المصري الجديد

يمكن اى حد لما يقرا العنوان يفتكر انى بتكلم عن ابو تريكة مثلا او عن محمد زيدان لكن ف الحقيقة انا بتكلم عن شخص تانى تمام حقق انجازات بجزمته محققهاش يمكن بقلمه واصبح بين يوم وليلة اشهر من نار على علم
الراجل اللى خلى الشعب العربى كله من المحيط للخليج يقول له يا سلام عليك ولد تسلم جزمتك يا ابنى طبعا دلوتى بس عرفته انه الصحفى العراقى منتظر الزيدى الى حدف بوش بالجزمة بس للاسف مجاتش فيه بس على راى حماقى اهى جت يا مجاتش بقه

بعيدا بقه عن السياسة والكلام فالسياسة عشان ان مش بحبه بجد الراجل ده عمل حاجة كلنا كنا نتمنى نعملها كلنا لغاية دلوتى نفسنا ندى بوش بالجزمة لا بالف جزمة فوق دماغه وان كنت انا بلوم ع الاخ منظر عشان معرفش ينشل حلو على بوش بس مش مشكلة ان شاء الله المرة اللى جاية تيجى فى دماغه صح
الغريبة ان ف الوقت اللى الشعب العربى كلها من الخليج للمحيط نفسه يضرب بوش بالجزمة بنلاقى الزعماء والملوك والقادة العرب من الخليج للمحيط بيجروا يبوس ايد بوش وده ان دل على شئ دل على الانقسام فى وجهة النظر بين الزعماء والشعوب العربية

انا مش عايز ازيد واعيد ف الكلام بس بجد منتظر الزيدى شكرا وربنا يكتبلك السلامة

زمان وانا صغير قرايت كتاب للمبدع يوسف عوف الله يرحمه كان فى قصة بتتكلم عن واحد مصرى من الارياف مش لاقى اللضة وبالصدفة البحتة اكتشف انه له فى مصر زى كل المصريين وبدا ينزل الاماكن العامة والشركات والمصانع العامة عشان يطمن على املاكه انها ف ايد امينة وبما ان امينة اصلا خرجت ولن تعد وهو اكتشف ده فقرر يبيع نصيبه ف البلد ويبيع مصر فنزل ميدان التحرير وجاب قفص زى اللى بيحطوا فيه الفاكهة ووقف ينادى حد يشترى مصر بلد للبيع يا جدعان وطبعا الناس اتلمت ولان القفص كان فاضى افتكروه مجنون وبعضهما خدتهم الحماسة والوطنية ومسكوا ف الراجل الغلبان ده عشان ازاى يبيع مصر اللى هى بلدنا

من زمان شوية وانا كبير شوية لقيت هانى رمزى منزل فيلم اسمه عايز حقى متاخدة من قصة يوسف عوف سابقة الذكر وحصل ف الفيلم ان صابر المواطن المصرى اللى طلع عين اهله ونفسه يتجوز ومش لاقى زى كل المصريين هيكتشف بالصدفة ان مصر ده بتاعته وهو له فيها زينا بالظبط وهيبدا يستفيد من الاماكن والشركات العامة اللى هى بتاعته لحد ما يجمع توقيعات الناس عشان يبيع البلد ماهو ماله ومن تحكم فى ماله ما ظلم وبعدين يدرك انه لما يبيع مصر هيروح فين هو اولاده واولادهما والمصريين فقرر يستحمل القرف زى كل المصريين وهو ساكت وبيخلص الفيلم بس الحياة لا

لغاية هنا هنسيب المواطن المصرى الغلبان صابر والرائع يوسف عوف ونرجع لدوتى لما بقيت كبير شوية
الاقى الحكومة قال ايه عايز توزع الاصول ع الشعب يعنى هتعمل زى ما صابر كان بيعمل عايزة تبيع البلد ايا ما كانت المسميات اللى هما بيقوله ادارة اصول وتوزيع اصول انا شايف انها مش هتفرق معايا ع الاقل

هما بقه عايزين ايه يدونا حقنا ناشف ف البلد دى وبعدين محدش فينا يرجع يطالب بحاجة تانى ما خلاص حقك وخدته والبلد وفضناها وكل واحد يصرف نفسه تيجى كمان شوية تلاقى الحديد سعره ولع تقوم تبيع شوية اسمه من مصر عشان تشترى شقة تسكن فيها وبغض النظر عن مين اللى هيشترى مصرى ولا مش مصرى وهيعمل ايه بالاصول دى لكن انت بعت زى عواد وده واحد معرفهوش بس هبقى احكى عليه بعدين راحت الايام وشوية شوية مصاريف الاكل اللى هو اهم حاجة زادت تانى وتالت ورابع وانت اتزنقت تانى قمت رجعت بعت شوية تانى من مصر وده حقك زى ماهما بيقوله وبعته لشخص تانى غير الاولانى عشان الواحد مينفعش يملك اكتر من 10% من اصول البلد يعنى ممكن لو خمسة اخوات يملكوا 50%من اصول البلد وده قانونى وشرعى وكله تمام,جت اتزنقت شوية كمان ومعدش عندك حاجة تبيعها من مصر هتعمل ايه ساعتها هتروح للحكومة تقولها ادينى هتقولك امك ف العش ولا طارت (اسف ع الاسلوب)طيب دى اول نقطة

يا خبر اسود هو فيه نقطة تانى اه تصدق فيه لما انت تاخد حقك ناشف الدعم اللى هو انت طول عمرك بتسمع عنه بس وعمرك ما شفته بعنيك كمان هيتشال وده شئ طبيعى لانك خدت حق ناشف واتعامل بقه التعليم اللى هو مجانى والناس بتدفع فيه دم قلبها هيبقى مش مجانى ,رغيف العيش ابو شلن اللى مليان مسامير والناس مش بتلاقيه الله اعلم سعره هيبقى كام والناس هتلاقيه ولا لا,وكمان المستشفيات الحكومية اللى معاملة فيها غير ادمية وده لانها مجانية بس اهوا اسمها مستشفى لما الواحد يمرض يروح يمرض اكتر هناك برضه مش هتبقى موجودة
الحقيقة ان كل السلبيات اللى موجودة دلوتى بسبب ادارة الدولة للاصول هتختفى ببساطة وده لانى الاصول دى كمان بدورها هتختفى واحنا كمان هنبقى سكان فى مصر وابن وابنك وولادهما مش هيبقى لهم حاجة ف مصر لاننا على ما هما يجيوا هنكون احنا بعنا كل حتة من نصيبنا من مصر وده بفضل قرار الحكومة الرشيد بتوزيع الاصول
بس انا مش هخده منهم حاجة انا عايز نصيب كده يفضل ع الشيوع مع كل الناس عايزه يفضل كبير مش عايز اخده ومتهبيالى انا حر

بمناسبة موسم الامتحانات شوية اسئلة وياريت اللى يعرف حلها او حل جزء منها يقولى لاحسن انا خلاص هتجنن من الحيرة وله الشكر والاجر والثواب
اولا الاسئلة الجغرافية
ليه جامعة القاهرة اسمها جامعة القاهرة مع انها فى محافظة الجيزة؟؟
وليه مستشفى الاطفال الجماعى ابوالريش اسمها مستشفى المنيرة وهى فى حى السيدة الزينب؟؟
وليه مكان رئيس حى المعادى موجود فى حى البساتين؟؟
وايه فايدة التقسيم الادارى الجديد؟؟
وليه الحكومة اللى المفروض تسكن فى العاصمة ساكنة فى محافظة 6 اكتوبر؟؟

ثانيا الاسئلة السياسية
ليه مدة الدورة فى مجلس الشعب 5 سنين مش اقل؟؟
ليه مجلس الشورى والمحليات فيهم اعضاء بالتعيين؟؟
ليه الحكومة ساكنة فى القرية الذكية ومع ذلك قراراتها فى منتهى الغباء؟؟
ليه مصر بتصدر الغاز الطبيعى وهى محتاجة جدا؟؟
ليه قانون الطوارئ يفضل شغال اكتر من 20 سنة؟؟

الاسئلة الاقتصادية
بما تفسر ياعلاوة ما اتقبضت خدها الغلاء وطار؟؟
ليه البنزين والزيت والرز والسجائر والكهرباء والمياه والعيشة اسعارها بقت مولعة ناررررر؟؟
ليه الشقق غالية والقاهرة نصفها مقابر والصحراء كلها صحرا ؟؟
ليه الجنيه المصرى بقه ايدك منه والارض؟؟
ليه كل حاجة عمالة تغلى الا الانسان فى مصر عمال يرخص؟؟

اسئلة لولبية
ليه وزارة احمد نظيف مش بتستقل او تتعزل رغم كل المصايب اللى عمال تحصل دى؟؟
ليه رئيس الوزارة اسمه نظيف مع ان البلد كلها تلوث فى تلوث؟؟
ليه التليفزيون بتاعنا بجيب الخبر بعد ما يحصل باربع سنين ده لو افتكر وجابه؟؟
ليه بيقول ان التعليم مجانى مع ان اى بيت بيدفع مش اقل من 500 جنيه شهريا دروس خصوصية؟؟
ليه محدش يعرف دكتور مصطفى مشرفة والناس كلها تعرف سعد الصغير؟؟
اللى ميعرفش الدكنور مصطفى يدوس هنا
ليه معندناش لجنة ادارة ازمات مع اننا اكتر حاجة عندنا هى الازمات؟؟
كل حاجة عندنا بطابور ومع ذلك احنا معندناش نقطة نظام؟؟
عندنا اكتر من 100 الف خريج جامعى سنويا ومعندناش ولا 100 عالم ؟؟
ليه كتاب عشان متضربيش على قفاك اتصادر وليه اصلا الناس كلها بتدور عليه؟؟
وليه الناس كلها اللى بتددخل المدونة دى مش بتسيب تعليق؟؟
واخيرا ليه منيو الخمسة لسه بخمسة مغليش زى كل حاجة فى البلد؟؟

فجاة ومن اكتر من اسبوعين وكل شوية تجيلى مسجات ايميلات وكلمات عن اضراب 6 ابريل وعن يوم الاحد العظيم اللى الشعب هيخرج فيه ويقول كلمته
معرفش فجاة ليه حسيت اننا ايام احمد عربى ويوم الاحد هتكون مظاهرة عابدين,عادى ده مجرد احساس جه وراح وجه مكانه سؤال
مين اللى نظم الاضراب ده وليه ومين اللى هيخرج فى مظاهرة ابداء المطالب؟؟؟؟؟

فى احتمالين لاول ان اللى نظم الاضراب ده المعارضة المصرية بجميع انتمائتها والاحتمال التانى هو الحكومة المصرية بدهائها
لو المعارضة المصرية يبقى كويس مع ان فى الفترة الاخيرة دور المعارضة المصرية فى تقلص مستمر بشكل يوحى ليا انها اضعف من انها تعمل حاجة زى كده بالاضافة الى ان رموز المعارضة كلهم متسجلين امن دولة وده معناه انهم لو فكروا فا مش هيقدروا
ينفذوا لانهم من دلوتى اكيد بقوا مشرفين وبيتغدوا عند حبيايبنا الحلوين بتوع امن الدولة

اما لو كانت الحكومة والاسلوب ده متبع منذ عهد الملك راح-بب الرابع ان الحكومة من وقت للتانى تعمل حركة كده وتضرب عصفورين بحجر منها تسكت امريكا وامثلها وتوريهم اننا عندنا ديمقراطية والعصفور التانى انها تخلى الشعب يهدا شوية ويخرج حبة من اللى فى قلبه بدل ما ينفجر يعنى اضراب تمثيلى ومظاهرة تمثلية
مين بقه اللى هيخرج فى المظاهرة طبعا بشكل مبداء اول ناس هتكون فى المظاهرة هما عساكر الامن المركزى بعصيانهم ودى حاجة انا متاكد منها

تانى مجموعة هتكون هناك شوية شباب اهبل زى كده بيحبوا البلد وبيحلموا انها تنط خطوة لقدام ودول اللى مضحكوا عليهم واللى غالبا بيضربوا من الامن المركزى وبيناموا ليليتين فى القسم
تالت مجموعة هتكون هناك محبى الظهور اللى بيرحوا عشان يتصوره مع القنوات الفضائية وطبعا يقوده المظاهرة والغريب اللى فى الموضوع انهم وقت الضرب العساكر بتوسع ليهم السكة عشان يروحوا على بيوتهم عشان يلحقوا يتفرجوا على نفسهم فى التليفزيون
وطبعا من غير ذكر اسماء كل واحد منا عنده دلوقتى فى مخيلته عشرة منهم
اه طبعا التقسيم ده ملهوش دعوة بالاحزاب او خلاقه يعنى جوه التقسيم ده هتلاقى فى كل قسم المتحزبين وغيرهم
الجزء الرابع او السواد الاعظم من الشعب هيقعدوا فى بيوتهم ويحمدوا الله ويشكوره فضله انهم خدوا النهاردة اجازة عشان يناموا فيها ودول طبعا اللى غالبا بيروحوا يناموا فى اشغللهم
والغريب فى الموضع ان احنا كا مصريين طول الوقت عملين اضراب عن الحياة

المشكلة مش مشكلة حكومة وغلاء فى الاسعار المشكلة من البداية مشكلة اخلاق ومشكلة وضع اجتماعى غريب مش موجود فى اى حتة فى العالم غير مصر,ناس معاها كل حاجة وناس مش لاقية اى حاجة واحد عنده بدل العربية 100 و100 بيزنفوا فى عربية واحدة ,ما اشبه اليوم بايام المماليك تلاقى الوالى والمماليك حوالى وبيقيت الشعب مش لاقى حاجة يعملها عشان كده بيخش فى حالة اضراب عن الحياة اما بالنسبة للاخلاق فى كل واحد فينا مليان ومتعبئ من اسوء واقذر الاخلاق ويوم بعد يوم بتموت الحاجات الكويسة اللى جوانا وطبعا احنا مستمرين فى اضرابنا على الحياة
مفيش داعى اننا نعمل اضراب يوم الاحد ومفيش دعى اننا نعمل مظاهرة الحاجات دى من ادلة الحياة واحنا للاسف موتنا من زمااااااااان وشبعنا موت

قعدت افكر فى عنوان للبوست ده بس للاسف مفيش عنوان يستحمل تحته الكلام ده

لعنة الله على الظلم لعنة الله على الظالم

فى ست غلبانة كانها امى او اختى ملهاش ضهر فى الدنيا دى وملهاش واسطة ملهاش غير ربنا زينا كلنا ,بتشتغل ممرضة فى مستشفى التكامل الصحى فى منوف اتخنقت فى يوم اسود مع دكتورة من الاكابر جوزها ظابط واخوه ظابط وابوه ظابط

الست الغلبانة مغلطتيش لا اسف غلطت طبعا غلطت لما زعقت مع دكتورة من الاكابر عملت حاجة غلط والدكتورة عشان من الاكابر شتمتها وبهدلتها واتصلت بجوزها الباشا الكبير معاون مباحث بندر منوف جه والطبنجة فى جنبه فى البوكس كانه رايح يحرر القدس او يقبض على خط الصعيد جه يشوف بنت الكلاب اللى غلطت فى الاكابر,واللى ملوش ضهر يشبع ضرب على بطنه

شتمها وضربها وسحلها  فى وسط رجال كتير بس للاسف كلهم عندهم عيال مش عايزينهم يتيموا

الست الغلبانة اشتكت وعملت محضر وبالاساليب الخسيسة بتاعت الاكابر خلوها تتنازل ومن يومها سحبوا منها الامان ظابط البوليس اللى بيحمى الناس مخلي ست ولية مكسورة الجناح  وجوزها واخوها محسسهما كلهم بعجز الرجال تسوى ايه الدنيا لما واحد يضرب اختك ولا مراتك ويشتمها وانت حتى مش قادر ترد عليه الشتيمة

كل يوم تهديد كل يوم تهزئ كل يوم قلة قيمة كل يوم من غير كرامة كل يوم من غير امان

لعنة الله على الظالم

انا مش هسأل فين وزير الداخلية

لعنة الله على الظالم

انا مش هسأل فين وزير الصحة

لعنة الله على الظالم

لعنة الله على الظالم

مزيد من التفاصيل دوس هنا

كنت قاعد بتفرج على التليفزيون برنامج 90 دقيقة ولقيتهم جايبين مرتضى منصور وطبعا كالعادة الحوار كان سخن بمناسبة خروج المستشار مرتضى من السجن

وكان فى سؤال عن مين اصحابه فى السجن او قابل مين فى السجن الغريب فى الاجابة كمية الناس المشاهير الموجودين فى سجن المزرعة لدرجة انى حسيت انه مش سجن ده فندق 7 نجوم او هوليود الشرق

بالاضافة لمرتضى كان هناك حسام ابو الفتوح والمستشار ماهر الجندى وايمن نور وابن فؤاد المهندس وخيرات الشاطر وغيرهم كتيررررررررررر طبعا غريبة شوية ان كل الناس دى تبقى مسجونة وده ليه دلالتين واحدة حلوة والتانية يعنى مش حلوة

هنبدا بالدلالة الحلوة  لان كل دول فى السجن معنى كده ان فى مصر مفيش حدا فوق القانون بدليل ان الاسماء الكبير ده كلها جوه السجن وبتتعاقب

الدلالات الخطيرة فى الموضوع اول حاجة وجود واحد زى ايمن نور وخيرات الشاطر جوه السجن ده معناه ان الدولة محكومة بالحديد والنار واى صوت معارضة بيظهر  سجن المزرعة موجودة ده لو كان مشهور طبعا

تانى حاجة لما رجال اعمال بوزن حسام ابوالفتوح وكان حوت السكر وغيرهم يدخلوا السجن بسب قضايا شيكات ده معناه ان فلوسنا موجودة فى بنوك اوربا واغلب المسجنون هناك اللى اخدوا القروض من البنوك بضمانات وهمية وبتعملوا كانهم فى بيوتهم بالظبط ويمكن احسن كمان طبعا دول كبار مش اى كلام ياخدوا فلوسنا ويتعملوا احسن معاملة جوه السجن اذا كان عجبنا 

كمان تجميع المشاهير دول فى السجن ده بالذات بيوحى بانه سجن مخصوص المعاملة جوه مخصوصة والاكل والشرب والنوم وغيرهم ده سجن فندقى مش اى كلام

يعنى لو فى يوم حبوا يحبسونى انا بفضل اتحبس فى سجن المزرعة فى سويت 201 على الجنينة علطول

تصورو الاهلى اتغلب فى استاد القاهرة والكاس ضاعت مننا  والواحد اعصابه اتحرقت وقعد يسب ويلعن ولغاية دلوتى مجلس ادارة الاهلى بيجمع الادلة عشان يثبت ان الحكم كان متواطئ ,الاهلى الحاجة الوحيدة اللى بتفرح الناس فى مصر اتغلب بس لو فاكر ان الكلام اللى جاااى فى الكورة تبقى غلطان

وقفت كتير جدا قدم جملة  الاهلى هو  الحاجة الوحيدة اللى تفرح فى مصر وان كان يبان لاول وهلة ان الكلام ده صح بس دى مش الحقيقة ولو دى الحقيقة تبقى مصيبة, يعنى اذا كان الاهلى اللى بيفرح ده لا بيحل مشكلة بطالة ولا بياكل ولا بيشرب حد ومع ذلك هو اللى بيفرح الناس ده هيوصل بينا لنتيجة مرعبة معناه ان مفيش مصر اصلا  انا اهلوى على فكرة بس الحق حبيب الله

محدش يقدر ينكر ان الوضع فى مصر بيزداد سوء بس مش لدرجة انه تعتبر نكسة زى نكسة 67 هزيمة الاهلى فى النهائى مش لدرجة ان 50 مليون من السبعين على الاقل شايفنا ان خسارة النهائى اصعب بكتير من حادثة العبارة اللى مات فيها 1000 انسان وحزن فيها اكتر من 1000 اسرة بس طبعا الاهلى اهم

وبعدين فعلا يعنى الكاس الافريقى المسماة بالعروسة الافريفية ولا مثلا لا قدر الله واحد مصرى ياخد جايزة نوبل طبعا بدون شك الكاس لان الكاس دى هياخدها فريق 11 واحد غير الاحتياطى لكن نوبل هياخدها واحد بس و الكترة تغلب الشجاعة

من كام سنة مش كتير يعنى بعد ما د.احمد زويل خد الجايزة كان جاااى مصر زيارة وفى نفس اليوم كان محمد عطية راجع من ستار اكاديمى باللقب الغالى اللى شرف به كل المصريين وطلع الاول  وعشان كده ادارة المطار فتحت قاعة كبار الزور لمحمد عطية والدكتور زويل وقف فى الجوازات مستنى دوره واكتر من 1000 مصرى هايف راحوا يستقبلوا محمد عطية والدكتور زويل كان واقف يدور على تاكسى

وعندى واحد صاحبى عصبى حبة اهون عنده انك تغلط فى اية قرانية ولا تغلط فى سى تامر حسنى الحبسجى قدوة شباب مصر والوطن العربى اللى بيمثل لا مواخدة بالبوكسر

يعنى نقدر نقول ان الاهلى ومحمد عطية وتامر حسنى هما دول الحاجات الوحيدة اللى تفرح فى مصر 

معرفش ايه السبب فى حالة انحدار الوعى والثقافة عند النس معرفش ليه بقى انك تشوف كليب لدانا احسن بكتير من انك تقراء كتاب ومعرفش مين اللى يهمه ان الناس تبقى بالمنظر ده او اعرف بس مش هقول عشان كلنا عارفين

يلله هقول خلاص انا مفيش حاجة اقولها لا معلش فى حاجة تتقال يا امة ضحكت من جهلها الامم

فى بيت مشهور جدا لامير الشعراء احمد شوقى بيقول انما الامم الاخلاق ما بقيت فان هما ذهبت اخلاقهم ذهبوا

انا كنت راكب المترو فى يوم وبعدين واحد جاله تليفون وكنا فى محطة السيدة زينب والاقيه بيقول انه فى محطة الزهراء يعنى بعدها بكذا محطة كذب يعنى,يوم تانى انا متاخر على اصحابى واتصلوا بيا قولت لهم قدامى ربع ساعة وانا عارف انى مش هخلص قبل نص ساعة برضه كذبت

ومواقف غيرها كتير كل يوم الواحد فين بيكذب كتيررر جدا لدرجة انى بتهيالى ان كل كلامنا اصبح كدب والكلام الصدق اللى فيه يتعد على الصوابع ,انا مش بتكلم من الناحية الدينية ان الكدب حرام انا غير مؤهل ان اتكلم دينيا لكن باتكلم من الناحية الاخلاقية

تخيل لما انت تكون اب مثلا وحد يتصل بيك فى التليفون وتقول لابنك يقول انك مش هنا انت كده بتزرع جوه اول بذرة عشان يكون كذاب بس انت لو معملتيش كده ابنك هيكبر ويدعى عليك عشان معملتوش الكدب ومش هيعرف يتعامل مع الناس فى مصر

وعلى الدولة بيتهيالى ان الحكومة هى اللى علمت الناس الكدب بعدم الصراحة اللى بيتعملوا بيها معانا مبيقلوش حاجة ابدا وتطلع صح بيخبى عنا كل حاجة وطول الوقت بيقول ان البلد زى الفل ولا غلاء فى الاسعار ومفيش تحرشات ومفيش تعذيب ومفيش اى كلمة صدق بيقولها

انا فى راى كل واحد لازم يبدا بنفسه ولو يوم فى الاسبوع يخليه يوم الصدق ميقولش فيه حاجة كدب ابدا لو على رقبته بس انا طبعا مش هينفع ابدا لان بكل اسى مقدرش اعد يوم كامل من غير ما اكدب خالص الا لو حبست نفسى فى اوضتى اليوم ده وطبعا ده مستحيل  عشان كده فككوا من احمد شوقى واشعاره ومنى ومن كلامى الفاضى

الحمد الله بقولها واعيدها فى كل وقت

عمرى ما ابطلها وارددها فى اى وقت

ولو كل واحد قالها ما تكفى لرد

دى نعم ربنا علينا علينا مالها حد

يلا قولهاده ربنا ما بينساش عبد

الحمد الله بقولها واعيدها فى كل وقت

فى الفرح دايما حمدك والحزن يا رب

دايما جنب عبدك واحن عليه من ام واب

سبحانك اللهم بتزرق الخلق من غير متطلب حمد

مقدرش اقول غير الف حمد يارب

ولو اقول العمر كله ما اوفيك حق

نعمة واحدة يا كريم يا رب

مهما شقيت وشوفت وتعبت واثق

من حكمتك فى الرد سبحانك مبتنساش حد

الحمد لله بقولها واعيدها فى اى وقت

المدونة محجوبة اليوم 7/10 من اجل الحرية

وعسى ان تعود الينا حريتنا

نقلا من مدونة غريب