاجة

وبعدين رجعت افكر اكتب عن ايه تانى وبلدنا منبع صافى للمشاكل اللى عايز يجيب قفة ويجى يشيل منها براحته وهو ده سبب حيرتى مش عارف اختار بلوى اكتب عنها ,وبعدين افتكرت حاجة كده هو الراجل بتاع عبارة الموت اللى اسمه ممدوح اسماعيل ده راح فين دلوتى وبعدين قولت اكيد موجود فى سجن المشاهير وبعدين افتكرت ان دى مصر يا عبده واكيد دولتى هو بيقضى الصيف فى فرنسا

وبعدين قمت اعمل شاى ولقيت الانبوبة فاضية فرجعت وانا متعكنن وافتكرت موضوع الغاز اللى بيصدر على جارتنا وحبيبتنا المعلونة اسرائيل ,وبعدين سرحت كده وشوفت واحد اسرائيلى حقير دلوتى بيفتح البوتجاز بتاعهم وبيعمل شاى على الغاز المصرى بتاعنا ,واحد مصرى اللى هو انا يعنى مش لاقى انبوبة يعمل بيها الشاى فوقفت فى الشباك ورفعت ايدى للسما قولت ادعى ربنا وافتكرتى فجاة انى ممكن اروح المحكمة فدخلت من الشبكة ودعيت وهو مقفول على اللى كان السبب (قصدى بتاع الانبايب اللى بقاله يومين مجاش)ا

وبعدين طبعا ورد فعل طبيعى للفوق ده جالى اكتئاب وانفجرت فى العياط وفكرت انتحر وقررت ما اكتبيش حاجة واقوم انام

البوست ده للرجل فقط ممنوع دخول البنات والسيدات و كل الانثوات

الستات اخطر المخلوقات على وجه الارض من فجر التاريخ ولحد دلوتى حتى ايام الفراعنة كانوا بيسموا اله الشر”ست” يعنى الستات اصل كل البلاوى والمصايب اللى فى الكون وفى كل الازمان ولو مش مصدق شوف واحكم
شمشون الجبار اللى كلنا نسمع عنه وصاحب الجملة الشهيرة عليا وعلى اعدائى قبل ما يهد المعبد حد كده يفكر ويقولى ايه مشكلة شمشون وايه اللى حطه فى المازق ده انا اقولك واحدة ست(دليلة) ضحكت عليه وبعته لاعداءها اللى مكانوش قادرين عليه
يمكن ضحكة عليه باكلة مسبكة وبعد ما اتغدا وقالها تسلم ايدك حلقتله شعره ,يمكن ضحكتله ضحكة كده من اياهم وقامت ضاحكة عليه , يمكن عيطت ونزلت دمعة من عنيها واقوى سلاح فى الكون هو دمعة نسائية

نيجى لمصيبة تانية فى التاريخ من مصايب المراة والستات وما اكثرهم
انطونيو كان فارس وقائد جيش واسمه يهز رجال بشنبات جت كليوباترا (واللى اسمها مضر بالصحة اصلا وعمرنا ما سمعنا عن راجل اسمه مضر بالصحة) ضحكت عليه وخليته زى الاهبل وبعد ما كان قائد منتصر بقه مهزوم ومدحور ولا يساوى قرشين فى سوق الرجالة اصحابه بنصحوه مفيش فايدة هو فى من القدر هروب وامه تنقى له عروسة حلوة من روما يتجوزها وبرضه يرجع لكليوباتر من تانى فضلت ورائه لحد ما جبت داغه وخليته يا عينى من الاكتئاب انتحر

والامثلة التاريخية كتيرة ده حتى كينج كونج اللى هو مش انسان برضه مفيش فايدة ضحكت عليه واحدة ست لغاية ما بقى جوه القفص بس

خد عندك قيس مثلا كان راجل زى الفل وكان زينة شباب القبيلة لحد ما جت ليلى ورمت عليه شباكها ومن ساعاتها الراجل يا عينى حاله اتشقلب بقه مقضيها شوية مخدارات وشوية يهيم على وجه فى الصحراء بقه من الاخر اهبل واكتر من كده كمان ده كل ده ومتجوزهاش امل لو كان اتجوزها كانت عملت فيه ايه
والحقيقة اللى لازم نقولها ان مفيش حد مشهور وعظيم اللى وكنت المراة جزء من كيانه وعشان طلعت الاسطورة اللى بتقول
وراء كل عظيم امراة
ولكن لم يذكر احد ماذا تفعل المراة وراء هذا العظيم فهى غالبا تحفر له قبره او بتسوم اعدائه عشان تبيعهوالامثال فى العصر الحديث مفيش اكتر منها
بصوا لعدد الوفيات هتلاقوا الرجالة كل يوم بيموتوا من حسرتهم والستات قاعدين فى الدنيا بلاش بصوا للثقافة النسائية من خلال الامثال الشعبية
وري جوزك دمعتك ولا توريه لقمتك . فى طفاسة اكتر من كده طيب بلاش فى راجل يقدر يقول كده
اقلب القدرة على فمها تطلع البنت لامها دول بيتورثوا الصفات الجميلة سابقة الذكر الام بتعلمها لبنتها
وبعدين فى مثال حى على كلامى ده كوندليزا رايس اتفرجوا عليها واحكموا

وطبعا انا عارف ان ممكن بكرة الاقى مظاهرة تحت بيتنا ولا يحصل اسوء من كده عشان كده انا بهزر وكل الكلام اللى فات ده هزار انتوا عارفين الحر وكده

انا شوفت الدعاء الجميل ده على النت فنقلته هنا وحطت عليه شوية ابداع من عندى عشان يبوظ المهم فى الاخر كله يقول امين

ربنا يبعد عنك الاشرار….. ويجعلك فى كل خطوة دولار

ويبعد عنك ولاد الايه ……..ولا يخيبك خيبة الجنيه

ويجعل اعمالك كلها حسنات….. ويكفيك شر المخالفات

ويحوش عنك كل الشرور …..ويكفيك شر كمين المرور

ويكون لك دايما فى العون….. ويكفيك شر فاتورة التليفون

ويسعدك فى كل حين….. ويكفيك شر المستثمرين

ويجعلك كل الناس حبيايب …..ويبعد عنك بتوع الضرايب

ولا يجعل عيالك محرومة …..ولا يخيبك خيبة الحكومة

وتعيش عيشة هنية …..وتبعد عن المديرية

ويجعل اصحابك كلهم اخلاص …..ويكفيك شر سواقين الميكروباص

يحميك يابنى من ابليس….. ويكفيك شر سواقين الجيش والبوليس

وينور طريقك بالبركات …..ويبعدك عن العبارات و القطارات

ويحميك من كل رزية ……ويكفيك شر المطبات المستخبية

بدعيلك وبدعى لاولادى…… يكفيكم شر الركود الاقتصادى

ويكتر فى جيوبكم النقدية …….ويكفيكم شر الدروس الخصوصية

ولا يحرمكم من اكل الفول …….ولا يخرب بيتكم بفواتير المحمول

ويرزقك فى كل زمان……. ويبعدك عن كل الاقسام

بدعلك وبقول يارب لا تخش جيش ……ولا تقف فى طابور العيش

وتعيش عيشة السعداء….. اللى فى الكويت او ضرماء

اللهم امين

دول شوية نصائح عصارة افكارى وخبرة 21 سنة فى مصر بقدمها ليكم على الجاهز لعل وعسى حد يستفيد منها

اول حاجة نبدا من يوم الوقفة بعد ما تفطروا كده وتقضوا يومكوا وتنزلوا عشان تخربوها فى الواقفة كل انواع المخدارت والخمور متاحة واطمنوا مفيش توجد امنى البوليس عارف ان بكرة عيد وهيسيبوا الناس تتبسط

بعد ما تخرب وماتبقش دارى بحاجة لو حبيت تروح سينما بلاش سينما وسط البلد عشان هتبقى زحمة جدا واستنضف وخش سينما من الغالية , وطبعا لازم تحجز من الحفلة اللى قبلها عشان برضه هتكون زحمة وبعد ماتخرج من الفيلم اللى غالبا هيكون هابط زى كل الافلام فى مصر وخصوصا فى العيد ممكن تتعشا او تفطر حسب الحفلة اللى انت كنت حاجزها وبرضه اطمنك ان كل مطاعم التيك اواى هتكون فاتحة ومستنياك

وانت رايح تصلى العيد -ده لو هتروح- خد معاك مصلية عشان مش هتلاقى مكان فوق السجاد تصلى عليه وكمان تخلى بالك من شبشك وتخلى عينك عليه ,وتحاول تنقى مكان جنب الباب عشان اول ما الصلاة تخلص تكون اول واحد فى الشارع قبل الزحمة ما تخنقك ومتعرفش تخرج من الباب

لو هتخرج بالنهار (هذا الجزء مخصص للعائلات)وطبعا مفيش شباب بتخرج فى النهار اسهل وسيلة موصلات هى المترو والدنيا هتكون زحمة بغباء وابعد عن الجناين عشان هتكون مزروعة فسيخ وانا مش بحبه وكمان متحاولش تقرب من النيل ولو روحت الملاهى هتكون زحمة جدا ومش هتعرف تركب نص اللعب ولا روحت الهرم مش هيرضوا يدخلكوا عشان انت مصرى وطبعا السينما برضه هتكون زحمة وفظيعة  ومش هتعرف تقطع تذاكر اصلا والدخول والخروج هيكون ببهدلة فاحسنلك تصلى العيد وتروح تتفرج على التليفزيون

لو هتخرج بعد العصر ابعد عن مناطق التحرشات وهى المنطة الشمالية والمنطقة الجنوبية والمنطقة الوسطة خصوصا مناطق التواجد الامنى الكثيف,وابعد عن الشر وغنى له ومتحاولش تسال اى فرد فى البوليس عن اى حاجة عشان بيكون صعبان عليهم انك بتعيد وهما لا عن تجربة شخصية وهيعملك بشكل زبالة فوق المعتاد ولو هتخرج العصر احلى حاجة تعملها انك تتغدا بره  وتروح علطول

هام جدا للسادة محبى الفسيخ والرنجة وباقى الانواع المملحة متفتروش فى اكل الحاجات دى عشان غالبا نص اللى فى السوق فاسد ومنتهى الصلاحية زى كل عيد واللى هتعرفوا بعد العيد ما يخلص ان الحكومة اعدمت كل الفسيخ الفاسد ماعدا اللى انتوا كلتوه بس وياريت تكتروا البصل والليمون فى محاولة يائسة للحد من الخطورة

اما الناس اللى قضوها فى الواقفة ولسه صاحيين من النوم دلوتى فبعد مايفطروا ويتغدوا ويتجهوا للشارع هيقضوها زى الوقفة بالظبط

ونصيحة اخيرة محدش يحاول يخرج او ياكل او يشرب فى العيد  ومحدش يسالنى ليه

وفى النهاية كل سنة وانتوا طيبين وعيد سعيد انشاء الله

مفيش جديد فى الدنيا كلها  فلو انت مستنى خبر جديد ولا خبر نص نص اكيد مش هتلاقى هنا فاماتقراش للاخر

عشان مش هتلاقى

لقيت واحد بعتلى لينك بتاع موقع بينقد فيه وائل عباس بتاع الوعى المصرى بشدة وبيشتمه احيانا طبعا اول حاجة جات فى بالى انه هيكون تبع البوليس على اعتباره انه فى خيالى العدو الاول  للشعب وبعدين قاعدت افكر امسح التعليق ده ولا اسيبه وبعدين قررت اسيبه على اعتبار ان من حق اى حد يقول اى حاجة بالادب وطالما مقلش ادبه مفيش داعى اشيله وحق الرد مقفول

وبعدين الصراحة برضه خوفت يكون اللى كتب الرد  ده بوليس ويعلم عليا  وانا جبان موووووووووت انا بخاف من العصا والضرب على القفا,وبمشى جنب الحيطة زى ما اتعودات دايما

وبعدين ده ابراهيم عيسى اللى هو ابراهيم عيسى اتحبس وغرامة وعلى فكرة انا مش بحبه بس مش لدرجة الحبس فمابلكوا بالعبد لله  اللى ملوش لا ضهر ولا بطن ولا حد فى الدنيا غير ربنا وربنا يجعل كلامنا خفيف عليهم

وحاجة غريبة تانى توضح ادى ايه احنا شعب متناقض فى رمضان فى الوقت اللى الجوامع بتتملى فيه ولناس كلها بتحاول تقرب من ربنا تلاقى الناس كلها مش طايقة نفسها وطول النهار خناقات خناقات وشتيمة واحيانا سب دين معرفش ازى بس اللى خلى جامعة القاهرة فى الجيزة وحى الخليفة فى السيدة زينب يخلى الصبح شتيمة وبليل صلاة تروايح وطبعا واضح انى مش لاقى حاجة اكتبها فعمل اجيب حتة من هنا وحتة من هنا على العموم انا بدور على شغل عشان لو حد عندها وكل سنة وانتوا طيبين

ياريت اى حد يدخل

 عبرنى وردعليا و بلاش كتر اسية

بكلمة او بتنين وياريت لو يبقوا 100

انا عيان والكمبيوتر بتاعى عيان وامى عندها برد واخوايا كمان  مش عارف ادعى على مين

هدعى على الظالم والمفترى وابن الحرام

بعتذر للجماعة بتوع بنحب مصر ومش هنسافر و ومش هنموت وكده,عشان انا قررت فى اقرب فرصة هسافر او هموت وهسيب البلد لاهلها اللى انا وانتوا مش منهم وفارضين نفسنا عليهم هسيبها ليهم يشبعوا بيها انشاء الله حتى يقلبوها سوبر ماركت ده لو كانت لسه متقلبتش اصلا

ومش هرجع تانى لمصر وهعيش فى بلد جديد بكرامتى موفورة وقفايا متصان  بعيد عن ايد اللهم احفظنا رجال الشرطة الابرار,وهشتغل يعنى هلاقيه شغل واشتغل وشوية شوية هكبر فى الشغل ومين عارف يمكن ربنا يكرمنى واتجوز طبعا

انا عارف ان مفيش شاب فى مصر بيحلم انه يتجوز لان حتى الاحلام ليها حدود وفى مصر الواحد يحلم انه يتغد لحمة اول الشهر مثلا او يتعشى بره كده مثلا,ومحتمل يبقى عندى شقة تمليك مش ايجار جديد يا سلام هى دى العيشة

بس اسافر الاول

حتى مفيش نفس للكتابة الله يخرب بيت اللى كان السبب ويجحمه فى جهنم

وانا قاعد فاضى والفراغ واخد كل وقت قلت اهرب منه شوية واسرح واتخيل الدنيا هتبقى عاملة ازاى سنة 3000

فى مصر 

اصل انا فى الحقيقة مبعملش حاجة غير انى بتخيل وبسرح واشياء من هذا القبيل

اول حاجة عملتها فتحت التليفزيون وتليفزيون سنة 3000 مختلف عن تليفزيونا ت دلوتى كتيرررر جدا  اول حاجة مفهوش ولا قناة  يعنى مفيش ريموت انت تفتح التليفزيون وهو يقلب حسب الحالة المزاجية بتاعتك

ولقيت ماتش كورة شغال كاس العالم يارجالة  والاغرب والاعجب مصر بتلعب  طبعا عملت زى ابوتريكة وسجدت شكرا لله , وبعدين لقيت المعلق بيقول ان رغم هزيمة مصر للماتشات اللى لعبتها الا انها يكفيها شرفا انها وصلت لكاس العالم وطبعا هى وصلت لكاس العالم بصفتها الدولة المستضيفة!!!!!ه

لغاية هنا ومستحملتش قولت لما انزل الشارع اشوف الدنيا فيها دى سنة 3000 والجو تحفة ,اول حاجة خدت بالى منها ان الشوراع نضيفة وهادية ومفيش غير كام واحد بس اللى فى الشارع قولت بس ده اكيد مصر نظمت الاسرة وتعدادها السكانى بقه تمام , وبعدين لقيت واحد ماشى كده وشكله محترم قولت لما اساله  هى البلد فاضية كده ليه ؟؟

بصى ليا باستغراب جامد قولتله معلش اصلى مش من هنا ,رد وقالى اه ماهو باين على هدومك انت من الصومال ؟؟ قولت لا من بلد جنبها المهم فين الناس  قالى اصل ممنوع حد يمشى فى الشارع من بعد العصر واستغربت جدا وقولتله ليه كده قالى يوووه ده تطبيق لقانون الارهاب بتاع سنة 2007 وبقاله كده اكتر من 20 سنة

الحقيقة مررتى اتفقعت ومستحملتش وسيبت الراجل من غير ولا كلمة ورحت على محل جرايد قولت اجيب جرنال اتسلى فيه لغاية ما ارجع من تخيلى الاغبر ده

ولقيت جرنال كده شكله نضيف وبيلمع اسمه اشطة يا مان, قولت ده شكله جرنال عسل واول ما فتحته لقيت عادل الصغير ابن سعد الصغير بيغنى للبقر  بس اغنية تحفة الحقيقة

حتة من الاغنية(يا حلو يا بقرة يا مدلعة يا حلوتك بفتيك او على المسقعة)واكتفيت بهذا القدر من الاغنية خصوصا انى جالى حموضة وقلبت على صفحة اللى بعدها

اخيرا لقيت خبر يفرح بالبنط العريض اخيرا عملوها الابطال وحرروا القدس من الاوغاد وهنا مقدرتش امسك نفسى ورقصت من الفرح ورجعت بسرعة للجرنال عشان اكتشف انا كنت برقص ليه

اتارى القدس دى طلعت ديكسوا ونايت كلوب فى شارع الهرم وكان فى كام واد عملين بلطجة ومش راضين يخروجوا ولا يدفعوا الحساب

واتارى المصريين نسيوا القدس عاصمة فلسطين من يجى خمسين سنة

ورجعت على البيت تانى خوفا من السجن خصوصا  ان فى حظر تجول وفتحت التليفزيون وقفلت التليفزيون

وقمت دخلت على النت ماهو برضه فى نت بس كان برضه بطئ يظهر الناس اللى معايا على الشبكة برضه

 فى سنة 3000 بيعملو دونلود,مش مهم فتحت موقع اخبارى لقيت الرئيس هيثم جمال مبارك يهنئ الشعب المصرى بعيد الكوسة الجديد, وده عيد مصرى خالص موجود من ايام الفراعنة

ولغاية هنا ولقيت النت فصل فكان لازم ارجع من التخيل بتاع للفراغ من جديد