المصري الجديد

معلش ولا مواخذة ومكانش قصدى من اكتر الكلمات العربية استخداما فى مصر فى الوقت الحالى واحيانا بنستخدم كلمة واحدة فقط واحيانا التلاتة مجتمعين

تبقى ماشى فى الشارع وتلاقى مياه واسخة بتنزل على راسك مش من السما لكن من البلكونة اللى فوق وتلاقى واحدة بتقولك معلش واحيانا مكانش قصدى, وتكون ماشى فى شارع تانى وتلاقى احد خبطك كتف لكنه مش قانونى بالمرة وعلطول تلاقى لا مواخذة وممكن سورى حسب الشارع اللى انت ماشى فيه والغريب انك متقدرش تعترض ماهو قالك معلش يعنى يقطع نفسه

وتكون واقف فى طابور بقالك سنة مستنى تخلص مصلحة ولا تقطع تذكرة وتلاقى واحد بكل بجاحة داخل على الشباك وبيقول معلش يا جماعة اصلى مستعجل ,ولا اللى خارج من الطابور بيدوس فى اللى وراه وده مش هيقولك معلش الا لو بصيتله نظرة نارية ساعتها بس هيقولك معلش او لامواخذة وبرضه مش هتقدر تتكلم

وامثال كتير جدا احيانا بيتقالك وكتير بنقول معلش ولا مواخدة ومكانش قصدى مع انى اللى اخترع الكلمات دى منه لله مكانش يقصد انها تكون كلمات دارجة بتقل فى اليوم الواحد الف مرة اكتر من السلاموا عليكوا مكانش يقصد انها تكون كلمات مجوفة الواحد بيقولها فى الدقيقة 60 مرة من غير ما تفرق معاه

يعنى معلش كان يقصد بها الاسف والندم على الفعلة اللى انسان عملها من غير قصد او بقصد لكن مين دلوتى وهو بيقول معلش بيحس بالاسف اه نسيت فى ناس بتحس بالاسف بس ان الظروف اجبرتها انها تقول معلش زى الموظف اللى بيتاخر على المدير بتاعه ويضطر يقول معلش

ولا مواخدة زى معلش بس لامواخذة دى تنفع نكت تلاقى واحد هيشتم واحد قريبك صاحبك جارك مثلا وبيستئذانك الاول  بكلمة لا مواخذة و طبعا مينفعش تكلمه ما الراجل عده العيب وقالك لامواخذة, يعنى يجى يشتم الشارع بتاعك  ويقولك لا مواخذة ده شارع زبالة انا مش فاهم هو هنا خارجك بره الشتيمة ولا انت برضه لامواخذة زبالة

مكانش قصدى الكلمة الالعن والاضل تلاقى واحد عامل حاجة تغيظ ويبص لك بكل براءة ويقولك مكانش قصدى يخبط كباية الشاى السخن ويبهدلك ويقولك مكانش قصدى وحاجات زى كده تجنن بس معلش مكانش قصدى اصلى ليس على انسان حرج

عندى دكتورة فى الجامعة بتقول ولو شيلنا كلمة معلش من قاموسنا اللغوى75% من مشكلنا هتتحل وانا بضيف كلمة مكانش قصدى ونكتة لا مواخذة وبقول ان 30% من مشكلنا هتتحل

وبعدين معلش ومكانش قصدى والله لا مواخذة بئه

لو عايز تعرف مين احنا ومين انتوا ومين هما اقرا للاخر وابقى قابلنى لو عرفت او فهمت اى حاجة

احنا ……احنا اللى وقفنا ولا اتحتحتنا

وبالجزمة على قفنا اضربنا ولا صرخنا

الحزن نصيبنا من يوم ما طرحنا

والفرح ف بلدى عمره ما زار مطرحنا

انتوا……انتوا اللى وقفتوا واتفرجتوا

سمعتوا صرخنا فى وسط الليل وبرضه نمتوا

وعن حقنا والعدل سكتوا وغمضتوا

وساعة الجد جوه الجحور تتخبوا

هما ……هما قلالات الذمة

سرقوها وخربوها وهيسبوها رمة

وكمان ناويين يبيعوها حتة حتة

وفلوسنا باسمائهم جوه بنوك اوربا

 نقلا من جريدة الاهالى

المفروض انها كانت مكتوبة بشكل احسن من كده بس للاسف ضعت منى فعذرا للاسلوب الضعيف والاداء الباهت

وبعدين فى كلتا الحالتين انتوا مش هتعرفوا مين احنا ولاا نتوا ولا هما

وانا قاعد مفروس من اللى بيحصل فى مصر  وكل حاجة بتحصل فى مصر تفرس اكتر من اخواتها

والفجر فى سكون الليل لقيت نفسى بسال مصر وبحرقة واقول لها ليه يا مصر لدرجة ان حسيت ان مصر هترد عليا بجد

وفعلا سمعت صوت بيرد عليا ويقولى نام يا اهبل

ليه يا مصر سار حالك مقلوب

عيشتك بقت ضنك وخيرك منهوب

والطيبين فيكى حقهم مسلوب

والحرامية حكمينك بالشوم والطوب

وان حد قال الحق يبات مضروب

او حتى قال لا فى المعتقل محجوب

بقيتى عنوان للظلم والجور فى كل مكان

بعد ما كان النور يملئ ربوعك زمان

والناس مبقاش ليها غير الرحمن

تدعى على الظالم فى كل اذان

مع ان حتى الظلم…..ليه اوان

ومصير الفجر يجى بالخير مليان

والشمس تنشر ضياءها فى كل الوديان

والعدل صوته يطلع ووياه الامان

والمصرى اخيرا يشبع وينام شبعان

يارب يا منان يا خالق الانسان

حلمى ده يتحقق فى يوم من الايام

شوية صور من النت عجبتنى فنقلتها هنا

الموت جوعا فى افريقيا

سبحان الله

ايرانين معرفش عملين كده ليه

نتيجة لـــــــــــــ

يارب تفضل الصورايخ لكده وبس

محدش يستغرب

يبقى انت اكيد فى مصر

اكيد فى مصر

متجمعين فى الخير دايما

امسك حرامى

ونختمها بافريقيا زى ما بدانا

طبعا ممكن حد يسأل مبروك على ايه؟

هو فى حاجة فى مصر تفرح وتستهل يتقال عليها مبروك ,لغاية امبارح مكانش فيه لكن النهاردة فى حاجة هتغير تاريخ البشرية وتستاهل يتقال عليها مبروك

النهاردة فرح الاستاذ والبيه والباشا كمان جمال مبارك, وانا طبعا بحبه والا مكونتش كتبت له تهنئة عندى فى المدونة

وبعدين واحد غبى سالنى هو ليه متجوزش من زمان ؟طبعا سؤال غبى لان سن الجواز فى مصر اتاخر نتيجة للظروف الاقتصادية الصعبة والقحط اللى بتعنى منه البلد وهو اتاخر زى اى شاب عادى فى العمرانية او بولاق بيكون نفسه

صحيح هو بيعمل الفرح فى شرم الشيخ بس اوعوا تتغروا ده فرح على الضيق وبعدين هو عمله فى شرم ليه؟؟

عشان لو عمل الفرح فى القاهرة شوف كام واحد هيروح يهنئ  وهو شاب ويدوبك مدبق ثمن الشبكة بالعافية وطبعا معازيم كتير يعنى عشاء وجاتوه وحاجة ساقعة كمان, وانا من المدونة هنا بقول ياريت كل الشباب تقتصد زى الباشا جمال وتعمل افراحها فى شرم الشيخ توفيرا للنفقات

وبعدين فى ناس بتقول انه واخدة شقة من المحافظة عشان يتجوز فيه وبيقولوا كمان انه خد الشقة دى واسطة وكده يعنى,انا برده على الناس دول اللى بيقولوا اشاعات مغرضة واقولهم الكلام ده غلط هو حسب ما سمعت هيتجوز فى قصر فى المعادى يعنى شقق المحافظة زى ما هى وهو مخدش حاجة منها

وبعدين عشان محدش يتكلم القصر ده واخده ايجار جديد,طبعا شاب وربنا يكون فى عون كل الشباب هيجيب تمن شقة منين؟؟

وطبعا كل الموبيليا بالتقسيط وكمان هو عليه اوضة النوم بس والعروسة هى اللى جايبة الانتريه والسفرة والمطبخ جاله هداية من واحد معرفة

وعقبال عندكم جميعا

بجد زهقت منكم ناس مقرفة وبلد مقرفة وعيشتكم قرف فى قرف وبعد كده تزعلوا لما اقول هى القيامة مش هتقوم بئه

وتزعلوا منى لما اقول انا فاشل وانتوا السبب فى فشلى بس الحقيقة مش انا لوحدى اللى فاشل كلكم فشلة بس محدش فيكم عنده الشجاعة عشان يعترف بكده زى واللى مش مصدق يبص لنفسه وهو هيعرف قد ايه هو فاشل

وكل ده معرفش؟؟ المشكلة انى معرفش عيشة تقرف والجو كمان وكانى كنت مستحمل, بقه حر يخنق ومش كفاية القرف اللى واحد بيشوفه فى يومه لا كمان جو حر  وناس سالبين ومقرفين  مبيعملوش حاجة فى حياتهم  عيشين حياة اقرب للموت  مش عارف ادعى عليكوا ولا ادعيلكوا  بس ادعيلكوا بتاع ايه هو انتوا عايز كل حاجة كده وانتوا قاعدين

طبعا كل واحد هيقولى وانتى عايزنى اعمل ايه ؟؟ يعنى كمان فى الاخر انا اللى هقول لكل واحد يعمل ايه

ومع ذلك انا هقول بس انت اعمل

متكدبيش صعبة دى ؟ طبعا صعبة جدا متكدبيش ازاى وانت عايش عمرك كله بتكدب ومفيش يوم بيعدى من غير كدبة

طيب بلاش دى شكلها صعبة علينا بعد ما اتعودنا الكدب

طيب متغشش فى الامتحانات ولا فى اى حاجة بتعملها؟؟ لا انا اكيد بهزر بعد ما وصلنا كل ده بالغش هتيجى دلوتى وتقولى متغشيش لا اكيد بهزر, لا بئه مش بهزر متغشيش, بس طبعا يهزر دى كمان صعبة علينا بعد ما عشنا عمرنا كله بنغش

طيب هفكر ليكوا فى حاجة سهلة  بردوا انا اللى هفكر وكانكم بهايم من غير عقل ماشى طالما انا اللى بقول يبقى لازم انا اللى افكر  ماشى كلامكوا

متدفعش رشوة او متخدهاش يعنى متفتحش مخك وامشى بما يردى الله

اه انا كده اتجننت رسمى ,يعنى لما عسكرى المرور يوقفنى عشان مش رابط الحزام ولا بتكلم فى التليفون يعملى غرامة بالشى الفلانى عشان مرديتش افتح مخى هتتبسط انت كده

ولا لما افضل رايح جاى على السجل المدنى عشان اطلع شهادة ميلاد كمبيوتر واسيب شغلى واللى ورائى قال يعنى انا ورائى حاجة عشان سعادتك تتبسط لما انا مفتحش مخى

 لا معك حق, اقولك الحق احنا هنعيش كده ونموت كده(كده دى شتيمة بس محدش هيفهمها) وانا غلطان

وانا اسف كمان بس يظهر الحر وقلة النوم تعبونى شوية واكيد فى الاخر انا كنت بهزر بس مش واخد بالى

ههههههههههههه ههههههههه ههههههههههههه

لو خرجت من بيتكوا يبقى انت داخل على مغامرة فى شوارع قاهرة المعز, وانت بتغامر باغلى ما تملك حياتك!!!!؟

لو خرجت من بيتك لازم تبقى عينك فى نص راسك  عشان متقعش فى بلاعة مفتوحة وهتشوف فى سكتك كتيررر منها واذا نجاك ربنا من شر البلاعات اللى مبتشبعش ,متفرحش….؟

لو ماشى فى وسط الشارع ممكن تخبطك عربية تخبطك ايه تدهسك عربية مجنونة سايقها واد اهبل  غالبا ضارب مخدرات ومش شايف قدامه ,اما لو كان حظك حلو ولقيت فى الشارع  رصيف ودا والله العظيم حقيقة فى شوارع فيها رصيف  وملقتيش ناس قاعدة على الرصيف بتبيع حاجات ولا حتى قاعدين بيتهؤ  واستطعت بفضل من الله انك تصعد الرصيف سالما متفرحش….؟

عشان دلوتى الميكرباصات بتمشى فوق الرصيف اكتر ما بتمشى فى وسط الشارع وكل ده لو انتى موقعتش فى حفرة ومتشنكلتيش فى حجر

اما لو  سولت لك نفسك وركبت ميكروباص هتشوف اثارة ملهاش حل  ولا حتى فى مدينة الملاهى(دريم بارك مثلا) العربية هتمشى على عجلاتين واحيانا على عجلة واحدة  وتطلع رصيف وتنط من فوق كوبرى(غالبا كوبرى السيدة عائشة) شوية بنى ادمين يقعوا من الميكروباص و هو السواق بيعمل غرز كده ولا كده 

اما لو انت من اصحاب الاعصاب الفولاذية ولديك القدرة على القيادة فى مصر و عندك عربية طبعا وماشى رابط حزام الامان ومبتكلميش فى الموبيل ومش مشغول بحاجة غير طريقك ربنا يستر طريقنا جميعا  برضه متفرحش….؟

ممكن تلاقى ونش حكومة لزق فى عربيتك ولا وقعت العربية كلها فى حفرة فى وسط الشارع

اما لو خفت على حياتك وراحت على المترو اسهل وازحم وسيلة موصلات فى مصر  برضه متفرحش….؟

(تحس انى جاى انكد عليكوا)

عشان فى شروط لركوب المترو 

اولا:لازم تكون صاحب قوة تحمل خرافية  عشان ممكن تضطر تعيش لمدة محطة او اكتر من غير هواء

ثانيا:يختلف الجو كليا جوه عربيات المترو عن الجو الطبيعى بره عشان كده لازم تقراء النشرة الجوية اللى جو المحطات عشان متخدش برد

وكمان غالبا  هيغمى عليك مرتين  تلاتة لحد ماتنزل بالسلامة  وعشان كده

غير مسموح بتاتا لمرضى القلب والحوامل ضيق التنفس الخروج من منازلهم